ཁྱུང་པོ་དཀའ་ནག་སེར་གསུམ་གྱི་ནང་གསེས་གསེར་རྩ་ཚྭ་ནེ་རི་ཁྲོད་དུ་སྒྲུབ་བརྒྱུད་བསྟན་པའི་སྲོལ་ཆེན་ཚུགས་ནས། མི་ལོ་ཧྲིལ་པོ་བཞི་ཡི་ཡུན་ལ་སྒྲུབ་གྲྭའི་བཅའ་བཀོད་ཇི་བཞིན་ཚོགས་བསགས་སྒྲིབ་སྦྱོང་དང་། སེམས་དོན་ཉམས་ལེན། ཐུན་མོང་དང་ཐུན་མིན་གཞུང་ལུགས་ཁག་ལ་སྦྱངས་བརྩོན་བྱས་པའི་འབྲས་རྟགས་གང་འཚམ་གྲུབ་སྟེ། ལོ་འདིའི་སྤྱི་ཟླ་བདུན་པའི་ཚེས་པ་གཉིས་ཉིན་དགོན་པའི་རྣམ་རྒྱལ་སྟོང་མཆོད་བསྒྲུབ་པ་འཚོགས་པའི་དུས་ཚོད་དང་བསྟུན་ནས་གཤེན་གྱི་སྒྲུབ་ཐོན་མའི་སྐལ་བཟང་དགྱེས་སྟོན་མཛད་སྒོ་འཚོགས་རྒྱུའི་སྐལ་པ་ཤར།
སྤྱི་ཚེས་ལྔ་ཉིན་མོར་ཁྱུང་དགོན་ཁྲི་འཛིན་བླ་མ་ཚོགས་གཉིས་རྒྱ་མཚོ་ནོར་བུ་རིན་པོ་ཆེ་མཆོག འདུས་པ་ཡོངས་ཀྱིས་ཆིབས་བསུ་སེར་འཕྲེང་ཞུས་ནས་དགོན་འདིའི་སྒྲུབ་གྲྭའི་མཛད་སྒོ་ཚོགས་མགོན་དུ་ཞབས་ཟུང་གསེར་གྱི་འཁོར་ལོ་བདེ་བར་བསྒྱུར།
སྤྱི་ཚེས་དྲུག་ཉིན་ཆུ་ཚོད་བཅུ་པའི་ཐོག་ལ་མཛད་སྒོ་དབུ་ཚུགས་པ་དང་། གཤེན་གྱི་སྒྲུབ་ཐོན་པ་སུམ་བཅུ་སོ་གསུམ་གྱི་ནང་མི་སྤུན་མཆེད་རྣམས་ཀྱིས་གཏོང་སྒོ་ལྷ་མི་ཚིམས་པར་ཕུལ་ཞིང་། ཕྱོགས་གཞན་བསྟན་པའི་སྦྱིན་བདག་རྣམས་ཀྱིས་ཀྱང་མཆོག་གསུམ་རྒྱལ་བ་དགྱེས་པའི་གཏོང་སྒོ་ཕུན་སུམ་ཚོགས་པར་བཤམས།
དཔལ་ལྡན་བཟང་མོས་སྡེ་སྣོད་མཛོད་ངག་རྒྱུགས་འབུལ་བཞིན་པ།
སྦྱིན་པ་བྱམས་མས་བོན་འཆད་མཁས་པའི་མགུལ་རྒྱན་ངག་རྒྱུགས་འབུལ་བཞིན་པ།
མཐོང་གྲོལ་བཟང་མོས་ལམ་རིམ་སུམ་བརྒྱ་པ་ངག་རྒྱུགས་འབུལ་བཞིན་པ།
ཚུལ་ལྡན་དཔལ་མོས་བོན་འཆད་མཁས་པའི་མགུལ་རྒྱན་ངག་རྒྱུགས་འབུལ་བཞིན་པ།
བསོད་ནམས་བཟང་མོས་རྒྱུད་བུ་ཆུང་བཅུ་གཉིས་ངག་རྒྱུགས་འབུལ་བཞིན་པ།
བཟོད་པ་བྱམས་མས་བོན་འཆད་མཁས་པའི་མགུལ་རྒྱན་ངག་རྒྱུགས་འབུལ་བཞིན་པ།
བདེ་ཆེན་ལྷ་མོས་ལམ་རིམ་སུམ་བརྒྱ་པ་ངག་རྒྱུགས་འབུལ་བཞིན་པ།
ཤེས་རབ་དཔལ་ལྡན་གྱིས་འཆད་རྒྱུགས་སྤེལ་བཞིན་པ།
སྤྱི་ཚེས་བདུན་ཉིན་གྱི་དྲོ་གཞུང་རྗེ་བླ་མ་ཚོགས་གཉིས་རྒྱ་མཚོ་ནོར་བུ་མཆོག་གིས་སྒྲུབ་ཐོན་པ་རྣམས་ལ་མཚན་རྟགས་དང་ཕྱག་ཁྱེར་བསྩལ་བ་དང་། བསྟན་སྲིད་སྐྱོང་སྟངས་ལ་སྨར་བའི་བཀའ་སློབ་ཟབ་རྒྱས་གནང་བ་དང་། དུས་ཚོད་བར་གླགས་གང་ཡོད་ནས་དད་དམ་གཡོ་མ་མེད་པའི་བསྟན་པའི་སྦྱིན་བདག་མང་པོས་སྐུ་འགྱེད་དང་མང་ཇ་གྲ་རྒྱས་པོ་ཕུལ། ཕྱི་དྲོར་མཁན་མོ་རྣམ་དག་སྦྱིན་པ་བྱམས་མ་དང་། ཚུལ་ཁྲིམས་དཔལ་ལྡན་བཟང་མོ་གཉིས་གཙོས་པའི་སྒྲུབ་ཐོན་པ་རྣམས་ཁྲི་བཞེངས་མཛད་དང་། སྒྲུབ་པ་ཟབ་མོའི་གཞུག་སྤྱི་ཚེས་དགུ་ཉིན་ཞོགས་ཀ་ལྷ་སྡེ་རྣམས་ཀྱིས་རི་བསྟོད་བསང་གསོལ་བྱས་ཤིང་། ཕྱི་དྲོར་སྟེང་དགོན་བླ་མ་ཚོགས་གཉིས་རྒྱ་མཚོ་ནོར་བུ་མཆོག་དང་། མཐོང་གྲོལ་རི་ཁྲོད་དགོན་གྱི་དཔོན་སློབ་མཁས་དབང་ཀུན་བཟང་རྒྱལ་མཚན་ཟུང་གིས་ལྷ་སྡེ་སེར་སྐྱ་ཡོངས་ལ་ཀློང་རྒྱས་བཀའ་དབང་བསྩལ་བ་དང་། དགེ་སྡིག་སྤངས་བླངས་ཀྱི་བསླབ་བྱ་གནང་ནས། རྣམ་རྒྱལ་སྒྲུབ་པ་དང་སྒྲུབ་ཐོན་མཛད་སྒོ་གཉིས་ཀ་མགོ་མཇུག་ཚང་མ་བཀྲ་ཤིས་བདེ་ལེགས་ངང་ནས་མཇུག་གྲུབ་པའོ།།
