༄༅། །ངེད་དྲ་བར་ཕེབས་པར་དགའ་བསུ་ཞུ།
དེ་རིང་ནི་སྤྱི་ལོ 2020 ལོའི་ཟླ 5 ཚེས 30
དྲ་གནས་ཉར་ཚགས།   གཙོ་ངོས་སུ་འགོད་པ།
中文   |   English   |   བོད་ཡིག
ཕྱོགས་སྟོན།:  གཙོ་ངོས། > རྩོམ་རིག > 5 ཤིས་ཚིག
5 ཤིས་ཚིག
༣ དཔོན་གསས་བླ་མ་མཆོད་པའི་སྤྲིན་ཚོགས།
[རྩོམ་ཁུངས།:ཁྱུང་པོ་དྲྭ་བ།] [ཟླ་ཚེས།:2020-01-28] [གཟིགས་ཐེངས:]

微信图片_20200128155943.jpg


སེམས་གཏད་སའི་ལྷ་སྐལ་བརྟན་དུ་ཤོག།


  ལྷ་ལྡོང་ཚུལ་ཁྲིམས།


ཡུལ་མཐོ་སྒང་གི་གངས་དཀར་ཏི་སེ་རུ།།

ཡབ་ཐོད་དཀར་གྱི་རྒྱལ་སྲས་ཞབས་རྗེས་ལ།།

དུས་རྣམ་ཀུན་ཏུ་ཐུགས་སེམས་དཀར་བའི་རྗེ།།

བོན་ཀུན་མཁྱེན་གྱི༧སྨྲ་སེང་དཀར་པོ་བརྟན།།


ཚུལ་དང་པོ་རུ་སྣོད་ལྡན་སློབ་མ་བྱས།།

མགོན་བཤེས་གཉེན་མཆོག་མིག་སྙིང་སྲོག་བས་གཅེས།།

གཞུང་སྡེ་སྣོད་ལ་རྒྱ་ཆེའི་ཐོས་བསམ་དང་།།

བཀའ་སྒོ་མཛོད་ཀྱི་ཟབ་གནད་གསེད་བཀྲོལ་བྱས།།


གཞན་འགྲོ་བའི་དོན་འཆད་རྩོད་རྩོམ་པའི་ཕུལ།།

མཐར་བདེ་ཆེན་དོན་ཐོས་བསམ་སྒོམ་པ་ཟབ།།

སྤྱིའི་དོན་ཆེན་ལ་མཁས་བཙུན་བཟང་གསུམ་ཅན།།

བོན་འགྲོ་བ་སྤྱིའི་འདི་ཕྱིའི་ལྷ་སྐལ་ཡིན།།


ཕྱི་སྤྱི་གཅོད་ཀྱི་ལྟ་བའི་ཁེབས་རྒྱ་ཆེ།།

ནང་མན་ངག་གི་སྒྲོན་མའི་རང་མདངས་གསལ།།

བློ་སྤྲོས་བྲལ་གྱི་རང་རིག་རྗེན་གཅེར་མཐོང་།།

བོན་ཡང་རྩེ་ཡི་ལྟ་བའི་ཕུགས་རྩ་ཆོད།།


ཟབ་གསང་ཆེན་གྱི་རིམ་གཉིས་དབང་འབྱོར་ཞིང་།།

མདོ་ཕར་ཕྱིན་གྱི་སྤྱོད་པས་ཀུན་ཡིད་འཕྲོགས།།

གནས་མི་ཡུལ་གྱི་རྒྱལ་གཉིས་དངོས་བྱོན་བ།།

སེམས་གཏད་ས་ཡི་ལྷ་སྐུ་གསོན་པོ་ཡིན།།


བོན་དགུ་ཐེག་གི་མཁའ་ལྡིང་སྤྱི་གཅོད་དང་།།

རྗེ་སྨན་རི་བའི་ཡོངས་འཛིན་དཔོན་གསས་ཆེ།།

ཁྲིད་དབང་ལུང་གི་རྒྱུད་གསུམ་རྒྱུན་ཐུག་ས།།

མེས་དྲིན་ཅན་ཚོ་མཐོང་བའི་རྡོ་རིང་ཡིན།།


གཤེན་བསྟན་པ་དང་འགྲོ་བའི་བདེ་དོན་ལ།།

སྲོག་འབེན་བཙུགས་ཀྱི་གཡུང་དྲུང་དཔའ་བོ་དང་།།

བྱེས་ཁ་འཐོར་གྱི་གྱེར་འབང་ཡུལ་གྱར་ཚོའི།།

ཕྱིའི་གནས་མལ་དང་ནང་གི་འཚོ་རྟེན་ཡིན།།


ས་གོ་ལ་ཡི་ཤར་ལྷོ་ནུབ་བྱང་དུ།།

ཚད་མེད་པ་བཞིའི་ཐུགས་རྗེའི་རྒྱུན་བསྲིངས་ནས།།

ལས་རྣམ་བཞི་ཡི་མཛད་པ་རྒྱ་ཆེན་གྱིས།།

འཁོར་སྡེ་བཞི་ལ་སེམས་ཀྱི་དཔལ་ཡོན་བྱིན།།


སྐུ་དབུ་ལྕང་དེ་བོན་གྱི་དོན་དུ་དཀར།།

གསུང་འགག་མེད་དེ་འགྲོ་ཀུན་རྣ་བར་སིམས།།

ཐུགས་བདེ་གསལ་དེ་འཁོར་འདས་སྤྱི་ལ་ཁྱབ།།

གཞན་དོན་མཛད་ཀྱི་རྒྱལ་སྲས་སེམས་དཔའ་རྗེ།།


དུས་བསྐལ་པ་འདི་ཇི་སྲིད་མ་སྟོང་བར།།

ཞིང་ལྷོ་གླིང་གི་སྲིད་ཞིའི་མཆོད་སྡོང་དུ།།

སྐུ་མི་འགྱུར་བ་གཡུང་དྲུང་གཟུགས་སུ་བརྟན།།

གསུང་མ་འགགས་པ་ལྷ་རྒོད་ཐོག་པས་སྐྱོངས།།

ཐུགས་མི་གཡོ་བ་བོན་སྐུའི་ངང་མཉམ་ཤོག།


ཅེས་རྗེ་ཡོངས་འཛིན་བླ་མའི་དགུང་གྲངས་གོ་ལྔའི་མཚོན་དོན་དུ་ཤོ་ལོ་ཀ༩དང་རྐང་པ༥ཡི་ལུས་སུ་གྲུབ་པའི་ཚིག་བཤད་འདི་འདྲེན་མཆོག༧སྨྲ་བའི་སེང་གེ་ཞལ་མཇལ་གསུང་ཐོས་ཙམ་ལས་ཡུན་རིང་བསྙེན་པའི་སྐལ་པ་མ་གྱུར་ཡང་བདག་གི་དགེ་བའི་བཤེས་གཉེན་རྣམ་པའི་བཀའ་དྲིན་ལས་གང་གསུང་མདོ་རྒྱུད་རྒྱ་མཚོའི་དགོངས་བཅུད་ལ་ལོངས་སུ་སྤྱོད་པའི་བསོད་ཅན་ཁྱུང་སྟེང་དགེ་མིང་པ་ལྷ་ལྡོང་ཚུལ་ཁྲིམས་ཀྱིས་མི་མཆོག་བླ་མའི་དགུང་སྟོན་བརྟན་བཞུགས་སུ་གཤེན་གྱི་འབྱུང་ལྡན༣༠༡རྒྱལ་ཟླ་བའི་ལོ་སར་ཚེས་པ༡

སྤྱི་ལོ༢༠༢༠/༡/༢༥ཉིན་གསོལ་བ་འདེབས་བཞིན་ཕུལ།།



འོད་ཀྱི་བགྲེས་པོ།


                         ལྷ་ཆ།


འགྲུས་སྐྱོང་སྐྱ་མདའི་རྟིང་མར།།

མཁྱེད་དཔྱོད་ཉི་མ་འཛུམ་སྟེ།།

གསང་གསུམ་བོན་ཆར་འུབས་པའི།།

གཤེན་བསྟན་སྣང་བའི་ཕྱག་མཛོད།།


དབུ་ལོ་ཉག་མ་རེ་དང་།།

ཞལ་གྱི་སུལ་མ་རེ་ལ།།

བསྟན་འགྲོའི་ཁ་ཡིག་གསལ་བའི།།

སྨྲ་དབང་སྲིད་པའི་སྒྲོན་མེ།།


ངང་བཟང་ཐུགས་ཀྱི་རྟ་ཕོ།།

ངེས་ལྕགས་ཀྱིས་བསྐུལ་བས།།

ངུར་སྨྲིག་སྲིད་པའི་གོ་ཞུབ།།

སྐུ་ཚེའི་ནོམ་པར་བཀྲབ་ཡོད།།


དུས་འགྱུར་སྤྲིན་པའི་ཡོལ་བ།།

ཀླད་ཀྱི་ནམ་མཁར་བྲེས་ཚེ།།

ཧི་མ་ལ་ཡི་རི་རྒྱུད།།

བཟོད་དང་གོམ་པས་བགོམས་ཡོདར།།


ལ་འདིའི་ཕར་རོལ་ཞིག་ན།།

ཡུལ་འདིའི་ཕར་ངོས་ཤིག་ན།།

གཤེན་གྱི་གསོམ་ཤིང་སྡོང་པོ།།

སླར་ཡང་སྲིད་འདིར་བཀན་སོང་།།


དབུ་ལ་གངས་ལོ་འཚེར་ཡང་།།

ཞལ་ལ་མུ་ཏིག་བསྟར་བ།།

སྲིད་པར་བཞི་ཤད་འཇོག་པའི།།

གསེར་གྱི་སྨྲ་ལྕེ་རིང་མོ།།



ཁྱེད་ཞལ་ཉི་མའི་དཀྱིལ་འཁོར།།

ཁྱུང་ཡུལ་མཐིལ་ནས་འཁོར་ཡང་།།

མཛད་ཕྲིན་སྣང་བ་དཀར་པོ།།

སྲིད་པའི་ཁྱོན་ལ་བརྡལ་ཡོད།།


བསྟན་པའི་ཀ་བ་ཡིན་པའི།།

འགྲོ་བའི་དམིགས་བུ་ཡིན་པའི།།

མིག་སྙིང་སྲོག་གི་ཆ་ཡ།།

ང་ཡི་མཆོག་གསུམ་གཅིག་ཆོག །


ཐུགས་བསྐྱེད་གནམ་གྱི་ལྡིང་གུར།།

མཛད་འཕྲིན་ས་ཡི་ཁེབས་གཅོད།།

ཤར་མཐའི་ཉི་མར་ཁྲེམས་པས།།

གོ་ལའི་གདགས་སྲིབ་དྲོས་བྱུང་།།


གོ་ལྔའི་ཁྲི་འཕང་རྩེན་པའི།།

སྐུ་ཚེའི་གླེགས་བམ་མཐུག་པོ།།

རྣམ་དཔྱོད་སྒྲོན་མེས་བཀླགས་ན།།

ཕན་བདེའི་ཡིག་འབྲུས་བཞེངས་སོ།།


ཕྱིར་ཞིང་མཚན་དཔེའི་ཉི་ཟླ།།

གཡུང་དྲུང་གཤིས་སུ་གྲུབ་སྟེ།།

བསྐལ་བརྒྱའི་རི་བོའི་སྤོ་ནས།།

འགྲིབ་མེད་བརྟན་པར་འཆར་ཤོག །


2020/1/26




སྐད་འཇོག་རེའུ་མིག

འདྲེན་སྐོལ། དཔྱད་གཏམ(0)ཡོད།