༄༅། །ངེད་དྲ་བར་ཕེབས་པར་དགའ་བསུ་ཞུ།
དེ་རིང་ནི་སྤྱི་ལོ 2019 ལོའི་ཟླ 8 ཚེས 18
དྲ་གནས་ཉར་ཚགས།   གཙོ་ངོས་སུ་འགོད་པ།
中文   |   English   |   བོད་ཡིག
ཕྱོགས་སྟོན།:  གཙོ་ངོས། > རྩོམ་རིག > 5 ཤིས་ཚིག
5 ཤིས་ཚིག
སྤྱི་གཙུག་གི་ལྷ་ཁྱེད་ཕེབས་པ་སྔ་སོང་།།
[རྩོམ་ཁུངས།:ཁྱུང་པོོའི་དྲྭ་བ།] [ཟླ་ཚེས།:2017-09-19] [རྩོམ་པ་པོ།:ཁྱུང་བསྟན་རྒྱས།] [གཟིགས་ཐེངས:]

WechatIMG14.jpeg

སྤྱི་གཙུག་གི་ལྷ་ཁྱེད་ཕེབས་པ་སྔ་སོང་།།


ཁྱུང་བསྟན་རྒྱས།


སྐར་ཚོཊ་འབུམ་གྱི་མཁའ་དབྱིངས་ཤིག་ནས་ཁྱེད་སྐུ་རྟ་བདུན་ནུབ་རིར་བརྒལ།།

སྐར་ཆེན་བླ་མ་རྒྱང་བཞུད་ཞིག་གིས་ཤུལ་ལུས་སྐར་ཚོཊ་གདུང་འབོད་མཆིས།།

སྐར་ཚོཊ་གྲངས་མེད་བསམ་མཐའ་ཡས་པའི་མིག་ཆུ་བཞུར་བཞིན་ནུབ་ཏུ་ཅེར།།

སྐར་ཚོམ་འདུས་སྡེའི་ཁྱུ་ཚོགས་ངེད་ཅག་མུ་མེད་ཁམས་སུ་དྭ་ཕྲུག་ལུས།།


གངས་རི་ཞིག་གི་མིག་ཆུ་བཞུར་ནས་ཡར་ཆབ་གཞུང་དུ་ཤིག་གེར་འདྲེས།།

གངས་ཅན་ལྗོངས་ཀྱི་རི་ལུང་ཐང་གསུམ་སྡུག་གི་མུན་པ་ནག་པོས་བསྒྲིབ།།

གངས་ཕྲུག་གཙང་ཆུ་མུན་པའི་བར་ནས་མྱ་ངམ་སྒྲ་ཡིས་འཇིག་རྟེན་འགེང་།།

གངས་རི་བཞག་ནས་ཁྱེད་ཉིད་བྱོན་པས་ཤུལ་འབངས་བྲང་ཁོག་སྟོང་པར་གྱུར།།


རབ་དཀར་སེམས་ཀྱི་གུར་ཁང་ནང་དུ་ཚོར་བའི་སྤྲིན་པ་ནག་པོར་རྒྱུ།།

རབ་མཛེས་ཁྱེད་སྐུ་མཚན་དཔེའི་མེ་ཏོག་མ་མཇལ་གནས་ཀྱིས་བསྐལ་བ་འམ།།

རབ་སྙན་གསུང་གི་བདུད་རྩི་ཐིགས་པ་ལྕེ་ལ་མྱོང་བའི་དུས་མ་མཆིས།།

རབ་གསལ་གློག་གི་ཁང་ཆུང་ཞིག་ནས་སྐྱོ་བའི་གདུང་དབྱངས་ཁྱེད་ལ་འབོད།།


ཁྱེད་སྐུ་གསེར་གྱི་ཉི་མ་སེར་པོ་འཛམ་གླིང་སྒང་ནས་འོལ་གླིང་གཤེགས།།

ཁྱེད་ཐུགས་འདྲེས་པའི་ཀུ་མུད་གདུལ་བྱ་འདབ་མ་ཟུམ་ནས་མགོ་བོ་གུག།

ཁྱེད་ཉིད་དྲན་ནས་བཟོད་དུ་མེད་པའི་བློ་ཡི་ཟེའུ་འབྲུ་ཚེར་མས་བསྡམས།།

ཁྱེད་ཀྱི་གཤེགས་ཤུལ་གསེར་ཁྲི་མདའ་ནས་འུ་ཅག་དགུ་ཐང་ཆད་དེ་འབོད།།


ཁ་བ་ཅན་གྱི་རི་ཆུ་དྭངས་མོ་ཁ་དོག་འགྱུར་ནས་ཁྱེད་རྗེས་རླབས།།

ཁ་བ་རི་ཡི་ལབ་རྩེ་སྐྱ་བོས་ཁྱེད་ཀྱི་ཕྱོགས་སུ་དར་ལྕོག་གཡབ།།

ཁ་བའི་ཁྲོད་ནས་ས་རྡོ་ཡིན་ཡང་བརླན་གྱིས་བཅིང་ནས་དུམ་བུར་ཞིག།

ཁ་བའི་མགོན་པོ་མ་བཞུགས་བྱོན་ནས་རི་ལུང་མུན་པ་ནག་པོར་གྱུར།།


ཤུལ་ལུས་དྭ་ཕྲུག་ཁྲི་མ་འབུམ་གྱི་སྙིང་གི་ག་འུ་མཐའ་རྒྱ་རལ།།

ཤུལ་འཛིན་བསླབ་གསུམ་འདུས་སྡེ་ཁྲ་མོའི་གཟན་གྱི་ལེབ་སྣེ་རློན་གྱིས་ཁེངས།།

ཤུལ་བཞག་མཛད་པའི་ཁ་བའི་སྙིང་ནོར་ཁྱེད་ཀྱིས་མཛད་རྗེས་མཇལ་བཞིན་དུ།།

ཤུལ་ནས་མིག་ཆུའི་ཆུ་བོ་བྲུག་ནས་མདུན་གྱི་ལམ་སྣེ་མ་ཟིན་ལུས།།


ཞེས་༧སྐྱབས་རྗེ་སྨན་རིའི་ཁྲི་འཛིན་སོ་གསུམ་པ་རིན་པོ་ཆེ་མཆོག་དགོངས་པ་དབྱིངས་སུ་ཐིམ་པའི་དུས་དེར་ཁྱེད་ཀྱི་ཐུགས་རྗེའི་སྟོབས་འོག་ཏུ་ཚུད་པའི་གུས"ཁྱུང་བསྟན་རྒྱས"ཀྱིས་སེམས་ཀྱི་མུན་པའི་བར་ནས་ཁྲེན་ཏུ་གྲོང་ཁྱེར་ནས་ཤར་མར་བྲིས་སོ། རིན་པོ་ཆེ་ཐུགས་རྗེས་གཟིགས་རོགས།




སྐད་འཇོག་རེའུ་མིག

འདྲེན་སྐོལ། དཔྱད་གཏམ(0)ཡོད།