རྣམ་ཤེས་འདི་སྐྲག་གི།

                ཁམས་ནང་བཙུན།

བསྐལ་པ་བརྒྱ་ཕྲག་སྟོང་གི་གོང་རོལ་ནས་བཞད་པའི།།

དགུང་སྔོན་སྤྲིན་དཀར་རླུང་བུས་གཡོ་སྤྱོད་ལྟར་བྱེད་པའི།།

འཇིག་རྟེན་སྲིད་པའི་ཁམས་སུ་ཐེར་ཟུག་ཏུ་གནས་པའི།།

ཡ་ཁོག་གཟུགས་ཕུང་དཀྱིལ་གྱི་རྣམ་ཤེས་འདི་སྐྲག་གི།

འཆི་གྲངས་ཁྲི་མ་འབུམ་གྱི་གྲངས་ཀ་ལས་བརྒལ་བའི།།

རྗེ་བོ་བཙན་པོ་ཞིག་གི་བྲན་གཡོག་ལྟར་སྡོད་པའི།།

ཡུན་རིང་སྲང་ལམ་ཉུལ་ནས་སྨྱོན་པ་ལྟར་འཁྱམས་པའི།།

སྐད་ཅིག་སྡོད་དབང་མེད་པ་མགྲོན་པོ་འདི་སྐྲག་གི།

མི་འདོད་དམྱལ་བའི་ཚ་གྲང་གྲངས་མེད་དུ་མྱོང་བའི།།

གཤིན་རྗེ་ནག་པོའི་མནར་གཅོད་རྡུང་རྡེག་གི་འོག་ནས།།

གཞན་དབང་བཙན་པོ་ཞིག་གིས་ཚ་བཀར་དུ་བྱས་པའི།།

རིགས་དྲུག་ཁམས་སུ་འཁྱམས་པའི་རྣམ་ཤེས་འདི་སྐྲག་གི།

སྡིག་སྒྲིབ་ནག་པོའི་ཚེར་མ་དབལ་སོ་ལྟར་རྣོ་བའི།།

བརྟན་མེད་འདྲེ་མོའི་རླུང་འཚུབས་གཡོ་འགུལ་ལྟར་བྱེད་པའི།།

འཇིག་རྟེན་སྲིད་པའི་གྲོང་འདིར་འཁོར་འཁྱམས་སུ་བྱེད་པའི།།

སྡུག་བསྔལ་སྟོང་གི་ཁུར་པོ་རྣམ་ཤེས་འདི་སྐྲག་གི།

འཇིག་རྟེན་ཟ་ཟི་ནག་པོ་རྡོལ་ཁུངས་ཀྱི་གཞི་མ།།

ཨར་རྒན་ར་བཟི་རྒས་པོའི་གཤིས་ཉིད་དང་མཚུངས་པའི།།

མ་རིག་དུག་ཆུའི་ཁ་ཞགས་ཆགས་པ་ཡི་ཕག་ན།།

རང་དབང་སྤུ་ཙམ་མེད་པའི་རྣམ་ཤེས་འདི་སྐྲག་གི།

ལས་དབང་བདུན་བཞིའི་ལྕགས་སྒྲོག་རང་ཆས་སུ་འཐས་པའི།།

འདོ་མེད་ལེ་ལོའི་གཡེང་བ་ཟད་མེད་ཀྱི་མཐའ་མར།།

དུས་པོ་ཆེ་ལ་ཁྱེད་ཉིད་སྡུག་བསྔལ་གྱི་སྦྱོང་བ།།

བསམ་ཡུལ་ལས་འདས་འཁྲུལ་བའི་རྣམ་ཤེས་འདི་སྐྲག་གི།

ཕ་རོལ་སྲིད་པ་བར་དོའི་འཁྲུལ་སྣང་གི་རྣམ་ཤེས།།

བདེན་མེད་སྒྱུ་མའི་གཡོ་འཁྲུལ་ཉག་ཅིག་ཏུ་ཡིན་ཡང་།།

བདེན་འཛིན་ཨ་མཐས་དྲྭ་བའི་འཆིང་ཐག་གི་རུམ་ནས།།

ཚ་གྲང་སྡུག་བསྔལ་མྱོང་བའི་རྣམ་ཤེས་འདི་སྐྲག་གི།

ལས་དབང་འགོག་མེད་ཡང་སྲིད་ཕྱི་མ་ཡི་འཁྲུལ་ཡུལ།།

མི་འདོར་ཞེ་འཛིན་དམ་པོར་འཁྱུག་འཁྱུག་ཏུ་འཇུ་ནས།།

མཐའ་མེད་འཁོར་བའི་གཡང་ས་ཀྱེ་ཧུད་ཀྱི་ཞིང་དུ།།

བདུད་བཞིའི་དགྲ་ཞབས་ཚུད་པའི་རྣམ་ཤེས་འདི་སྐྲག་གི།