༄༅། །ངེད་དྲ་བར་ཕེབས་པར་དགའ་བསུ་ཞུ།
དེ་རིང་ནི་སྤྱི་ལོ 2024 ལོའི་ཟླ 3 ཚེས 27
དྲ་གནས་ཉར་ཚགས།   གཙོ་ངོས་སུ་འགོད་པ།
中文   |   English   |   བོད་ཡིག
ཕྱོགས་སྟོན།:  གཙོ་ངོས། > རྩོམ་རིག > 2 སྙན་རྩོམ།
2 སྙན་རྩོམ།
ལུང་ཁུགས་ཀྱི་འབྲོག་མོ།
[རྩོམ་ཁུངས།:ཁྱུང་པོའི་དྲྭ་བ།] [ཟླ་ཚེས།:2017-05-02] [རྩོམ་པ་པོ།:ཁྱུང་ཁྲི་ལྡེ།] [གཟིགས་ཐེངས:]

ཕ་ས་སྨུག་པོ་ཡི་རི་ཁུགས་ཤིག་ན།།
ཞོལ་ཆེན་གཡག་ཕོ་ཡི་རྩིད་གུར་ཕུབ་ནས།།
ལྷ་འབྲི་བཞོན་མ་ཡི་འོ་ཞོ་འཐུང་བའི།།
མྱེས་པོའི་རྒྱུད་འཛིན་གྱི་ལུང་ཁུགས་འབྲོག་མོ།།

དེང་རབས་ཕོ་གསར་ཚོས་ལྟ་ཉན་མ་འདོད།།
ན་གཞོན་ཀླད་སྟོང་ཚོས་བཀུར་ཉན་མ་འདོད།།
དྲི་ནག་སོར་དགུ་ཡི་མར་ཞབས་དེ་ན།།
རྟུག་དྲི་ཚུབས་སེ་རུ་ལུས་པའི་འབྲོག་མོ།།

ཡར་མེད་མར་མེད་ཀྱི་ན་གཞོན་ཁྲ་ཁྲ།།
ཕར་མེད་ཚུར་མེད་ཀྱི་རྟོག་སད་སྐྱ་སྐྱ།།
ལྷ་མིན་འདྲེ་མིན་གྱི་མགོ་ཟླུམ་སེར་སེར།།
རྩྭ་མིན་ཤིང་མིན་གྱི་ཕོ་ཧྲེང་དེ་ཚོས།།

རིག་གནས་མི་ཤེས་གདའ་ཟེར་ནས་བརྙས་གི།
གཙང་སྦྲ་མ་བྱས་གདའ་ཟེར་ནས་འཕྱ་གི།
སློབ་གྲྭ་མ་སོང་སིག་ཟེར་ནས་སྡིག་གི།
གླེན་ལྐུགས་བྱོལ་སོང་རེད་ཟེར་ནས་ཁྲེལ་གི།

སྐད་རིགས་མ་ཤེས་གདའ་ཟེར་ན་ལོས་བདེན།།
གཙང་སྦྲ་མ་བྱས་སིག་ཟེར་ན་ལོས་འགྲིག།
རྟོག་སད་ཡིན་མདོག་ཚོ་བརྒྱ་ལས་ལྷག་པའི།།
བོད་པའི་བླ་སྲོག་དེ་འབྲོག་མོས་བཟུང་ཡོད།།

རྩྭ་ས་གང་བཟང་དུ་སྦྲ་གུར་ཕུབ་ནས།།
སྤང་ཁ་གར་བདེ་རུ་སྐྱག་ཐོ་བཙུགས་ཏེ།།
ཨ་མྱེ་ཡོངས་མྱེ་ཡི་གནའ་ཤུལ་འཚོལ་བའི།།
ལུང་ཁུགས་འབྲོག་མོ་ནི་བོད་ཀྱི་ས་བདག།

སྦྲ་ནག་གྲུ་བཞི་ཡི་ཁུགས་མའི་ནང་དུ།།
རྡོ་ནག་ཟུར་གསུམ་གྱི་སྒྱེ་པུ་བཙུགས་ཏེ།།
ནོར་ནག་འབྲི་མོ་ཡི་འོ་དཀར་སྐོལ་བའི།།
ལུག་ཁུགས་འབྲོག་མོ་ནི་བོད་ཀྱི་སྲོལ་འཛིན།།

རྫས་སྦྱོར་འདག་རྫས་ཀྱིས་གདོང་པ་མ་ཁྲུས།།
དཀར་མར་ཚོན་རྩི་ཡིས་བཞིན་རས་མ་ཚོན།།
རང་བྱུང་ལྷན་སྐྱེས་ཀྱི་དཀྱེལ་གཟུགས་རྫོགས་པའི།།
ལུང་ཁུགས་འབྲོག་མོ་ནི་མཛེས་མའི་ཡང་རྩེ།།

ཕོ་རྐུབ་དོད་ཚད་ལ་ལུས་འབྲེལ་མ་བྱས།།
ནད་ངན་ཨེ་ཙི་ཡིས་ཕུང་ཁམས་མ་ལྷད།།
ལུས་གཙང་སེམས་གཙང་གི་བོད་མོ་སྙོམས་ཆུང་།།
ལུང་ཁུགས་འབྲོག་མོ་ནི་གཙང་མ་མཐར་ཐུག།

དེང་རབས་བྱུག་རྫས་ལ་སྐྱབས་བཅོལ་མ་ཞུས།།
རང་བྱུང་ལྷན་སྐྱེས་ཀྱི་འབྲོག་དྲི་ཚ་མོས།།
རྒྱ་མདོའི་ཕོ་ཤི་ཚོ་སྣ་རྩ་གཅོད་པའི།།
ལུང་ཁུགས་འབྲོག་མོ་ནི་སྤོས་རི་ངད་ལྡན།།

ཐ་མ་སྣ་ཐ་ཡིས་རྩ་ཕྲན་མ་སྐམ།།
ཆང་དང་ཨ་རག་གིས་བློ་མཆིན་མ་ཚིག།
དོན་ལྔ་སྣོད་དྲུག་ཀུན་སྲུང་སྐྱོབ་བྱེད་མཁན།།
ལུང་ཁུགས་འབྲོག་མོ་ནི་སྨན་པ་ཕུལ་བྱུང་།།

྄རྒྱ་བོད་དབྱིན་གསུམ་གྱི་སྐུ་མགྲོན་ཡོངས་ལ།།
བོད་སྐད་མ་གཏོགས་པའི་ཚིག་གཅིག་མི་བཤད།།
བསྲེས་སྐད་དྲི་ངན་གྱི་ས་བོན་མེད་པའི།།
ལུང་ཁུགས་འབྲོག་མོ་ནི་སྐད་ཀྱི་སྲོག་འཛིན།།

ཆེས་མཐོའི་སློབ་གླིང་ནས་རྒན་ཡོལ་ཞུས་ཤིང་།།
དབེན་པའི་རི་ཁུགས་སུ་སྐུ་མཚམས་བཞུགས་པའི།།
སྦྲ་གུར་སྒ་ཆ་ཡི་ཐ་སྙད་འཛིན་མཁན།།
ལུང་ཁུགས་འབྲོག་མོ་ནི་ཚིག་མཛོད་རྙིང་པ།།

ཟིལ་ཆུང་འབྲི་མོ་དེ་ལྷས་ལ་སྐོར་ཞིང་།།
བཞོ་དབྱངས་སྙན་མོ་དེ་ངག་ནས་ལེན་བཞིན།།
མར་ཐུད་ཆུར་གསུམ་ཡི་ཐོན་སྐྱེད་བསྐྲུན་པའི།།
ལུང་ཁུགས་འབྲོག་མོ་ནི་བཟོ་པའི་ཡང་རྩེ།།

དགུན་གསུམ་ལྷག་རླུང་གི་འཁྱག་རོམ་ཁྲོད་དུ།།
ལྷུ་ཚིགས་ཡན་ལག་ཀུན་ཤ་འཁེངས་གྱུར་ཡང་།།
ད་དུང་ལྷས་འདབ་ཀྱི་རྙི་འཁེངས་འཐུ་བའི།།
ལུང་ཁུགས་འབྲོག་མོ་ནི་བཟོད་ཐུབ་རྒྱལ་པོ།།

སྐྱ་ཆད་སྔོ་རྡུགས་ཀྱི་དཔྱིད་ནག་མ་ལ།།
འབྲི་ངན་ཡར་ངན་ཚོ་ཉལ་འོག་ལྷུང་དུས།།
ལྷག་སེམས་རྣམ་དག་གིས་ཞབས་ཕྱི་ཞུ་མཁན།།
ལུང་ཁུགས་འབྲོག་མོ་ནི་བྱང་ཆུབ་སེམས་དཔའ།།

དབྱར་གསུམ་དྲག་ཆར་གྱིས་བཞི་རྡུང་བྱེད་དུས།།
ཐུས་མ་ནུ་བྱེ་མ་མི་ཐུབ་བཞིན་དུ།།
ལྷས་རའི་འདམ་དོང་ནང་ཚ་འཕགས་རྡུང་བའི།།
ལུང་ཁུགས་འབྲོག་མོ་ནི་མོ་རྒོད་ངར་མ།།

སྟོན་གསུམ་ཁྱུ་གཡག་གིས་ཤེ་སྦྱོར་བྱེད་དུས།།
འབྲི་རྒོད་རྔ་མ་དེ་བཀྱག་རོགས་བྱེད་ནས།།
དུས་འགྲོའི་བརྩེ་དུང་ལ་ཕྱག་རོགས་ཞུ་མཁན།།
ལུང་ཁུགས་འབྲོག་མོ་ནི་སྙིང་རྗེའི་རང་གཟུགས།།

རྟ་ནོར་ལུག་གསུམ་གྱི་ཚེ་སྲོག་ཆེད་དུ།།
མཚན་མོ་སྒོ་ཁྱི་ཡི་སྐད་ལ་ཉན་ནས།།
འཕར་སྤྱང་དྲེད་གསུམ་ལ་ཁ་གཏད་བཅའ་མཁན།།
ལུང་ཁུགས་འབྲོག་མོ་ནི་ལྷ་སྲུང་དངོས་བྱོན།།

དགའ་སྐྱོ་ཆགས་སྡང་གི་ཚོར་འདུ་སྐྱིན་པོ།།
ཡོ་ཆས་སྐད་སྦུག་གིས་རེམ་འདེག་མེད་ཐོག།
ཐད་ཀར་མགྲིན་སྦུབས་ནས་དབྱངས་སུ་འགུག་པའི།།
ལུང་ཁུགས་འབྲོག་མོ་ནི་སྙན་ངག་བྱེད་པོ།།

ཡར་གྱི་དཔོན་པོ་ལ་ངོས་དགའ་མི་ལབ།།
མར་གྱི་སྤྲང་གོག་ལ་བརྙས་བཅོས་མི་བྱེད།།
རང་གཤིས་དྲང་མོ་ཡིས་མདུན་བསྐྱོད་བྱེད་པའི།།
ལུང་ཁུགས་འབྲོག་མོ་ནི་དྲང་སྲོང་ཚད་ལྡན།།

ཕ་མ་རྒན་འཁོགས་ཚོ་གོང་དུ་བཀུར་ཞིང།།
ཁྲེལ་གཞུང་དམ་ཚིག་གཉིས་སེམས་ལ་ཉར་ནས།།
ལས་དང་རྒྱུ་འབྲས་ལ་ཡིད་ཆེས་ཆེ་བའི།།
ལུང་ཁུགས་འབྲོག་མོ་ནི་བོད་ཀྱི་ཀ་བ།།

ལུང་ཁུགས་འབྲོག་མོ་ཡི་ལས་དབང་རེ་ལ།།
ཁ་བ་གངས་ཅན་པའི་ཚེ་སྲོག་འབྲེལ་ཡོད།།
ལུང་ཁུགས་འབྲོག་མོ་ཡི་ཕུག་བསམ་རེ་ལ།
ཁ་བ་གངས་ཅན་པའི་རྣམ་ཤེས་འཁྲིལ་ཡོད།།

ལུང་ཁུགས་འབྲོག་མོ་ཡི་དྲི་ནག་རེ་ལ།།
ཡ་ཐོག་ཨ་མྱེ་ཚོའི་བྱིན་རླབས་ཐིམ་ཡོད།།
ལུང་ཁུགས་འབྲོག་མོ་ཡི་གླུ་སྐད་རེ་ལ།།
མེས་པོའི་ལོ་རྒྱུས་ཀྱི་གསང་བ་གནས་ཡོད།།

ཁ་བ་གངས་ཅན་པའི་སྐད་ཡིག་ངོ་མ།།
ལུང་ཁུགས་འབྲོག་མོ་ཡི་ངག་ལ་ལུས་ཡོད།།
ཁ་བ་གངས་ཅན་པའི་གོམས་གཤིས་ངོ་མ།།
ལུང་ཁུགས་འབྲོག་མོ་ཡི་ལུས་ལ་གནས་ཡོད།།

གནམ་གྲུ་ཞོན་མཁན་ཚོས་འབྲོག་མོ་མ་འཕྱ།།
རྟ་ཕོ་གཏོང་མཁན་ཚོས་འབྲོག་མོ་མ་ཁྲེལ།
དེང་རབས་ཟེར་མཁན་ཚོས་འབྲོག་མོ་མ་བརྙས།།
འབྲོག་མོ་གཙང་མ་ནི་བོད་པའི་རྒྱན་རེད།།

འབྲོག་མོའི་སྐུ་ཚེ་ནི་ཆུ་ལས་རིང་དགོས།།
འབྲོག་མོའི་ཞབས་པད་ནི་བྲག་ལས་བརྟན་དགོས།།
འབྲོག་མོའི་ཀླུང་རྟ་ནི་དགུང་ལས་མཐོ་དགོས།།
འབྲོག་མོའི་དབང་ཐང་ནི་རྟག་ཏུ་དར་དགོས།།




སྐད་འཇོག་རེའུ་མིག

འདྲེན་སྐོལ། དཔྱད་གཏམ(0)ཡོད།