ཀྱེ་ཧོ་ངོ་མཚར་འབུམ་གྱིས་ཕྱུག་པའི་མཁའ།
གནའ་དེང་རིག་གནས་ནུབ་མེད་རྒྱུན་སྐར་ཕྲེང་།
བསྟན་འགྲོའི་དཔལ་ཁ་གསོ་བའི་ཟེར་མདངས་ཀྱིས།
མུན་གསུམ་མཐར་བསྐྲད་གཤེན་པོར་གུས་ཕྱག་འཚལ།།
བརྒྱ་པའི་མགོན་པོ་དམུ་རྒྱལ་སྟོན་པ་ཡི།
བརྒྱ་ཕྲག་བསྟན་མཆོག་སྲིད་པ་སྟོང་གི་བར།
བརྒྱ་སྟོང་མུ་མེད་སྐྱེ་འགྲོ་འདྲེན་པའི་གནས།
བརྒྱ་འབུམ་མཁས་གྲུབ་གཤེགས་ཤུལ་ཁྱུང་པོར་མཐོང་།།
ཁྱུང་དཀར་མི་རྗེ་ལྷ་ལས་བབས་ནས་གཟུངས།
ཁྱུང་དཀར་རྒྱལ་སྲིད་མངའ་ཐང་ཕྱོགས་བཅུར་རྒྱས།
ཁྱུང་དཀར་ས་ཡི་ཐིག་ལེ་བྱམས་མའི་གནས།
ཁྱུང་དཀར་འདུ་གནས་བྲག་དམར་རི་འདུས་མཐོང་།།
སྐྱེ་འགྲོ་སྡུག་བསྔལ་ཀློང་ནས་སྐྱོབ་ཕྱིར་དུ།
སྐྱེ་འགྲོ་རིས་མེད་སྐལ་མཉམ་འདྲེན་པའི་ཞིང་།
སྐྱེ་འགྲོ་འབྲེལ་ཐོག་བདེ་སྐྱིད་བསྐྲུན་པའི་རྨིང་།
སྐྱེ་འགྲོ་གྲངས་མེད་རྟེན་མཆོག་བསྟན་གླིང་མཐོང་།།
སྐྱེས་མཆོག་རིགས་ལྡན་བསླབ་གསུམ་དལ་འབབ་མཛོད།
སྐྱེས་མཆོག་བསྟན་འགྲོའི་དཔལ་མགོན་ཡིད་བཞིན་ནོར།
སྐྱེས་མཆོག་དུས་བབས་ལྔ་རིག་དར་གྱིས་ཀླུབས།
སྐྱེས་མཆོག་མཁྱེན་རབ་རྫོགས་པའི་བླ་མ་མཐོང་།།
དྲི་མེད་སྡོམ་པ་གསུམ་གྱི་བང་རིམ་རྩེར།
དྲི་མེད་རྣམ་པ་གསུམ་གྱི་ས་བརྟོལ་ལྗོན།
དྲི་མེད་ཆིངས་ཆེན་གསུམ་གྱི་ཕང་ཕུང་རྒྱས།
དྲི་མེད་བསླབ་གསུམ་དུད་པའི་སློབ་དཔོན་མཐོང་།།
གཤེན་བསྟན་མདོ་སྔགས་ཀེ་ལ་ཤ་རིའི་སྤོར།
གཤེན་བསྟན་རིག་གནས་འཛིན་པའི་ཁ་ལྔ་པ།
གཤེན་བསྟན་ཉམས་རྟོགས་མྱོང་བའི་རྩལ་ཚེན་རྫོགས།
གཤེན་བསྟན་སྲིད་མཐར་སྐྱོང་བའི་འདུས་སྡེ་མཐོང་།།
རབ་དཀར་དྲི་མེད་ཚད་མ་སྡེ་བདུན་གྱི།
རབ་དཀར་རྨད་འབྱུང་རིག་པའི་ལམ་གཞུང་ནས།
རབ་དཀར་མདངས་ལྡན་ནང་རིག་རྒྱལ་བའི་བསྟན།
རབ་དཀར་བསླབ་གསུམ་འཛིན་པའི་བཤད་གྲྭ་མཐོང་།།
ཟབ་རྒྱས་ལུང་དང་རིག་པའི་ལམ་སྟེགས་ནས།
ཟབ་རྒྱས་སྡེ་སྣོད་གསུམ་ལ་ཉམས་ལེན་གྱིས།
ཟབ་རྒྱས་རྒྱུད་སྦྱོང་སྔོན་འགྲོ་དངོས་གཞི་སྟེ།
ཟབ་རྒྱས་ཐར་ལམ་དྲུག་བརྙེས་སྒྲུབ་གྲྭ་མཐོང་།།
ཉམས་ལེན་དམར་མོ་གདེང་བཞི་ཁྲེགས་ཆོད་དང་།
ཉམས་རྩལ་མངོན་གྱུར་ཐོད་བརྒལ་སྣང་བ་བཞི།
ཉམས་འགྱུར་སེམས་ཀློང་མན་ངག་ཟབ་དོན་གྱི།
ཉམས་རྟོགས་དཔའ་རྩལ་རྫོགས་པའི་སྒོམ་གྲྭ་མཐོང་།།
ཤེས་རབ་གསུམ་གྱིས་ཕྱུག་པ་གཤེན་གྱི་སྡེ།
ཤེས་རབ་རིག་པའི་རླབས་རྩལ་མཁྱེན་ཡོན་ཅན།
ཤེས་རབ་ལྷག་བསམ་དྭངས་མ་དགོན་སྡེ་སྤྱིར།
ཤེས་རབ་གང་དགོས་སྤྱོད་པའི་གྲྭ་ཚང་མཐོང་།།
གསུང་རབ་རྒྱལ་བའི་ཞལ་ཚབ་སྔོ་བསངས་མ།
གསུང་རབ་ཤེས་དཔལ་རྒྱས་པའི་རྟ་ལྗང་ཅན།
གསུང་རབ་འདོད་རྒུ་འཕེལ་བའི་གཟི་འོད་ཀྱིས།
གསུང་རབ་ས་ཆེན་འགེངས་བའི་དཔེ་ཁང་མཐོང་།།
དད་ལྡན་བློ་རྩ་བརྟན་པ་འབངས་སྡེའི་གསེབ།
དད་པ་བཞི་ཡིས་བསྐུལ་བའི་དགེ་སྦྱོང་དང་།
དད་ཆེས་གཤེན་གྱི་སྦྱིན་པའི་བདག་པོ་སྟེ།
དད་གུས་རབ་ཏུ་དཀར་བའི་ལྷ་སྡེ་མཐོང་།།
དེ་ལྟའི་དངོས་སུམ་མཐོང་ལུགས་བཅུ་གཉིས་འདི།
དེ་འདྲ་ཡིན་མིན་བརྟག་པས་རླབས་རིས་ལས།
དེ་མིན་སྒྲོ་བཏགས་མེད་བསམ་བདག་ཡིད་རངས།
དེ་ལྟར་གལ་ཏེ་ནོར་འཁྲུལ་མཐོལ་བཤགས་ཞུ།།
ཁྱུང་གི་ཕ་ས་དཀར་པོ་ཁྱུང་ཡུལ་གྱི།
ཁྱུང་དཀར་གཡུང་དྲུང་བསྟན་གླིང་ཁྱུང་ཤུལ་ནས།
ཁྱུང་རྒྱུད་མིན་ཀྱང་རུ་ཚ་ཁྱུང་ལ་དུངས།
ཁྱུང་ཡུལ་འཚོ་བའི་ཚུལ་ཁྲིམས་དྲི་མེད་པས།།
༢༠༡༨/ ༩/ ༥
