རྗེ་སྨན་རི་བ།
ལྷོ་རོང་། ཁྲ་སྣང་དགའ།
ཁྱེད་སྐུ་རྟ་བདུན་དབང་པོ་རི་ཕྲན་སྟོང་གི་རྩེ་ནས་འཆར།།
སྒང་པ་བོན་གྱི་འདུས་སྡེ་བྱེ་བའི་གཙུག་ན་མངོན་པར་མཛེས།།
ངེས་འབྱུང་ཚུལ་ཁྲིམས་ཟབ་མོའི་པད་མའི་ཚལ་ཆེན་རབ་ཏུ་རྩེན།།
ལྔ་བདོའི་བོན་ལ་བཀའ་དྲིན་ལྕི་བའི་སྨན་རི་བ་དེར་འདུད།།
ཁྱེད་ཀྱི་ཐུགས་གཤིས་དབང་ཆེན་གསེར་རི་ལྷུན་པོའི་འཕང་བ་རུ།།
དམ་ཚིག་དྲི་བསུང་འཐུལ་བའི་ཙན་དན་ནགས་ཀྱི་ལྗོན་ཚལ་རྒྱས།།
ཕྱི་ཚུལ་ནང་ཁྲིམས་གཙང་མས་སྨིན་གྲོལ་ལམ་གྱི་སྐྱེ་ཤིང་འཛུགས།།
སྒོ་གསུམ་སྔོན་བྱོན་སྲས་བཅས་རྒྱལ་བའི་ཚོགས་ཀྱི་ཞལ་ངད་འཐུལ།།
གངས་ཀྱི་ཆུ་རྒྱུན་བཞུར་བའི་སྨན་རི་ཚང་གི་སྲོལ་འཛིན་པ།།
འཁོར་འདས་སྤྱི་རྒྱ་གཅོད་པའི་བྱ་རྒྱལ་ཁྱུང་གི་གཤོག་རྩལ་རྒྱས།།
གང་དེ་གཤེགས་བཞུག་མི་མངའ་ནམ་མཁའི་སེམས་ཀྱི་དབྱིངས་སུ་སྤ།།
གདུལ་ཁམས་རྟག་འཛིན་ཞི་ཕྱིར་ཞབས་ཀྱི་པད་མོ་གཞན་དུ་བསྒྱུར།།
སྲིད་གསུམ་སྡུག་བསྔལ་འགྲམ་གཞི་ས་ཆེན་འདི་ཡི་ཐིག་ལེ་རུ།།
བྱམས་བརྩེའི་སྦྲང་ཆར་སིལ་མས་གདུལ་བྱའི་ཁམས་ཀྱི་ས་གཞི་བརླན།།
སྨིན་གྲོལ་གེ་སར་བཞད་པའི་ལང་ཚོའི་བསོད་ནམ་ཚོགས་སུ་གཞེངས།།
ཁྱེད་སྐུ་ཉི་ཟླའི་འོད་སྣང་སྲིད་པའི་ཁམས་སུ་དཔེ་ཟླ་འོས།།
ཞེས་རྗེ་སྨན་རི་བའི་དགོངས་རྫོགས་ཀྱི་ཞག་པོ་ལྔ་བཅུ་ཉིན་༼ཁྲ་སྣང་དགའ༽པས་རྗེས་དྲན་གྱི་ཚུལ་དུ་བྲིས།
༢༠༡༧/༡༡/༥/ཉིན།
