སྤྱི་ལོ2020-9-16ཉིན་གྱི་ཕྱི་དྲོ་ཕྱག་ཚོད་གཉིས་པའི་ཐོག བཤད་གྲྭའི་སློབ་དཔོན་རིན་པོ་ཆེ་དང་། སྒྲུབ་གྲྭའི་མཁན་རིན་པོ་ཆེ་རྣམ་གཉིས་དབུས། བཤད་སྒྲུབ་སྒོམ་གསུམ་གྱི་དབུ་འཛིན་དང་དགེ་རྒན། དེ་བཞིན་བཤད་སྒྲུབ་སྒོམ་གསུམ་གྱི་འདུས་མང་ཡོོངས་དང་བཅས་བཀའ་འབུམ་རབ་རྒྱས་ཁང་དུ་ཟླ་འཁོར་གྱི་བགྲོ་གླེང་དབུ་བཙུགས།
ཐེངས་འདིའི་བགྲོ་གླེང་ཐོག་བགྲོ་གླེང་པ་ཁྱོན་བསྡོམས་མི་བཅུ་གཉིས་ཞུགས་ཡོད་པ་དང་། དེ་ཡང་སོ་སོ་རང་ཉིད་ཀྱི་ཐུན་མོང་མ་ཡིན་པའི་རྣམ་དཔྱོད་དང་ཤེས་རབ་ལས་འཁྲུངས་པའི་དཔྱད་རྩོམ་རྣམ་དག་སྟེ། ཁུ་བྱུག་གྱི་གསུང་ལྟར་མཉན་ན་རྣ་བར་སྙན་པ། ཉམས་འགྱུར་གྱིས་ཕྱུག་པ་བལྟས་ན་མིག་ལ་མཛེས་པ། བརྗོད་གཞི་ཆེ་བ་མདོ་སྔགས་རྫོགས་གསུམ་དང་སྙན་ངག་ལ་སོགས་པའི་ནང་སྙིང་བཟུང་བ། རྗོད་བྱེད་ཀྱི་ཚིག་འགྲིག་པ་མེ་ཏོག་གི་རུ་ཕྲེང་ལྟར་ཡག་པ།
དེ་ལྟར་མི་རེ་རེའི་དཔྱད་རྩོམ་ལ་གཞིགས་ན་བརྗོད་སྙིང་བརྗིད་ཆེ་བ། ལུང་རིག་གི་ཁུངས་བཙུན་པ། ཤེས་རབ་ཀྱི་རྩེ་རྣོ་བ། རྒྱབ་ལྗོངས་ཀྱི་དཔུང་མཐུག་པ་སོགས་ཟླ་འདིའི་བགྲོ་གླེང་ནི་ཧ་ཅང་སྤུས་གཙང་ལ་གོ་བདེ་བ། འཛུམ་དགོད་སྒྱུ་རྩལ་གྱིས་ཁེངས་པ་བཅས། ཟླ་འཁོར་བགྲོ་གླེང་ཐེངས་བཞི་པ་འདི་ཁ་དགེ་བཀྲ་ཤིས་ངང་ནས་མཇུག་ལེགས་པར་གྲུབ་བོ་ཅེས་ཁྲི་རིག་པའི་མདས།