ཁྱུང་པོ་སྟེང་ཆེན་དགོན་ནས་༧སྐྱབས་རྗེ་ཡོངས་འཛིན་སྨྲ་བའི་དབང་པོ་རིན་པོ་ཆེའི་ཞབས་བརྟན་དུ་སྲིད་རྒྱལ་དྲག་སྔགས་དབལ་མོ་སོགས་ཀྱི་ཚོགས་མཆོད་རྒྱས་འབུལ་ཞུས་པ།

ཨེ་མ་ཧོ།  

བསླབ་གསུམ་བསྟན་པའི་བདག་ཉིད་འགྲོ་བའི་མགོན།།

ཀུན་མཁྱེན་ཉི་དབང་རྣམ་རོལ་དགོངས་རྩལ་རྫོགས།།

མདོ་སྡེ་སྔགས་ཀྱི་གནས་ལུགས་རྫོགས་པ་ཆེའི།།

བསྟན་པ་འཛིན་སྐྱོང་འཕྲིན་ལས་རྣམ་པར་དག །

ཡོངས་འཛིན་སྨྲ་བའི་དབང་པོར་གསོལ་བ་འདེབས།།

          སྤྱི་ལོ་༢༠༢༡ཟླ་༦པའི་ཚེས་༣༠ཉིན་ཁྱུང་པོ་སྟེང་ཆེན་དགོན་ནས་སྙིགས་དུས་བསྐལ་ཁུག་གི་སྟོན་པ་ཆེན་པོ་གསང་གསུམ་བོན་གྱི་མཛོད་འཛིན་༧ སྐྱབས་རྗེ་ཡོངས་འཛིན་སྨྲ་བའི་དབང་པོ་རིན་པོ་ཆེའི་སྐུ་ཚེའི་འགལ་རྐྱེན་མཐའ་དག་རྩད་ནས་ཞི་ཞིང་འགྲོ་བ་ལྷ་དང་བཅས་པ་བསྟན་འགྲོ་སྤྱི་ཡི་མགོན་དུ་ཞབས་པད་བསྐལ་བརྒྱར་བརྟན་པ་དང་།  སྐུ་ཡི་སྙུང་གཞི་མགྱོགས་མྱུར་དྭངས་སངས་ཡོང་སླད་ཞབས་བརྟན་དུ།  དཔོན་སློབ་རིན་པོ་ཆེ་རྒྱལ་བ་བསྟན་འཛིན་མཆོག་བཙོས་བཤད་སྒྲུབ་འདུས་སྡེའི་དགེ་སློབ་ཡོངས་ཀྱིས་ཞོགས་པ་ཆུ་ཚོད་7.30ནས་དགོང་མོའི་ཆུ་ཚོད་7པའི་བར་སྲིད་རྒྱལ་དྲག་སྔགས་དབལ་མོའི་ཚོགས་འཁོར་རྒྱས་འབུལ་ཞུས་པ་དང་། 

          གཞན་ཡང་མ་བདུད་བཙན་རྒྱལ་སོགས་ལྷ་སྲུང་སྤྱི་ལ་མཆོད་ཚོགས་ཕུལ་ཏེ་ནན་ལྟར་གྱིས་འཕྲིན་བཅོལ་ཞུ་བཞིན་པ་ལགས་ན།  མཆོག་གསུམ་བསླུ་བ་མེད་པའི་བདེན་སྟོབས་དང་རྣམ་དཀར་དགེ་ཚོགས་ཀྱི་མཐུས་རྗེ་བླ་མའི་སྐུ་ཚེའི་འགལ་རྐྱེན་ཐམས་ཅད་ཉེ་བར་ཞི་ཞིང་བསྟན་འགྲོ་སྤྱི་ཡི་མགོན་དུ་ཞབས་པད་གཡུང་དྲུང་གི་ཁྲི་རུ་བསྐལ་བརྒྱར་བརྟན་པའི་གསོལ་སྨོན་ལན་བརྒྱར་འདེབས་སོ།།   

ཁྱུང་པོ་སྟེང་ཆེན་དགོན་གྱི་བཤད་སྒྲུབ་འདུས་སྡེ་ནས།