རི་དགོན་གཤེན་བསྟན་གཡུང་དྲུང་བསྟན་གྲགས་གླིང་དང་ལྷ་སྡེ་ཟུང་ནས་༧སྐྱབས་རྗེ་ཡོངས་འཛིན་སྨྲ་བའི་སེང་གེའི་ཞབས་བརྟན་སྒྲུབ་པ།
ཨེ་མ་ཧོ།
བསླབ་གསུམ་བསྟན་པའི་བདག་ཉིད་འགྲོ་བའི་མགོན།།
ཀུན་མཁྱེན་ཉི་དབང་རྣམ་རོལ་དགོངས་རྩལ་རྫོགས།།
མདོ་སྡེ་སྔགས་ཀྱི་གནས་ལུགས་རྫོགས་པ་ཆེའི།།
བསྟན་པ་འཛིན་སྐྱོང་འཕྲིན་ལས་རྣམ་པར་དག །
ཡོངས་འཛིན་སྨྲ་བའི་དབང་པོར་གསོལ་བ་འདེབས།།
སྤྱི་ལོ་ ༢༠༢༡ ཟླ་ ༧ པའི་ཚེས་ ༡ ནས་ཚེས་ ༤ བར་ཉིན་གསུམ་གྱི་རིང་ལ་ངེད་རི་ཐ་ངང་ཚང་དགོན་ནམ་དཔལ་གཤེན་བསྟན་གཡུང་དྲུང་བསྟན་གྲགས་གླིང་གི་འདུས་པ་སྤྱི་དང་རང་གྲོལ་བླ་མའི་སྒྲུབ་སྡེ་ཡང་རྩེ་གླིང་གཉིས་ཟུང་ནས་༧སྐྱབས་རྗེ་ཡོངས་འཛིན་སྨྲ་བའི་དབང་པོ་རིན་པོ་ཆེའི་སྐུ་ཚེའི་འགལ་རྐྱེན་མཐའ་དག་རྩད་ནས་ཞི་ཞིང་ཞབས་པད་བསྐལ་བརྒྱར་བརྟན་པ་དང་། སྐུ་ཡི་སྙུང་གཞི་མི་རིང་མྱུར་དུ་དྭངས་སླད་དུ་བསྟན་སྲུང་གཙོ་མོ་མ་མཆོག་སྲིད་པའི་རྒྱལ་མོའི་ཚོགས་མཆོད་རྒྱས་འབུལ་དང་ཡི་དམ་ཕྱི་ནང་གསང་གསུམ་གྱི་བསྐང་འབུམ་ལྷ་དང་སྲུང་མའི་ཚོགས་ལ་བསྐང་གསོལ་འཕྲིན་བཅོལ་ཞུས་པ་དང་དགོན་གྱི་ལྷ་སྡེ་ཐུན་མོང་གི་ཡོངས་འཛིན་བླ་མའི་ཞབས་བརྟན་གླིང་ཞེས་པའི་དྲྭ་ཚོམས་ནང་དུ་ཁ་ཡོད་ལག་ཡོད་ཀྱིས་སྒོ་ནས་སྒྲུབ་ཟིན་པའི་ནོར་ཆེ་ཆུང་ ༣༠ ཚེ་ཐར་བཏང་བ་དང་ཚེ་དབང་མཆོག་འདུས་ཚེ་སྒྲུབ་བྱ་རི་མའི་སྙིང་པོ་གྲངས་ ༡༤༨༢༥༢ ཞབས་བརྟན་གསོལ་འདེབས་གྲངས་ ༡༡༤༦༨༣ བར་ཆོད་ལམ་སེལ་ཚར་ ༨༨༨ བཅས་གྲུབ་པ་ལགས་པས།
རྣམ་དཀར་དགེ་བའི་མཐུ་སྟོབས་ཀྱིས་རྗེ་མ་བླ་མའི་སྐུ་ཚེའི་འགལ་རྐྱེན་ཐམས་ཅད་ཉེ་བར་ཞི་ཞིང་བསྟན་འགྲོ་སྤྱི་ཡི་མགོན་དུ་བརྟན་པར་བཞུགས་ཤིང་སྐུ་ཚེ་བསྐལ་བརྒྱར་བརྟན་པའི་གསོལ་སྨོན་ལན་བརྒྱར་འདེབས་པ་དང་སྡེ་དགོན་གཉིས་ཀྱི་བླ་གྲྭ་བོན་གཤེན་སེར་སྐྱ་ཕོ་མོ་ཡོངས་རྫོགས་སྐྱབས་རྗེ་བླ་མ་མཆོག་གིས་ཐུགས་རྗེས་ཟིན་པའི་རྒྱུ་རུ་ཤོག་ཅིག་གུ།
