ཁྱུང་དཀར་སྟག་ཚ། ཁྱུང་པོ་སྟེང་ཆེན་དགོན།
མཚན་དཔེའི་མེ་ཏོག་རྔ་ཡུལ་ཞིང་དུ་བཞད།།
དགག་སྒྲུབ་རིག་ལམ་སེམས་དཔའ་སྟོང་གི་སྤ།།
འཆད་རྩོད་རྩོམ་པའི་ལེགས་བཤད་འོད་སྟོང་འབར།།
བཤད་སྒྲུབ་བསྟན་པ་འཛིན་པའི་སྐྱེས་མཆོག་བསྔགས།།
བཅུ་ཕྲག་རིག་པའི་རྒྱ་མཚོའི་ཀློང་ཡངས་སུ།།
རྣམ་དཔྱོད་རིག་པའི་བློ་གྲོས་མཁྱེན་རྩལ་རྫོགས།།
མ་རིག་རྨོངས་པའི་སྒྲོན་མེ་སྨྲ་བའི་སེང་།།
ཁ་བའི་རིག་མཛོད་ཆེན་མོ་སློབ་མའི་ནོར།།
འགྱུར་མེད་ལྷག་བསམ་བཟང་པོའི་མཛད་འཕྲིན་འོག།
མ་རིག་དུག་ལྔའི་གཉེན་པོ་ཡེ་ཤེས་བསྐྱེད།།
ལུང་རིགས་སྤྱི་རྒྱ་གཅོད་པའི་པཎྚི་ཏ།།
གཞུང་ལུགས་སྨྲ་བའི་དབང་པོ་དུས་ཀུན་རྒྱལ།།
བསིལ་ལྡན་སྨན་ལྗོངས་ཡངས་པའི་དོ་ར་རུ།།
མཚུངས་མེད་སྨྲ་བའི་སྐྱེས་མཆོག་རྣམ་དཔྱོད་ལས།།
ལུང་རིགས་གཏིང་ཟབ་འབེལ་གཏམ་ལྷུག་པོར་གནང་།།
རབ་མཛེས་བསིལ་ལྡན་སློབ་མའི་བློ་གྲོས་རྒྱས།།
རྨད་བྱུང་འཆད་རྩོད་རྩོམ་པའི་ཞིང་ཁམས་སུ།།
དགག་སྒྲུབ་རིག་འཕྲུལ་མྱུར་བའི་གློག་ཞགས་འཁྱུག།
བུ་སློབ་སྟོང་ཕྲག་ལྷག་གི་བློ་རྨོངས་སེལ།།
གྲགས་སྙན་གཡུ་འབྲུག་སྔོན་མོའི་ངར་སྐད་ལྡིར།།
ཤེས་བྱའི་མཁའ་ལ་བློ་གྲོས་མཁྱེན་བརྩེ་རྒྱས།།
གྱེར་བསྟན་གཤེན་ཕྲུག་དུ་མའི་སྙིང་གི་ནོར།།
བོན་འབངས་སྤྱི་ནོར་རིག་པའི་གསེར་གྱི་འོད།།
འགྲོ་འདྲེན་སྐྱེས་བུ་ཆེན་མོ་བསྟན་པའི་རྒྱན།།
ཆོལ་གསུམ་བོན་གྱི་བསོད་ནམས་ཞིང་ས་སྟེ།།
མདོ་སྨད་རྔ་ཡུལ་གཡང་གི་ཕྱུག་མོའི་ཞིང་།།
བསླབ་གསུམ་ངུར་སྨྲིག་འཛིན་པའི་དྲང་སྲོང་པ།།
སྨྲ་དབང་མི་ཡི་སེང་གེ་ལན་བརྒྱར་བསྔགས།།
མདོ་སྨད་སྣང་ཞིག་དགོན་གྱི་གདན་ས་རུ།།
བཤད་སྒྲུབ་བསྟན་པའི་དབྱར་གྱི་རྔ་བོ་ཆེ།།
རྗེ་བཙུན་སྨྲ་བའི་སེང་ཆེན་ཞེས་སུ་གྲགས།།
སྐལ་བཟང་གོ་སྟོན་དགའ་བ་འབུམ་གྱིས་བསུ།།
༢༠༡༨ / ༡༠/༩ ཉིན་མདོ་སྨད་སྨྲ་སེང་རྣམ་གསུམ་གྱི་ཡ་གྱལ་ངེས་དོན་གྱི་བཤེས་གཉེན་ཆེན་མོ་དྲང་སྲོང་རྗེ་བཙུན་ནམ་མཁའ་ཚུལ་ཁྲིམས་མཆོག་དགུང་གྲངས་གོ་སྟོན་ལ་ཕེབས་པ་དགའ་བ་འབུམ་གྱིས་སྐལ་བཟང་གི་ཤིས་ཚིག་འབུལ་བ་ལགས་སོ།།
