༄༅། །ངེད་དྲ་བར་ཕེབས་པར་དགའ་བསུ་ཞུ།
དེ་རིང་ནི་སྤྱི་ལོ 2019 ལོའི་ཟླ 11 ཚེས 19
དྲ་གནས་ཉར་ཚགས།   གཙོ་ངོས་སུ་འགོད་པ།
中文   |   English   |   བོད་ཡིག
ཕྱོགས་སྟོན།:  གཙོ་ངོས། > རྩོམ་རིག > 2 སྙན་རྩོམ།
2 སྙན་རྩོམ།
ཕ་ཡུལ།
[རྩོམ་ཁུངས།:ཁྱུང་པོའི་དྲྭ་བ།] [ཟླ་ཚེས།:2018-11-05] [རྩོམ་པ་པོ།:ཕོ་ལྷ།] [གཟིགས་ཐེངས:]

 ཕ་ཡུལ།

 

ལྷ་ཐོག  ཕོ་ལྷ།

 

 

ཕ་ཡུལ་ནི

སེམས་ཀྱི་ཉིན་སྲིབ་ལ་བཞད་པའི་མེ་ཏོག་དཀར་པོ་ཞིག་རེད


ཕ་ཡུལ་ནི

ཉེ་ས་ཉེ་ས་ནས་མི་དྲན་ཞིང

རིང་ས་རིང་ས་ནས་དྲན་ཡོང་པའི་མཛེས་སྡུག་གི་དག་ཞིང་དེ་རེད

 

ཕ་ཡུལ་ནི

མི་ཚེའི་མེ་ཏོག་བཞད་སའི་ལྡུམ་ར་ཞིག་དང

ཚེ་རབས་ཀྱི་མཇུག་རྔ་བསྡུ་སའི་དུར་ས་ཞིག་རེད

 

༢༠༡༨/༡༠/༡༦/ཉིན་བྲིས་སོ།།

 

ཕ་ཡུལ་གྱི་ཆབ་རོམ།

 

ལྷ་ཐོག  ཕོ་ལྷ།

 

ཕ་ཡུལ་གྱི་ཆབ་རོམ

བྱིས་པ་ཚོའི་བརྩེ་གྲོགས་ཡིན

ཆུང་ཆུང་གི་འཚོ་བ་ཁྱོད་ཀྱི་ལྷན་དུ་རོལ་ན

སེམས་ཀྱི་འཇིག་རྟེན་ལ་བདེ་སྐྱིད་ཀྱི་ཕོ་བྲང་བཞེངས་ཐུབ

 

ཕ་ཡུལ་གྱི་ཆབ་རོམ

ལོ་སར་གྱི་དགའ་སྟོན་རོལ་སའི་

དངོས་པོ་ཡག་ཤོས་དེ་ཡིན 


ཕ་ཡུལ་གྱི་ཆབ་རོམ

བྱིས་པའི་སེམས་ཁམས་དང་འདྲ་བ་ཧ་ཅང་དྭངས་གཙང་ཡིན

ཕ་ཡུལ་གྱི་ཆབ་རོམ་

ང་ཁྱོད་ལ་གཏན་དུ་དགའ

 

༢༠༡༨/ ༡༠/༡༦ཉིན་ཡུལ་ཁྲོཾ་ལྗོངས་ཕྱུག་མོ་ནས་བྲིས་སོ།།

 

 

ང་ཚོ་མེ་ཏོག་རེད།

 

ལྷ་ཐོག ཕོ་ལྷ།

 

 

ང་ཚོ་གྱེས་བྲལ་གྱི་ལོ་ཟླ་རེ་རེ་དང

ལྷན་འཛོམས་གྱི་དུས་ཚིག་རེ་རེ་ནི

ང་ཚོའི་བརྩེ་བ་ཇེ་མཐོ་རུ་འགྲོ་བའི་བརྡ་རྟགས་ཤིག་ཡིན

 

སྔོན་འགྲོའི་གཏམ།

  

ང་ཚོ་ཚང་མ་མེ་ཏོག་རེད

ཡུལ་ལུང་གཅིག་ནས་བཞད་པའི་མེ་ཏོག་ཁྱུ་གཅིག་རེད

མི་ཚོས་སྙན་ངག་གི་ཕོ་བྲང་བཞེངས་དུས

ང་ཚོ་ལ་ཡུལ་ལུང་གཅིག་གི་མེ་ཏོག་ཟེར



དུས་བཞིའི་འགྱུར་ཟློག་གི་ཁྲོད་ནས

ང་ཚོ་གཏན་ནས་སད་མི་ཐུབ

ང་ཚོ་མེ་ཏོག་རེད

 

ང་ཚོའི་མི་ཚེའི་འགྲུལ་བཞུད་མཚུངས་ཤིང

འཚོ་བ་རོལ་སྟངས་གཅིག་པའི

མེ་ཏོག་ཁྱུ་གཅིག་རེད

ང་ཚོ་རྫ་རི་དང་སྤང་རི་ལ་བཞད་ཡོད་པས

ང་ཚོའི་འཚོ་གཞིས་ལ

ཡིད་སྨོན་འཕྱོར་མཁན་མང


ང་ཚོ་དྭངས་གཙང་གི་གཙང་བོ་དང་ལྷ་རྫིང་ཡིན

ང་ཚོ་མཛེས་སྡུག་གི་མེ་ཏོག་དང་ཁ་བ་ཡིན


༢༠༡༨/༡༠/༡༤/ཉིན་སྙིང་གྲོགས་འགའ་ལྷན་འཛོམས་བྱུང་བས་བྲིས་སོ།།

 

ཙི་གུ་དང་ཕོ་ལྷ།

 

ལྷ་ཐོག ཕོ་ལྷ།

 

ཙི་གུ་ཞིག་ངའི་ཆུ་ཟམ་ནང་ལ་ཤི་འདུག

ངས་མ་ཎི་འདོན་དགོས་སམ

དགའ་བསུ་བྱེད་དགོས

 

ཙི་གུ་ཞིག་གིས་ངའི་རྣ་ཉན་དུམ་བུར་བཅད་སོང

ངས་གྲི་དང་ཞི་མི་འཚོལ་དགོས་སམ

བཟོད་པ་སྒོམ་དགོས

 

ཙི་གུ་དང་ཕོ་ལྷ་གཉིས་ནི་ངོ་མ

སྡིག་སྒྲིབ་ཕོག་པའི་ལོ་མ་གཉིས་རེད་འདུག

ལས་རླུང་གིས་གང་དུ་དེེད་འགྲོ་མི་ཤེས་ཤིང

ནམ་ཞིག་འཆི་འགྲོ་བའང་ངེས་པ་མི་འདུག

 

ད་དུང་འཐབ་བཞིན་འདུག

ཁོང་ཁྲོས་མེ་ལྕེ་འབར་བཞིན་རྩོད་ཀི་འདུག

ཁོ་རང་གཉིས་ལ

སླར་ཡང་སྡིག་སྒྲིབ་ལྕི་མོ་རེ་ཕོག་སོང

སྐྱར་དུ་དམྱལ་བར་འགྲིམ་པའི་ཐོ་འགོད་བྱེད་ཀྱིན་འདུག

 

༢༠༡༨/༡༠༡༡/༡ཉིན་མཚམ་མོ་བྲིས་སོ།།




སྐད་འཇོག་རེའུ་མིག

འདྲེན་སྐོལ། དཔྱད་གཏམ(0)ཡོད།