མི་བརྗེད་གཟུངས་ལྡན་སྟོབས་བཅུའི་བདག་ཉིད་ཆེ།།
སྡིག་མེད་ཞིང་དུ་རྒས་མེད་གཟུགས་སྐུ་བཞེངས།།
མཁར་ཉལ་དྲི་ཟའི་གླུ་གར་མཆོད་བཏེགས་པ།།
ཐོད་དཀར་སྲས་པོས་དེང་འདིར་ཤིས་པ་སྩོལད།།
སྐྱེ་མེད་བོན་སྐུ་འགག་མེད་རྫོགས་པའི་སྐུ།།
འགྲོ་འདུལ་བསྟན་སྤེལ་མཉམ་མེད་སྤྲུལ་པའི་སྐུ།།
ཀུན་འདུས་ངོ་བོ་རྗེ་གཅིག་བླ་མ་མཁྱེན།།
བདག་སོགས་སྒྲིབ་གཉིས་ཕྱག་ཕྱིར་ཁྱེད་ཕྱག་འཚལ།།
བསིལ་ལྡན་ཞིང་དུ་བསྟན་འགྲོའི་དོན་ཉིད་ལ།།
མཛད་འཕྲིན་གདེང་ལྡན་མི་ཡི་ཁྱུ་མཆོག་ཁྱེད།།
གྱ་ནོམ་ཤེས་བྱའི་ནོར་གྱི་ཕྱུག་པ་ལ།།
བསམ་ཞིང་བདག་ཡིད་རྟིང་ནས་ཁྱེད་ཕྱག་འཚལ།།
གསང་གསུམ་བོན་གྱི་དབང་རྒྱུད་ལུང་རྒྱུད་ནི།།
ཆུ་མགོ་གངས་ལ་ཐུག་པའི་དཔེ་བཞིན་དུ།།
སྨན་རིའི་མཁན་སློབ་ཉི་ཟླ་ཟུང་ལས་བརྒྱུད།།
བརྒྱུད་པ་ཁུངས་གཙང་ཁྱེད་ལ་བདག་ཕྱག་འཚལ།།
དཔེ་ཆ་ལྷེབ་གཅིག་ཉིད་ལ་མེད་ནའང་།།
དཔེ་གཡར་ཁྲོད་དུ་མདོ་སྔགས་སེམས་གསུམ་སྦྱོང་།།
ཀུན་ལས་འཕཌ་པའི་དགེ་ལ་མངོན་པར་བརྩོན།།
བརྩོན་འགྲུས་རྒྱལ་པོ་ཁྱེད་ལ་བདག་ཕྱག་འཚལ།།
ཉི་གདུགས་ཆར་གདུགས་མེད་པས་ཚ་གྲང་ནང་།།
རྒྱུ་ནོར་དབུལ་པས་ལྟོ་གོས་ཉུང་ནའང་།།
ཆོག་ཤེས་ལྟ་བའི་གདེང་ལྡན་བསམ་གཏན་ཅན།།
བསམ་གཏན་བླ་མེད་ཁྱེད་ལ་བདག་ཕྱག་འཚལ།།
མཚམས་སྤྲིན་ནགས་ལ་ལྷུང་འདྲའི་སྨན་གླིང་རུ།།
དཀའ་ཐུབ་གཤེན་དང་མཉམ་པའི་འདུལ་བ་པ།།
ཚུལ་མཛེས་ཁྲིམས་ཀྱི་ཕྱུག་པའི་དྲང་སྲོང་ཁྱེད།།
མཛད་པའི་འཕྲིན་ལས་དྲན་བཞིན་བདག་ཕྱག་འཚལ།།
འོ་རྒྱལ་ཆེ་ཡང་བོན་ཆོས་རིག་གཞུང་ལ།།
དཀའ་བ་འབུམ་ཕྲག་གསེང་དུ་ཐོས་པ་མཛད།།
ས་མཐའི་ཡུལ་དུ་སྡུག་བསྔལ་འབུམ་ལ་བཟོད།།
བཟོད་པ་མཐའ་ཡས་ཁྱེད་ལ་བདག་ཕྱག་འཚལ།།
མི་ལོ་བཅུ་ཕྲག་ས་མཐའི་དགེ་ལྡན་བྱས།།
བཅུ་ཕྲག་རིག་གཞུང་རིག་པའི་འཚོལ་ཞིབ་མཛད།།
མཁན་སློབ་གཉིས་ཀྱིས་ཐུགས་ཀྱི་གདམས་བཟང་བསྣམས།།
འབྲས་བུའི་རྒྱལ་པོ་ཁྱེད་ལ་བདག་ཕྱག་འཚལ།།
ཟངས་འོད་འབར་བའི་འདུས་གནས་ཆེན་མོ་རུ།།
འཁོར་ལོ་གསུམ་གྱི་བྱ་བ་བྱེད་པ་ལ།།
སྣ་ཚོགས་ཚད་མའི་མཛོད་འཛིན་ཀུན་མཁྱེན་ཁྱེད།
སྲིད་འདིར་བླ་ན་མེད་པས་ཕྱག་འཚལ་བསྟོད།།
བདག་ཡིད་མོས་གུས་གདུང་བའི་དྲིན་ཚོར་གྱིས།།
འདུལ་འཛིན་སྐྱེས་མཆོག་གསེར་རིའི་ཕྲེང་ལས།།
དཔལ་ལྡན་བླ་མ་རི་དབང་ལྷུན་པོ་བཞིན།།
སྣ་ཚོགས་བོན་མཁས་སྐུ་ལ་ཕྱག་འཚལ་ལོ།།
དད་འདུན་མཚོད་སྤྲིན་མི་ཟད་རྒྱ་མཚོ་ལས།།
འཁྲུངས་པའི་ནོར་བུ་ཚད་མ་གསུམ་གྱི་བཅུད།།
ལས་ལྡན་བུ་སློབ་ཚོ་ལ་གཟུངས་གཞུག་ཕུལ།།
སངས་རྒྱས་ལས་ལྷག་བཀའ་དྲིན་སྙིང་ནས་དྲན།།
སྐུ་ཚེ་གཡུང་དྲུང་ཁྲི་ལ་བཞུགས་སུ་གསོལ།།
གསུང་དབྱངས་པི་ཝང་མཛོད་ལས་བརྒྱུད་དུ་གསོལ།།
ཐུགས་དགོངས་ཀུན་བཟང་ཀློང་ལས་དགོངས་སུ་གསོལ།།
བསྐལ་བརྒྱའི་བར་དུ་སྐུ་ཚེ་བརྟན་བཞུགས་གསོལ།།
ཞེས་པ་འདི་ནི་རྗེ་བླ་མའི་བུ་སློབ་ཡོངས་ཀྱི་ཐ་ཤལ་བ་གྲྭ་སྨིན་གྲོལ་མིང་འཛིན་གྱིས་གཤེན་གྱི་བཀའ་ཐུབ་ཉིན་ལྔ་པའི་ཕྱི་དྲོ་རང་ཤག་དཔེ་མཛོད་ཁང་དུ་ཤར་མར་སུག་བྲིས་བྱས། དགེའོ།།
