༄༅། །ངེད་དྲ་བར་ཕེབས་པར་དགའ་བསུ་ཞུ།
དེ་རིང་ནི་སྤྱི་ལོ 2024 ལོའི་ཟླ 3 ཚེས 2
དྲ་གནས་ཉར་ཚགས།   གཙོ་ངོས་སུ་འགོད་པ།
中文   |   English   |   བོད་ཡིག
ཕྱོགས་སྟོན།:  གཙོ་ངོས། > མཚམས་སྦྱོར། > 3 སློབ་གླིང་དང་མཛད་སྒོ།
3 སློབ་གླིང་དང་མཛད་སྒོ།
དུས་མཐའི་མུན་རླུང་ཁྲོད་ཀྱི་འོད་སྒྲོན་རྐང་གཅིག་ཡི་རང་ཆེ།
[རྩོམ་ཁུངས།:ཁྱུང་པོའི་དྲ་བ།] [ཟླ་ཚེས།:2022-08-03] [རྩོམ་པ་པོ།:ར་མ་ཀུན་བཟང་རྒྱལ་མཚན] [གཟིགས་ཐེངས:]

དུས་མཐའི་མུན་རླུང་ཁྲོད་ཀྱི་འོད་སྒྲོན་རྐང་གཅིག་ཡི་རང་ཆེ། 

1659488590514102.jpg

ལྷ་མོའི་འགྱུར་ཁུག་ངག་ལ་མ་ཞུགས་ཀྱང་།   

དད་པས་གཅུར་བའི་གདུང་ཕྲེང་ཁ་ཧུབ་གང་།  

ཐག་དཀར་སོ་ཡིས་མ་ཐུབ་ཕྱི་ལ་ལུད།  

དབྱིངས་ཀྱི་རྒྱལ་བས་གཟིགས་དཔང་ཆོག་པ་ལཱ།  

སྣང་བ་སྐད་གཅིག་བརྟན་པའི་སྐབས་མེད་པའི།  

སྒྱུ་གཟུགས་མངོན་དུ་སྟོན་པའི་དཔེ་ཟླ་རུ།  

ཁྱེད་སྐུ་ཡུད་ཀྱིས་ཡལ་བའི་སྣང་ཚུལ་དེས།  

རྟག་ཐེར་འཛིན་པའི་འགོང་པོར་འཇིགས་པ་ལཱ།  

འདི་སྣང་བསླུ་འདྲེའི་ཁ་གདང་མིག་བགྲད་པས་།  

དལ་རྟེན་ནོར་བུ་བརླགས་པའི་སྐབས་མ་རྙེད།  

དབེན་སའི་ཕ་ཕོག་ལེན་པའི་རུ་དར་བསྒྲེངས།  

ཚེ་དང་བསྒྲུབ་པ་མཉམ་པས་སྐྱིད་པ་ལཱ།  

ཉམས་ཆུང་ཚད་དང་ལྡན་པས་ཀུན་ཡིད་འཕྲོག། 

འདོད་ཆུང་ཆོག་པར་ཤེས་པས་གཏེར་ཆེན་ཐོབ།  

སྤྱོད་ཆུང་རྒྱལ་སྲས་སྤྱོད་པས་ཤིན་ཏུ་མཛེས།  

བློ་ཆུང་འགྲོ་བའི་དང་ག་འཕྲོད་པ་ལཱ།  

སྣང་བ་སྤང་གཉེན་རྩོད་པ་ཕུགས་སུ་སྟོང་།  

དུག་རླབས་རྩི་རུ་འགྱུར་བས་ཐ་མི་དད། 

ཡེ་གསལ་སྟོང་པའི་ཐིག་ལེར་གཅིག་ཏུ་ཟླུམ་།  

སྤང་བསྒྱུར་གྲོལ་བའི་ཉག་མར་གཤེགས་པ་ལཱ།  

ཞེས་སྒོ་གསུམ་གུས་པས་གླེང་སློང་བའི་ལེའུ་སྟེ་དང་པོའོ།།  


ཁམས་བརྒྱད་སྦས་མངོན་བཀའ་ཡིས་བཅད་པའི་དོན།  

ཐོས་དང་བསམ་པ་བྱས་པའི་ལག་རྗེས་སུ།  

མི་ཞེན་བརྩེ་བ་འགལ་འདུ་མ་སོང་བས།  

སྣང་དང་སྟོང་པའི་བདེན་པ་གཉིས་གཅེས་མཛད། 

དཀར་དམར་སྣང་བའི་གནད་ལ་མི་ཐེབས་པའི། 

རིགས་པའི་མདེལ་སོ་ཚུལ་གསུམ་ཚིག་གིས་བདར།  

རང་ཁའི་བློ་རྟོག་རྗེས་སུ་མ་འབྲང་བས།  

སྣང་མེད་སྟོང་པའི་ཉམས་བཞེས་སྦས་པར་བཞུགས།  

གཡོ་དང་ཟོབ་པས་བཅོས་པར་མ་བྱས་ཤིང་།  

བྱམས་པའི་རང་མདངས་བཀྲ་བའི་ཞལ་ངོགས་ནས།  

སྟོང་པ་སྙིང་རྗེས་ཟིན་པའི་འཛུམ་ཞལ་རེས།  

ཁམས་གསུམ་བརྩེ་བས་སྐྱོངས་དེ་ལྷག་པར་དྲན།  

ཐོས་བྲེད་གོག་པོའི་བློ་སྤྲོས་ཆེས་མང་བས། 

མཐའ་བྲལ་ལྟ་བ་ཚིག་སྤྱིའི་འགྲོས་ལས་བསྐྲུན།  

མཐའ་འཛིན་ནག་པོ་མཆེད་པའི་སྐབས་འདི་རུ།  

མཐའ་མེད་མཉམ་བཞག་ངང་གིས་དཔེ་སྟོན་མཛད།  

ཕྱག་སྐོར་འབྲི་བཞེངས་ཀློག་མཆོད་མཚན་བཅས་དགེ 

ཀུན་མཐུན་ཀུན་ལས་འཕགས་པ་བདེན་པའི་སྟོབས།  

རྙེད་ཐོབ་གྲགས་བདེའི་དྲི་མས་མ་གོས་པ།  

དཔང་པོའི་དཔེ་སྟོན་གཤེགས་པའི་ཤུལ་ནས་བསྟན།   

སྣང་བ་བཞག་ནས་དགག་བྱའི་ཤུན་མ་ཕྱེས།  

དགག་པའི་མུ་ལ་དམིགས་པས་གཏད་མ་བཅས།  

སྣང་བའི་ལྟོས་པ་གཞན་གྱི་ངོར་མ་བཀག   

སྟོན་པའི་བསྟན་པ་འཛིན་ཁྱེད་ཅིས་མི་དྲན།   

    ཞེས་སྤང་ལམ་མདོ་ཡི་བསྟན་པ་རྒྱུད་ཐོག་ཉམས་བཞེས་མཛད་པའི་གཟི་བྱིན་ལ་རྗེས་རང་ཞུས་པའི་ལེའུ་སྟེ་གཉིས་པའོ།།


སྣང་སྟོང་མ་འདྲེས་གཉིས་མེད་ཀུན་གཞི་གྱི་གཞི།  

འཁྲུལ་སྒྲིབ་གོལ་སྐྱོན་བསལ་བའི་ཉམས་བཞེས་མཛད།  

ཡེ་སངས་རྒྱས་པའི་རང་མདངས་རིག་པས་གཟིགས།   

ལྷུན་གྱིས་གྲུབ་པས་བྱས་སྐྱོན་གཞི་ལས་གསལ།། 

གོག་ལམ་ཉུལ་བའི་འགྲོས་ལ་མ་བརྟེན་པས།   

ལོག་དམན་འཆལ་བའི་ལམ་གྱི་སྐྱོན་མ་གོས། 

བསྐལ་པར་བསྲིངས་པའི་རིང་ལམ་འཕྲད་ཀྱིས་བཅད།  

མངོན་སངས་རྒྱས་པའི་ཟབ་ལམ་དངོས་སུ་བགྲོད།།  

གཞན་ལས་མ་ཐོབ་རང་ལས་འབྲས་རྙེད་པས།  

རྫོགས་སངས་རྒྱས་པའི་འབྲས་བུའི་དེ་ཉིད་ཡིན།  

སད་སྟོར་འབྱམས་གསུམ་སྐྱོན་གྱིས་མ་གོས་པར།   

མི་ཕྱད་དད་པ་ཆེན་པོས་བསྟོད་པར་བགྱི།།  

གཞི་ལམ་འབྲས་བུའི་གསང་ཆེན་གསང་བ་མཆོག  

སྣང་མེད་དག་པའི་སྐུ་རུ་མངོན་པར་བཞེངས།  

སྣང་བཅས་སྐུ་བཞིས་འགྲོ་བའི་དོན་ཆེན་མཛད།།

གསང་བ་སྔགས་ཀུན་རྫོགས་པས་རྗེས་ཡི་རང་། 

སྐྱེ་འཆི་བར་དོ་གསུམ་གྱི་འཁོར་ལོ་ཆེ། 

སྐུ་གསུམ་དངོས་སུ་བསྒྱུར་བའི་གསེར་འགྱུར་རྩི།  

བསྒྱུར་ལམ་སྔགས་ཀྱི་འདུས་སོ་དེ་ཀ་རང་།  

རྟོགས་པའི་རྒྱལ་མཚན་ཕྱར་བ་ཁྱེད་ལས་སུ།།   

      ཞེས་བསྒྱུར་ལམ་སྔགས་ཀྱི་དེ་ཉིད་ཐུགས་དམ་མ་རྒྱུད་སངས་རྒྱས་རྒྱུད་གསུམ་ལ་སྐུ་ཚེ་བསྒྲུབ་པ་མཉམ་བཞེས་མཛད་པར་མི་ཕྱད་པའི་དད་མཚོན་ཞུས་པའི་ལེའུ་སྟེ་གསུམ་པའོ།། 


གསལ་དང་སྟོང་པ་རིས་སུ་མ་ཆད་པས། 

སྟོང་པར་སྟོང་པས་མཇལ་བས་བྱ་བྱེད་བྲལ།  

སེམས་ཀྱི་དངོས་པོ་སངས་རྒྱས་ཉིད་དུ་གཟིགས།  

ཡེ་རྟོགས་ཐེག་པའི་རྩེ་མོ་ཁྱེད་ཀྱིས་གཞལ།  

འོད་རིག་འདྲེས་པས་གདོས་ལུས་སྐུ་རུ་གསལ།  

སྒྲ་རིག་མཉམ་པས་ངག་ཚིག་གསུང་དུ་གྲོལ།   

ཟེར་རིག་གཅིག་པས་ཡིད་རྟོག་ཐུགས་སུ་བདལ།  

མཁའ་ཀློང་དབྱིངས་གསུལ་ཐིག་ལེའི་ཉག་མར་གཅིག    

གྲོལ་ལམ་གསང་ཆེན་རྟོགས་པའི་རྒྱལ་ས་ནས།  

རྣལ་འབྱོར་དགོངས་པ་རྫོགས་པའི་སྐྱེས་བུ་དེས།   

བདེན་པའི་དན་རྟགས་ཅོང་རི་བྲག་ལ་བཞག   

སྤྲོ་བའི་ཚིག་ཚོགས་གུས་པོས་ངག་གིས་སྤྲོས།   

     ཅེས་གྲོལ་ལམ་རྫོགས་པ་ཆེན་པོའི་དགོངས་རྟོགས་ཉམས་བཞེས་མཛད་པར་རྗེས་སུ་ཡི་རང་ཕུལ་བའི་ལེའུ་སྟེ་བཞི་པའོ།།   


འཕན་ཡུལ་མདོ་སྡེའི་བཀའ་ཡི་ཁོང་གསེང་ནས།  

མཐའ་བྲལ་ལྟ་བའི་གདམས་ཟབ་རྫ་ལྟར་ཉིལ།  

གཞན་རྗེས་དྲི་མས་བྲིད་པའི་རྟོག་ཉུལ་བ།  

མདོ་དགོངས་མ་རྟོགས་ཁ་བལྟའི་མཁས་མང་བརྡོལ།

སྔར་སྲོལ་ཟབ་མོའི་བྱིན་ངད་འཐུལ་བའི་རླབས།  

རང་རྒྱུད་ཕབས་པས་གཞུང་ལ་དཔྱད་མཐར་འཇོག  

མི་བདེན་སྣང་བ་བཀག་པའི་སྟོང་མཐའ་རུ།  

ལྟ་མཆོག་འཛིན་པའི་རྟོག་རྒྱུན་ཆོད་གྱུར་ཅིག   

གསང་ཆེན་སྔགས་ཀྱི་ཡི་དམ་ལྷ་ཡི་སྐུ།

སྣང་བ་འདི་ཡི་གཤིས་སུ་མ་གཏོགས་པར།    

ཞལ་སྤྱན་བགྲད་པའི་ལྷ་མཆོག་གཞན་ནས་བསུ།  

བསྙེན་སྒྲུབ་རྩོལ་བ་དངོས་འཛིན་དྲྭ་བས་བཅིངས།   

འདི་སྣང་དངོས་པོ་འབྱུང་བའི་ཁུངས་བཅར་ན།   

རང་སེམས་རིག་པ་གསལ་སྟོང་མདངས་སུ་ཡལ།  

གཅིག་བལྟས་ཀུན་མཐོང་ལྷ་རུ་ངོ་འཕྲོད་པས།   

ཕྱི་ནང་གསེར་འགྱུར་རྩི་ལྟར་འགྱུར་བར་སྨོན།  

དྲན་པ་མི་ངོར་བཞེངས་པའི་བྱིན་ཀྱི་རླབས།  

རྡོ་རུས་འཕྲོད་པའི་རྣལ་དུ་མ་འབྱོར་བས། 

དུས་ཀྱིས་རྙོགས་པའི་འཆད་རྩོད་རྩོམ་པ་ཕལ།  

སྤང་སྡུད་ཞེན་པའི་འཕྲང་སོ་གསུམ་ལ་གག   

དཔའ་བོ་རྒྱ་མཚོ་དབུས་ནས་ལྷང་ངེ་བ།  

རྒྱལ་ཀུན་ངོ་བོ་དྲན་པ་ནམ་མཁའ་མཁྱེན།   

གསང་ཆེན་ཡང་རྩེ་བླ་མེད་དགོངས་ཟབ་མཆོག  

སྐད་ཅིག་ཐོགས་བབ་ཆེན་པོར་བྱིན་གྱིས་རློབས།   

ཨ་ཨོཾ་ཧཱུཾཿ    གྱེར་སྤུངས་དྲན་པ་མུ་ལ་ཉེ་ལོ་ཡོ་ཧཱུཾ་འདུ།    

     ཞེས་སྤང་སྒྱུར་གྲོལ་གསུམ་གྱི་འདུས་སོ་བླ་མ་གཅེས་པའི་སྨོན་པར་འདུན་པས་མཐའ་བསྡོམས་པའི་ལེའུ་ལྔ་པའོ་རྫོགས་སོ།།

1659489221226656.jpg

          ཞེས་པ་མདོ་སྔགས་སེམས་གསུམ་གྱི་དགོངས་རྟོགས་ཚུལ་བཞིན་ཉམས་སུ་བླངས་པའི་དགེ་བའི་བཤེས་གཉེན་ཆེན་མོ་གར་རྩ་གཡུང་དྲུང་རྒྱལ་མཚན་རིན་པོ་ཆེ་སྐུ་མི་རྟག་དགོངས་པ་དབྱིངས་སུ་བསྡུས་སྐབས།  རྗེས་ཚོར་དྲག་པོ་སྐྱེས་པའི་དུང་འབོད་ཅིག་སྒོ་གསུམ་གུས་པ་ཆེན་པོས་མདོ་སྔགས་སེམས་གསུམ་དང་འབྲེལ་བའི་རང་ཚོད་དཔགས་པའི་སྟོབས་ལས།  རྒྱལ་བའི་བཀའ་འགྱུར་རིན་པོ་ཆེ་ལུང་རྒྱུན་ཐེངས་གཉིས་པ་མཐོང་གྲོལ་རི་ཁྲོད་དུ་ཡོངས་སུ་གྲུབ་པའི་རྟེན་འབྲེལ་བཟང་པོའི་དུས་དང་འབྲེལ་གུས་པོ་ར་མ་ཀུན་བཟང་རྒྱལ་མཚན་དུ་འབོད་པས་མཐོང་གྲོལ་རི་ཁྲོད་དགོན་གྱི་འདུས་གླིང་ནས།    འབྱུང་ལྡན་༣༠༡ རབ་བྱུང་༡༧  བོད་ཆུ་སྟག ཧོར་ཟླ ༥  ཚེས  ༣༠   2022-7-28. ཉིན། 




སྐད་འཇོག་རེའུ་མིག

འདྲེན་སྐོལ། དཔྱད་གཏམ(0)ཡོད།