འབྲོག་གི་རྟ་ནོར་ལུག་གསུམ་སྒོ་ནས་བཀར།།
ཡུལ་གྱི་ཕ་ཞིང་མ་མཁར་རྒྱབ་ཏུ་བསྐྱུར།།
ལྷོ་བྱང་ངེས་མེད་ཁྱི་ལམ་ལེན་རྒྱུ་འདི།།
དབྱར་རྩྭ་དགུན་འབུའི་ཆོ་འཕྲུལ་དང་པོ་ཡིན།།

སོས་འགོ་བཙུགས་ནས་རི་ལུང་མི་ཡིས་གང་།།
རྒྱབ་རི་ལྐོག་ཏུ་སློག་པའི་ཆོམ་རྐུན་ཚོས།།
ཡུལ་གྱི་མི་རྣམས་སྙིང་ཆུ་དཀྲུག་པ་འདི།།
དབྱར་རྩྭ་དགུན་འབུའི་ཆོ་འཕྲུལ་གཉིས་པ་ཡིན།།

རི་འགོའི་རི་དྭགས་ས་མཐའི་ཡུལ་ལ་བཀྲོག
རི་རྐེད་བྱ་དངབྱ་བྱེའུའི་ཚང་འདུས་བཤིགས།།
རི་འདབས་སྡེ་ལ་འགོ་ནད་མཆེད་པ་འདི།།
དབྱར་རྩྭ་དགུན་འབུའི་ཆོ་འཕྲུལ་གསུམ་པ་ཡིན།།

འཕྲུལ་རིགས་གང་བྱུང་བརྒྱུགས་པའི་ལམ་ཤུལ་དུ།།
 རྩྭ་ཐང་ཡངས་མོ་ཁྲམ་བྱང་བཞིན་དུ་བསྒྱུར།།
བཙོག་ཉོབ་ཕུང་པོས་རི་ལུང་ཁྱབ་པ་འདི།།
དབྱར་རྩྭ་དགུན་འབུའི་ཆོ་འཕྲུལ་བཞི་པ་ཡིན།།

སྒ་ཆས་སྒྲོ་སྣོད་སྒོ་འགྲམ་མར་ལ་སླེབས།།
གློག་ཆས་མཁོ་སྤྱད་ཁྱིམ་ཕུག་ཡར་ལ་འཛུལ།།
འབྲོག་དུད་ཞིག་གི་ངང་ཚུལ་བརླགས་པ་འདི།།
དབྱར་རྩྭ་དགུན་འབུའི་ཆོ་འཕྲུལ་ལྔ་པ་ཡིན།།

མགོ་དང་ལུས་ལ་གོན་རྒྱུ་རིག་ཚད་གོན།།
ཁ་དང་སྣ་ལ་རྫོང་རྒྱུ་ཇི་སྙེད་བྱེད།།
ན་སྐད་ཚ་སྐད་ཟད་མཐའ་མེད་པ་འདི།།
དབྱར་རྩྭ་དགུན་འབུའི་ཆོ་འཕྲུལ་དྲུག་པ་ཡིན།།

ནང་གི་ཕ་མ་གཉེན་འབྲེལ་སེམས་པ་གསོད།།
ཕྱི་ཡི་ཡུལ་མི་ཀུན་ལ་འཁྲུག་གཞི་སློང་།།
སྟོན་དུས་གཡག་རྒོད་འགྲོ་འགྲོ་བྱེད་རྒྱུ་འདི།།
དབྱར་རྩྭ་དགུན་འབུའི་ཆོ་འཕྲུལ་བདུན་པ་ཡིན།།

ཆིབས་བསུ་མི་དགོས་བླ་གྲྭ་སྒོ་ལ་ཕེབས།།
ཞུ་བ་མ་བྱས་སྲུང་རྟགས་ཚུར་ལ་རྨེད།།
ཤི་འདྲེ་གསོན་འདྲེ་འཁོར་རབས་མང་བ་འདི།།
དབྱར་རྩྭ་དགུན་འབུའི་ཆོ་འཕྲུལ་བརྒྱད་པ་ཡིན།།

ཕོ་ལུས་བླང་ཚད་ཤོ་བག་རྩེ་ལ་བྲེལ།།
མོ་ལུས་བླང་ཚད་ཁ་པར་རྩེ་ལ་བྲེལ།།
ཚ་དྲོ་དུས་གསུམ་དུས་སུ་མེད་པ་འདི།།
དབྱར་རྩྭ་དགུན་འབུའི་ཆོ་འཕྲུལ་དགུ་པ་ཡིན།།

དེ་ལྟར་མི་མཐུན་དུས་ཀྱི་ཆོ་འཕྲུལ་རྣམས།།
ལོ་རེ་ཟླ་རེ་བཞིན་དུ་རྒོད་དྲགས་པས།།
བདག་ཉིད་དེ་དག་འདུལ་བའི་དོན་ཆེད་དུ།།
ཁྲོ་རྒྱལ་དྲག་པོའི་སྐུ་རུ་བཞེངས་པར་འདོད།།

ཏི་སེའི་བུ་ནས།  2014-04-13  ཉིན་བྲིས།