༄༅། །ངེད་དྲ་བར་ཕེབས་པར་དགའ་བསུ་ཞུ།
དེ་རིང་ནི་སྤྱི་ལོ 2019 ལོའི་ཟླ 7 ཚེས 17
དྲ་གནས་ཉར་ཚགས།   གཙོ་ངོས་སུ་འགོད་པ།
中文   |   English   |   བོད་ཡིག
ཕྱོགས་སྟོན།:  གཙོ་ངོས། > རྩོམ་རིག > 2 སྙན་རྩོམ།
2 སྙན་རྩོམ།
མདང་དགོང་གི་ནམ་ཕྱེད་སྙན་ངག
[རྩོམ་ཁུངས།:ཁྱུང་པོ་དྲྭ་བ] [ཟླ་ཚེས།:2019-02-19] [རྩོམ་པ་པོ།:ཁྱུང་བསོད་བློ། ] [གཟིགས་ཐེངས:]
  1. མདང་དགོང་གི་ནམ་ཕྱེད་སྙན་ངག



  2. ཁྱུང་བསོད་བློ། 


  3. ༧ ཟླ་བས་རྔ་ཟོར་བརྐྱངས་པའི་སྤྲིན་དཀར་འོག།
    སྐར་ཁྱུ་འཁྱགས་འདར་ཤོར་བའི་མུན་མཐའ་ནས།།
    སྲིན་བྱས་འོག་ལྟས་བྱས་པའི་ཅོང་བརྡ་གྲགས།།
    ཐོས་འཛིན་སྦུག་ལ་བྲག་ཆ་ཉེ་བར་བཅར།།


  4. ཁྱི་འཁྱམས་གྱང་གི་ལོགས་ནས་ཟུག་སྐད་འཐེན།།
    ལེ་ལོའི་སྐྱིད་ཉལ་དཀྲོག་ལ་ལན་མང་བཙིར།།
    ཀུན་གཞིའི་པང་ནས་བག་ཆགས་ཧར་སད་རྒྱག།
    འཁྲུལ་སྣང་རྨི་ལམ་སྟོང་པས་རྒྱལ་ཁམས་སྐོར།།


  5. ལུང་པའི་གྲམ་ཐང་སྒང་ནས་ཆུ་ཆུང་བཞུར།།
    ཚང་ཚིང་ཡིད་ཀྱི་གན་དུ་རྣམ་རྟོག་བརྩེགས།།
    ས་སྲོད་དར་ཀྱི་སྐུད་པས་ལན་བུ་བསླས།།
    དཀར་མེའི་འོད་ཀྱི་སྣང་བ་རུམ་དུ་བཅུག།


  6. དགུང་གི་སྐེད་ནས་དགུ་ཚིགས་སོ་པས་བཅིང་།།
    ལག་འཁྱུད་ལྡུམ་རའི་ཀུན་ད་ཟླ་བས་འཛུམས།།
    གཉིས་མཐུན་བརྩེ་བའི་གྲོས་འཆར་སྐར་མས་མོལ།།
    རིགས་མཐུན་འཇིག་རྟེན་ཕལ་ཆེར་ཆ་རུ་བསྙལ།།


  7. འདུ་འཛིའི་འུར་ཆ་བསྡེབས་པའི་སྐྱེ་འགྲོ་ཅག།
    ཁུ་སིམ་ཚོར་བ་བལྟམས་པའི་སྨག་གུང་ལ།།
    སྲིད་ཞི་བདེ་བར་འཚོ་བའི་ལྷིང་འཇག་ལས།།
    སྣང་སྲིད་འཁྲུགས་པའི་གཡུལ་ཁ་འབྱུང་རྐྱེན་ཉུང་།།


  8. ཉམས་ཀྱི་རྣལ་འབྱོར་འོད་གསལ་འཁྲིས་སུ་ཉལ།།
    དཔྱོད་ལྡན་ཀླད་པ་པོད་ཁའི་གསེབ་ཏུ་མཆོངས།།
    བྱོལ་གྱི་བླུན་རྒན་གཏི་མུག་གཉིད་ཀྱིས་འཐོབ།།
    དགུ་ཚིགས་དགུང་ནས་བརྐྱངས་པ་མཐོང་མཁན་ཉུང་།།


  9. ཀ་ཁའི་ཆ་བྱད་བཀྲ་བའི་མེ་ལོང་ནང་།།
    དབྱངས་ཀྱི་སྨྱུག་སོ་དལ་བའི་རྒྱུ་སྐར་གསེབ།།
    ཉམས་ཀྱིས་མི་སེམས་གསོ་བའི་འོ་མ་བཙལ།།
    བདག་ལ་ནམ་ཕྱེད་སྙན་ངག་བྲི་འདོད་བྱུང་།།


  10. གདོས་སྒྲིབ་སྲིན་བལ་སྤུངས་པའི་མུན་ནག་ནང་།།
    རུ་མའི་བག་ཆགས་སད་ནས་གཤོག་པ་དོད།།
    རྨི་ལམ་བྱ་ཁྱུ་གཤར་བའི་མཚན་གུང་ཚེས།།
    ཁམས་གསུམ་རྡོག་ཁ་བགོམ་དུ་ལས་ཀྱིས་དེད།།


  11. འཆར་གཞི་བསམ་བློས་མིག་ཟུང་དགུང་ལ་བཙིར།།
    ཡིད་ཆོད་གྲོས་ཀྱིས་རྒྱུ་སྐར་ཆེམ་ཆེམ་གཡོས།།
    ལྷ་ཡི་ཞིང་བཀོད་ཀླད་པས་ཚངས་ཐིག་བཏབ།།
    རྨི་ལམ་གསེབ་ནས་གངས་རིའི་ལྷ་ཁང་བཞེངས།།


  12. ལོ་རབས་སྨག་རྒྱ་སངས་བའི་སྟ་གོན་ལ།།
    སྙིག་དོར་བཅུད་ལེན་སད་རྟོགས་རིག་པ་དང་།།
    དཔྱོད་ཤེས་དཀར་པོ་བཙལ་བའི་ཐབས་ཤེས་ཟུང་།།
    འགྲོ་ཁམས་བདེ་འགྲོ་བྱིངས་ལ་དགོས་ངེས་སོ།།


  13. ཁམས་ཀྱི་ཐོག་རེག་བཀྱག་པའི་གྲིབ་གཟུཌ་དང་།།
    སེམས་པ་ཚོར་བས་བཟི་བའི་མཚན་གུང་ཞིག།
    ལས་ཉོན་ཚེགས་ཀྱིས་བྲུས་པའི་ལག་རྗེས་ལས།།
    སྐྱིད་སྡུག་མྱོངས་བ་བརྒྱ་ཡིས་ལན་ཆར་བསྡེབས།།


  14. ཏི་སེའི་དཀར་རྒྱན་སྤུད་པའི་རི་འདབས་དང་།།
    རྩི་ཏོག་ཁྲ་རྒྱན་མཛེས་པའི་མར་ཤམ་ནས།།
    ཚིག་གིས་ཆབ་རྩེ་བཏག་པའི་རྐན་སྒྲ་བརྡབས།།
    རི་བོ་ཕྱག་གིས་བཏེགས་པའི་མཚན་གུང་མཚར།།


  15. སྤྲིན་དཀར་སྟབས་རྩེག་དགུ་ཡི་གྲུ་ཁུག་འོག།
    ལྷ་རྩེའི་དར་རྒོད་གཡོ་བའི་ཡངས་སྟེང་དགུང་།།
    འབྲུ་ཡི་སོས་ཆར་བཞུར་བའི་རླན་ཐིགས་མོད།།
    གསེར་ལྗང་ཆབ་ཀྱི་ཟིལ་པ་འཐོར་ལ་ཁད།།


  16. ཡང་མེས་ཕྱག་གིས་གཅེས་པའི་དཀར་ཤོག་ཐོག།
    གནམ་སྐྱོང་རྒྱལ་བྱིན་གཤོས་པའི་རི་མོ་ཡོད།།
    ཀླུ་རྒྱལ་བྱིན་རླབས་ཞུགས་པའི་ལོངས་སྤྱོད་ལ།།
    འཇིག་རྟེན་འགྲོ་བ་འཚོ་བའི་བདེ་སྐྱིད་ཡོད།།


  17. འཕྲུལ་གྱི་པང་ལེབ་དཀར་པོའི་དཀྱུས་ཚད་ཐོག།
    པིར་གྱི་མྱུར་མགྱོགས་རྩེད་པའི་ལྡེམ་ཆ་དོད།།
    ཚིག་གི་དར་སྐུད་འཐེན་སའི་སྣག་ཤོག་གཙང་།།
    མེས་པོའི་གདངས་སྐད་ཚེམ་པའི་ཡིག་འབྲུ་བཀྲ།།


  18. སྐད་ཀྱི་བླ་ཚེ་བསྲུང་བའི་གོ་ཁྲབ་བཙལ།།
    དབྱངས་གསལ་ག་འུ་བཙན་པའི་རུ་མ་བགོས།།
    ཞལ་ནས་ཆབ་ཆེན་འབྲུག་པའི་ངད་རླངས་ལ།།
    ས་ཁམས་མི་རིགས་གསོ་བའི་རླན་ཐིགས་ཡོད།།


  19. ཨུ་ཚུག་དབྱངས་ཡིག་སྐོམ་ལྟོགས་ཟས་ལ་བཟོད།།
    སྡུག་རུས་ཡིད་ཆོད་མཚན་གུང་གཉིད་དེ་བཅག།
    སྒྱུ་རྩལ་ཚིག་ལ་འཁྲེངས་བའི་དན་རྟགས་ཀྱིས།།
    མདང་ནུབ་སྨྱུག་གི་སྒྲོན་མེས་གསལ་ཁ་བཙལ།།


  20. གནའ་དུས་གངས་ལས་བྱུང་བའི་དན་རྟགས་ཆེ།།
    བརྒྱ་ལས་གཅིག་ཆོག་གསེར་གྱི་ཚོམས་ཆེན་ནང་།།
    བདེན་དོན་ཤེས་རབ་སྟོང་གི་ཕྱི་མོ་སྟེ།།
    ཨ་མྱེ་ཁ་བ་རི་པའི་རོལ་དབྱངས་ཤིག།


  21. རིགས་ཀྱི་མཚེར་སྒར་བཏབ་པའི་མཚན་མོ་ལ།།
    གཉིད་ཀྱིས་ཐུན་བཞི་སྐོར་ནས་གཟུཌ་བཞི་འཚོས།།
    བག་ཆགས་ཤ་ཤེད་རྒྱས་ལ་རེ་བ་བཅངས།།
    ཉོབ་ཅན་སྐྱེ་རྒུ་ཕལ་གྱིས་ནམ་ཕྱེད་སྒོམ།།


  22. ཁུག་སྣའི་ཁ་དོག་འཁྲིགས་པའི་སྨག་གུང་ལ།།
    རྡོག་ཚུགས་གོག་མ་སྦུད་ཀྱི་སྟབས་ཀ་ཡིས།།
    དོན་དམ་རླབས་ཀྱིས་ས་ཆེན་ཆོད་དཀའ་ཡང་།།
    རྩོམ་རྩལ་བསྐྱེད་ལ་རམ་འདེགས་ཕྲ་མོའི་ཁུལ།།


  23. བརྩོན་པ་ཚེགས་ཀྱིས་འདེབས་པའི་ལག་རྗེས་དང་།།
    འབད་པ་ཡིད་ཀྱིས་གུས་པའི་འབྲས་རྟགས་སུ།།
    དབུ་འཕང་དར་གྱིས་སྒྲོན་པའི་དབང་ཐང་ལ།།
    དབྱངས་ཀྱི་འུར་ཆ་འཐག་རྒྱུ་བརྗེད་མི་རུང་།།


  24. རྨི་ལམ་རྒུན་ཆང་བསྙལ་བའི་མཚན་གུང་དུ།།
    སག་སིག་རྡོག་སྒྲ་མ་ཕོད་ལན་གཅིག་ཆས།།
    སྨྱུག་གི་དབྱངས་ཅན་མ་ལ་ཐེངས་གཅིག་བོས།།
    དབྱངས་ཀྱི་སྒྱུ་རྩལ་ཚོམ་བུ་གནང་རོགས་ཞུས།།

  25.        སྤྱི་ལོ/༢༠༡༩/༢/༡༧/དགོང་མོའི་ཆུ་ཚོད་/༡༢/སྐབས་སུ་དབུ་བཙུགས་སོ།།




སྐད་འཇོག་རེའུ་མིག

འདྲེན་སྐོལ། དཔྱད་གཏམ(0)ཡོད།