༄༅། །ངེད་དྲ་བར་ཕེབས་པར་དགའ་བསུ་ཞུ།
དེ་རིང་ནི་སྤྱི་ལོ 2024 ལོའི་ཟླ 3 ཚེས 29
དྲ་གནས་ཉར་ཚགས།   གཙོ་ངོས་སུ་འགོད་པ།
中文   |   English   |   བོད་ཡིག
ཕྱོགས་སྟོན།:  གཙོ་ངོས། > བོན་སྒོ། > 5 ཆབ་དཀར་སྔགས་ཀྱི་བོན་སྒོ།
5 ཆབ་དཀར་སྔགས་ཀྱི་བོན་སྒོ།
གསང་སྔགས་ལམ་གྱི་འཇུག་ཆོག་མུ་ཏིག་འཕྲེང་བ།
[རྩོམ་ཁུངས།:ཁྱུང་པོའི་དྲྭ་བ།] [ཟླ་ཚེས།:2017-04-26] [རྩོམ་པ་པོ།:འ་ཞྭ་བློ་གྲོས་རྒྱལ་མཚན།] [གཟིགས་ཐེངས:]

     གསང་སྔགས་ལམ་གྱི་འཇུག་ཆོག་མུ་ཏིག་འཕྲེང་བ་ཞེས་བྱ་བ། བླ་མ་བཀའ་དྲིན་ཅན་གྱི་ཞབས་ལ་འདུད། དེ་ལ་སྤྱིར་འཛམ་བུ་གླིང་དུ་སྐྱེས་ཤིང་དལ་འབྱོར་གྱི་མི་ལུས་ཐོབ་པ་ཤིན་ཏུ་དཀའ་བ་ཡིན་ཏེ། འཛམ་གླིང་སོག་ཁར་སྐྱེ་བ་ཤིན་ཏུ་དཀའ། གཙང་མ་མི་ལུས་ཐོབ་པ་རབ་དུ་དཀོན། ཞེས་གསུངས་པས།དལ་འབྱོར་ཐོབ་པ་འདི་ཡང༌། ཁ་རྗེ་དང་དཔུང་པས་ཐོབ་པ་མ་ཡིན་གྱིས།སྔོན་ནས་བསོད་ནམས་ཆ་མཐུན་གྱི་དགེ་རྩ་མང་དུ་སྤྱད་པས་ཐོབ་པ་ཡིན་ཏེ།བདག་ཀྱང་སྐྱེ་བ་གྲངས་མེད་གང་ཟག་རིམ་པས་བརྒྱུད། བརྒྱུད་པའི་དུས་འདིར་བསོད་ནམས་དབང་གིས་བསོད་ལྡན་སྟོབས་ཞིག་གིས།སྟོན་པ་བསོད་ནམས་དབང་གི་ཚོགས་ཀྱི་ཞིང་ཁམས་དེ་རུ་བྱོན།དེ་ལ་སེམས་བསྐྱེད་དད་པའི་སྟོབས་དང་ལྡན། ཞེས་གསུངས་པ།དུས་འདི་མ་ཡིན་པའི་གླིང་གཞན་ནམ། འགྲོ་བ་མི་ཁོམ་གནས་བརྒྱད་ལྟ་བུར་སྐྱེས་པའི་དུས་ན། བྱང་ཆུབ་སྒྲུབ་པའི་ཐབས་མེད་དེ། དལ་འབྱོར་ཐོབ་པའི་དུས་འདིར་བྱང་ཆུབ་མི་བསྒྲུབ་ན།གཙང་མ་མི་ལུས་ཐོབ་པས་ཅི་ལ་ཕན། ཞེས་གསུངས་པས་ན། རྫོགས་པའི་བྱང་ཆུབ་སྒྲུབ་པ་ལ།ཐབས་ཀྱི་འཇུག་སྒོ་གྲངས་མང་ན་ཡང༌། ཐབས་ཆེ་ལ་སྒོ་ཡངས་པ།སྐྱེ་བ་གཅིག་གིས་བྱང་ཆུབ་སྒྲུབ་པ། ཐེག་པ་ཆེན་པོ་གསང་སྔགས་ཡིན་ཏེ།ཁྱད་པར་བླ་མེད་གསང་སྔགས་མཆོག། ལམ་འདི་དག་ལ་སུས་བརྟེན་ན། འབྲས་བུ་གཡུང་དྲུང་འཛིན་པ་ཐོབ། ལམ་ནི་ཉེ་ལམ་དེར་རྫོགས་པའོ། ཞེས་གསུངས་པས།དེ་ཕྱིར་གསང་སྔགས་ཀྱི་སྒོར་འཇུག་པ་ལ་དོན་གསུམ་སྟེ། 

གསང་སྔགས་ཀྱི་ལམ་སྒོ་དབྱེ་བ་དང། གསར་ན་བསྲེ་བ་དང༌། རྙིང་ན་བསྣན་པའོ།དང་པོ་གསར་པ་འཇུག་པའི་གཞི་རྟེན་ནམ་སྣོད་དུ་རུང་བར་བྱེད་པ་ལ་གསུམ་སྟེ། ཁྲུས་བྱ་བ་དང།སེམས་བསྐྱེད་པ་དང༌། སྐྱབས་སུ་འགྲོ་བའོ། དེ་ཡང་ཐོག་མར་ཁྲུས་བྱ་བ་ལ་ཡང༌། གསང་སྔགས་ཀྱི་རྟེན་དུ་རུང་ཞིང་སྒྲིབ་པ་སྦྱོང་བ་ཡིན་ཏེ། བུམ་པ་རྒྱན་དང་ཆས་པའི་ནང་དུ། རྩ་བའི་སྙིང་པོ་བཟླས་ཤིང་ལྷ་ཚོགས་སུ་བསྐྱེད། བདག་ཡི་དམ་དུ་གསལ་བའི་ངང་ནས། རྩ་བའི་སྔགས་བཞུགས་ལ། ཨཀྱོ་མར་ལ་གུ་དུན་ནི། ཨཀྱོ་ཏིང་ལ་གུ་དུན་ནི། ཨཀྱོ་ཚངས་ལ་གུ་དུན་ནི། གུ་ཤུད་དྷོ་སལེ་སངེ་ཡེ་སྭཧཱ། ཞེས་བརྒྱ་རྩ་བརྗོད་ལ་བུམ་པར་སྔགས། དེ་ནས་ཨ་ཨཱོཾ་ཧཱུྃ་ས་ལེ་ལྷན་ནེ། ཞེས་བརྗོད་པས།བུམ་པའི་ལྷ་རྣམས་འོད་དུ་ཞུ་ནས། ཡེ་ཤེས་དག་པའི་ཆུ་བོ་བག་སྒྲིབ་དག་པའི་བདུད་རྩིར་གྱུར་ནས། ཚེ་རབས་ལས་ཀྱི་སྡིག་སྒྲིབ་དག་པར་བསམ་ལ། ཨཱོཾ་བུམ་པ་ལྷའི་གཞལ་ཡས་ཁང༌། བཅུད་ནི་ཡེ་ཤེས་ལྷ་ཡི་སྐུ། ཆུ་ནི་ཡེ་ཤེས་བདུད་རྩིའི་རྒྱུན། ཡེ་ཤེས་རྒྱུན་གྱི་ཆུ་བོ་ཡིས། དིང་གི་སྣོད་ལྡན་བུ་ལ་ཁྲུས་གསོལ་བས། ཚེ་རབས་ཐོག་མ་མེད་པ་ནས། ད་ལྟའི་དུས་འདིར་སྐྱེས་པ་ཡན་ཆད་ཀྱི། བག་ཆགས་སྡིག་སྒྲིབ་དག་གྱུར་ཅིག། ཅེས་བརྗོད་ལ།ལས་དཔོན་གྱིས་མཆེད་ལྕམ་རྣམས་ལ་ཁྲུས་བྱའོ། གཉིས་པ་སེམས་སྐྱེད་པ་ལ་ཡང༌། གསང་སྔགས་ཀྱི་སྡོམ་པའི་རྟེན་དུ་གཡུང་དྲུང་སེམས་དཔའི་སྡོམ་པ་བྱང་ཆུབ་མཆོག་དུ་སེམས་བསྐྱེད་ཐོབ་དགོས་ཏེ། ཚད་མེད་པ་ལ་གཞུང་སྔོན་དུ་སོང་བ་ཡེ་ཤེས་གསུངས་པས། དེ་ལ་ལྔ་སྟེ། སེམས་བསྐྱེད་པའི་ཡུལ་དང༌། རྟེན་དང༌། སྐྱོན་ཡོན་དང༌། ཆོ་ག་དང༌། བསླབ་བྱ་བསྟན་པའོ། དང་པོ་ཡུལ་ནི་ནམ་མཁས་ཁྱབ་ཚད་ལ་དམིགས་པ་ཡིན་ཏེ། དེ་ཡང་སེམས་ཅན་ཐམས་ཅད་རང་གི་ཕ་མ་བུ་གཉེན་དུ་མ་སོང་བ་གང་ཡང་མེད་པ་སྟེ། འཁོར་བ་ཐོག་མེད་མཐའ་རིང་འདི་དག་ལ། སེམས་ཅན་ཐམས་ཅད་གཅིག་ལ་གཅིགའབྲེལ་བར་མ་གྱུར་གང་ཡང་མེད། ཅེས་གསུངས་པས། སེམས་ཅན་དེ་དག་ཀྱང་འཁོར་བར་འཁྱམས་ཤིང༌།བསྡུག་བསྔལ་སྣ་ཚོགས་ལ་སྤྱོད་པ་སྙིང་རྗེ་བས།དེ་དག་ཐར་པ་འཐོབ་པའི་དོན་དུ་སེམས་བསྐྱེད་དོ། གཉིས་པ་རྟེན་ནི་ལམ་གྱི་སྒོར་འཇུག་ཅིང་ཐེག་པ་ཆེན་པོའི་རིགས་སད་པ་གཅིག་ལ་བྱ་སྟེ།རྒྱུད་ལས། བག་ཆགས་གཡོས་ནས་སད་པ་ཡི། དགའ་དད་མོས་ནས་འདུན་སྤྱོད་པའི། གང་ཟག་རྐྱེན་གྱིས་སད་པའོ། ཞེས་གསུངས་པ་དག་གོ། གསུམ་པ་སྐྱོན་ཡོན་ལ། སེམས་མ་བསྐྱེད་པའི་སྐྱོན་དང། བསྐྱེད་པའི་ཡོན་ཏན་གཉིས་སོ། དང་པོ་སྐྱོན་ལ་སྤྱི་དང་བྱེ་བྲག་གཉིས་ལས། སྤྱིའི་སྐྱོན་ནི་བྱང་ཆུབ་མཆོག་དུ་སེམས་མ་བསྐྱེད་ན་སྐྱོན་དུ་མ་འབྱུང་སྟེ། ལམ་རྒྱུད་ལ་མི་སྐྱེ། འབྲས་བུ་སངས་རྒྱས་མི་ཐོབ། གནས་སྐབས་སུ་ཡང་བསམ་པ་མི་འགྲུབ་ཅིང༌། གཞན་དོན་མི་ནུས། འཁོར་བའི་གནས་སུ་འཁྱམས་ཤིང་སྡུག་བསྔལ་ལ་སྤྱོད་པར་འགྱུར་བ་སྟེ། སེམས་བསྐྱེད་སྔོན་དུ་མ་སྐྱོལ་ཞིང་པའི་རྒྱུ་བརྗེད་འདྲ། ཞེས་པས། དཔེར་ན་སོ་ནམ་པས་ས་བོན་མ་བཏབ་པར་ཆུ་ལུད་ལ་སོགས་བྱས་ཀྱང་འབྲས་བུ་མི་འཁྲུངས་པ་བཞིན། སེམས་མ་བསྐྱེད་ན་འདུས་བྱས་ཀྱི་དགེ་རྩ་ཅི་སྤྱད་ཀྱང༌། བྱང་ཆུབ་ཀྱི་རྒྱུར་མི་འགྱུར་ཏེ། གནས་སྐབས་ཀྱི་འབྲས་བུ་ལས་མི་འབྱུང་ངོ༌།གཉིས་པ་བྱེ་བྲག་ནི་ཀུན་གཞི་བྱང་ཆུབ་ལ་ངོ་སྤྲོད་སེམས་མ་བསྐྱེད་ན། འགྲོ་བ་སེམས་ཅན་ཐུགས་རྗེའི་སྐྱབས་འོག་དུ་མི་ཆུད་ཅིང༌། བར་ཆོད་གནས་སུ་ཞི་བར་མི་ནུས། འཁོར་བ་ལ་མི་ཆགས་པའི་རྟུལ་ཤུགས་ཀྱི་སེམས་མ་བསྐྱེད་ན། གསང་བ་མ་རིག་པ་ལས་གྱུར་པའི་བགེགས་དང་ལོག་འདྲེན་ཞི་བར་མི་ནུས། འགྲོ་དྲུག་ལ་ཐུགས་རྗེ་བཞི་ལྡན་དུ་སེམས་མ་བསྐྱེད་ན། འགྲོ་དྲུག་གི་སེམས་ཅན་སྡུག་བསྔལ་ལས་སྒྲོལ་བར་མི་ནུས་ཤིང༌། ནང་རྣམ་པར་རྟོག་པ་ལས་གྱུར་པའི། བགེགས་དང་བར་ཆོད་གནས་སུ་ཞི་བར་མི་ནུས། དགྲ་བློ་བུར་ལ་ཚད་མེད་ཟུང་འཇུག་དུ་སེམས་མ་བསྐྱེད་ན། ཕྱི་ལས་ལ་གྱུར་པའི་བགེགས་དང་བར་ཆོད་གནས་སུ་ཞི་བར་མི་འགྱུར་སྟེ། སེམས་བསྐྱེད་མ་བཞིའི་དོན་དང་མ་ལྡན་ན། བར་ཆོད་གནས་སུ་ཞི་བར་མི་འགྱུར་ཞིང༌། དོན་རྣམས་གང་གི་འབྲས་བུ་ཐོབ་མི་འགྱུར། ཅེས་གསུངས་སོ།གཉིས་པ་ཡོན་ཏན་ལ་ཡང་སྤྱི་དང་བྱེ་བྲག་གཉིས་ལས། དང་པོ་སེམས་བསྐྱེད་པས་ལམ་རྒྱུད་ལ་སྐྱེ། འབྲས་བུ་སངས་རྒྱས་མྱུར་དུ་ཐོབ་པར་འགྱུར་བ་དང་གནས་སྐབས་སུ་ཡང་བསམ་པ་ཐམས་ཅད་འགྲུབ་ཅིང་། གཞན་དོན་རྒྱ་ཆེན་ནུས་པ་དང་། རྐྱེན་དང་བར་ཆོད་ཞི་བ་དང༌། འཁོར་བའི་སྡུག་བསྔལ་ལས་སྐྱབས་ནས་ཐར་པ་ཐོབ་པ་དང༌། དགེ་བའི་རྩ་བ་ཅི་བྱས་པ་ཐམས་ཅད་བྱང་ཆུབ་ཀྱི་རྒྱུར་འགྱུར་པ་སྟེ། སེམས་བསྐྱེད་དོན་དང་ལྡན་པའི་གཤེན་རབ་ནི། མཁའ་ལ་ཆར་འབབ་རྒྱ་མཚོའི་རུ་མ་འདྲ། ཞེས་སེམས་ལུང་ལས་གསུངས་པའོ། གཉིས་པ་བྱེ་བྲག་ལ། ཀུན་གཞི་རིག་པ་ལ་ངོ་སྤྲོད། སེམས་བསྐྱེད་པས་འགྲོ་བ་སེམས་ཅན་ཐུགས་རྗེའི་སྐྱབས་འོག་དུ་ཚུད་ཅིང་བར་ཆོད་ཞི་བར་འགྱུར། འགྲོ་དྲུག་གི་སེམས་ཅན་ལ་ཐུགས་རྗེ་བཞི་ལྡན་དུ་སེམས་བསྐྱེད་པས། འགྲོ་དྲུག་གི་སེམས་ཅན་སྡུག་བསྔལ་ལས་ཐར་བར་སྒྲོལ་ཅིང༌། ནང་རྣམ་པར་རྟོག་པ་ལས་གྱུར་པའི་བགེགས་དང་བར་ཆོད་ཞི་བར་འགྱུར། འཁོར་བ་ལ་མི་ཆགས་པ་རྟུལ་ཤུགས་ཀྱི་སེམས་བསྐྱེད་པས། རྟུལ་ཤུགས་དྲག་པོའི་སྟོབས་ཀྱིས་གསང་བ་མ་རིག་པའི་བགེགས་དང་ལོག་འདྲེན་ཞི་བར་འགྱུར།དགྲ་བགེགས་བློ་བུར་པ་ལ་ཚད་མེད་ཟུང་འཇུག་དུ་སེམས་བསྐྱེད་པས། ཕྱི་ལས་ལ་གྱུར་པའི་བགེགས་དང་བར་ཆོད་ཞི་བར་འགྱུར་བ་སྟེ། སེམས་བསྐྱེད་མ་བཞིའི་དོན་དང་ལྡན་པ་ན། བར་ཆོད་ཟློག་པའི་མཆོག་དུ་དེ་འགྱུར་རོ། བཞི་པ་ཆོ་ག་ལ་ཐོག་མར་བློ་བཅོས་པར་བྱ་སྟེ། འདི་ལྟར་ནམ་མཁས་ཁྱབ་པའི་སེམས་ཅན་འདི་དག་ཐམས་ཅད། རང་གི་ཕ་མར་མ་གྱུར་པ་གང་ཡང་མེད་ལ། འདི་རྣམས་འཁོར་བའི་སྡུག་བསྔལ་དཔག་དུ་མེད་པ་ལ་སྤྱོད་པ་སྙིང་རེ་རྗེ་བས། འདི་དག་གི་དོན་དུ་བདེ་བ་ཐོབ་པར་སངས་རྒྱས་ཐོབ་པར་བྱས་ལ། གཟོད་འདི་དག་འདྲེན་པའི་སྟོན་པ་བྱ་སྙམ་དུ་སེམས་བསྐྱེད་པ་ནི། དམག་དཔོན་དཔའ་བོ་ལྟ་བུར་སེམས་བསྐྱེད་པ་སྟེ། བདག་མཐར་གྲུབ་པ་རྫོགས་པའི་དུས་རྟིང་ལ། གཞན་དག་སེམས་ཅན་འདྲེན་པར་སྨོན་ལམ་བཏབ། ཅེས་གསུངས་སོ།དེ་ནས་བློ་བཅོས་ནས་ཆོ་ག་བརྗོད་དེ། ཕྱོགས་བཅུ་དུས་གསུམ་ཀྱི་བདེ་བར་གཤེགས་པ་རྣམས་བདག་ལ་དགོངས་སུ་གསོལ། ས་ལ་གནས་པའི་གཡུང་དྲུང་སེམས་དཔའ་རྣམས་བདག་ལ་དགོངས་སུ་གསོལ། བླ་མ་རིན་པོ་ཆེ་བརྒྱུད་པ་དང་བཅས་པ་རྣམས་བདག་ལ་དགོངས་སུ་གསོལ། བདག་མིང་འདི་ཞེས་བྱ་བས།དུས་འདི་ནས་བཟུང་ནས་གཡུང་དྲུང་སྙིང་པོ་ལ་མཆིས་ཀྱི་བར་དུ་རྩ་བ་མ་རིག་པ་རིག་པའི་ཡེ་ཤེས་སུ་ངོ་སྤྲད། ཀུན་གཞི་རིག་པའི་དོན་ལ་སེམས་བསྐྱེད་པར་བགྱིའོ། ཀུན་བརྟགས་ཡུལ་དུ་བྱས་སྟེ་འཁོར་བ་ལ་མི་ཆགས་པའི་རྟུལ་ཤུགས་ཀྱི་སེམས་བསྐྱེད་པར་བགྱིའོ། འགྲོ་དྲུག་གི་སེམས་ཅན་ཡུལ་དུ་བྱས་སྟེ། ཐུགས་རྗེ་ཆེན་པོ་བཞི་ལྡན་དུ་སེམས་བསྐྱེད་པར་བགྱིའོ། དགྲ་བློ་བུར་པ་བསླུ་བའི་ཁ་འདྲེན་ཡུལ་དུ་བྱས་སྟེ། ཚད་མེད་ཟུང་འཇུག་ཏུ་སེམས་བསྐྱེད་པར་བགྱིའོ། ཞེས་པ་ལན་གསུམ་གྱི་བར་དུ་རྗེས་ཟློསབྱའོ། ལྔ་པ་བསླབ་བྱ་ལ་གསུམ་སྟེ། སྤང་བར་བྱ་བ་དང༌། སྒྲུབ་པར་བྱ་བ་དང༌། སྤེལ་བར་བྱ་བ་ལ་བསླབ་པའོ། དང་པོ་སྤང་བ་ལ། གྲོགས་དམན་པ་ཞེས་བྱ་སྟེ།སྡིག་པ་ཅན་གྱི་གྲོགས་དང༌། ལྟ་བ་ལོག་པ་ཕྱི་རོལ་བའི་གྲོགས་དང༌། རང་དོན་གཙོར་བྱེད་པ་ཐེག་པ་འོག་མ་པའི་གྲོགས་དང་མི་འགྲོགས་པར་བྱའོ། བསམ་པ་དམན་པ་ཞེས་བྱ་སྟེ། ཉོན་མོངས་པའི་བསམ་པ་ཡིད་ལ་བྱེད་པ་དང༌། རང་དོན་ཁོ་ན་ཡིད་ལ་བྱེད་པ་སྤང་བར་བྱའོ།  སྤྱོད་པ་དམན་པ་ཞེས་བྱ་སྟེ། མི་དགེ་བ་བཅུ་དང༌། མཚམས་མེད་པ་ལྔ་དང༌། ཉེ་བ་ལྔ་དང༌། ལྕི་བ་བཞི་དང༌། ལོག་པ་བརྒྱད་ལས་སོགས་པའི་མི་དགེ་བ་ཐ་དག་ཡོངས་སུ་སྤང་བར་བྱའོ། གཉིས་པ་ལ་སྒྲུབ་པར་བྱ་བ་ལ་བྱང་ཆུབ་མཆོག་ཏུ་སེམས་བསྐྱེད་པ། རབ་ཀྱིས་དུས་དྲུགའབྲིང་གིས་དུས་བཞི། ཐ་མས་ཀྱང་དུས་གཉིས་སུ་སྦྱང་བར་བྱ་ཞིང༌། ལུས་དང་ལོངས་སྤྱོད་གང་བས་ཀྱང་སེམས་བསྐྱེད་པའི་སྡོམ་པ་ལ་གཅེས་སྤྲས་སུ་བྱའོ། གསུམ་པ་སྤེལ་བར་བྱ་བ་ནི། ཡུལ་གཉིས་དྲན་པའི་སྟོབས་ཀྱིས་བསྐུལ་བཏབ་ནས། ཅེས་གསུངས་པས། སངས་རྒྱས་ཀྱི་ཡོན་ཏན་ལ་བརྟེན་ནས་དད་པ་བསྐྱེད་པ་དང༌། སེམས་ཅན་གྱི་སྡུག་བསྔལ་ལ་བརྟེན་ནས་སྙིང་རྗེ་བསྐྱེད་ཅིང༌། སེམས་དཔའི་ཡོན་ཏན་རྣམས་དྲན་པར་བྱས་ལ་རྗེས་སུ་ཡི་རངས་བསྒོམ་པར་བྱའོ། གསུམ་པ་གསང་སྔགས་ཀྱི་སྡོམ་པ་རྒྱུད་ལ་སྐྱེ་བར་སེམས་བསྐྱེད་པ་དེའི་བར་ཆོད་ཞི་བའི་ཕྱིར་དུ་སྐྱབས་སུ་འགྲོ་དགོས་ཏེ། སྡོམ་པའི་སྔོན་དུ་བདེ་བར་གཤེགས་པ་ལ་སྐྱབས་སུ་འགྲོ་ཞེས་གསུངས་པས།

      སྐྱབས་སུ་འགྲོ་བ་ལ་དོན་ལྔས་བསྟན་ཏེ། སྐྱབས་སུ་འགྲོ་བའི་ཡུལ་དང༌། རྟེན་དང༌། སྐྱབས་སུ་སོང་མ་སོང་གི་སྐྱོན་ཡོན་དང༌། ལས་ཆོག་བརྗོད་པ་དང༌། བསླབ་བྱ་བསྟན་པའོ། དང་པོ་ཡུལ་ནི་ཡུལ་མཆོག་རྣམ་པ་བཞི་སྟེ། དེ་ཡང་བླ་མ་བདེར་གཤེགས་དང༌། རྟེན་གསུམ་དང༌། ཕྱོགས་བཅུའི་གཤེན་རབ་རྣམས་ཡིན་ཏེ།འཁོར་བའི་འཇིགས་པ་ལ་སྐྱོབ་ཅིང་ལམ་གྱི་རྟེན་ལ་འཁོད་པའི་ནུས་པ་དང་ལྡན་པ་དེའོ། གཉིས་པ་སྐྱབས་སུ་འགྲོ་བའི་རྟེན་ནི། འཁོར་བའི་སྡུག་བསྔལ་ལས་ཐར་བར་འདོད་པའི་རྟེན། གསང་སྔགས་ཀྱི་སྒོར་འཇུག་པ་རང་ཅག་རྣམས་ལགས། གསུམ་པ་སྐྱོན་ཡོན་ལ།སྐྱབས་སུ་མ་སོང་བའི་སྐྱོན་དང། སོང་བའི་ཡོན་ཏན་གཉིས་སོ། དང་པོ་ལ་སྤྱི་དང་བྱེ་བྲག་གཉིས་ལས། དང་པོ་ཡུལ་ཁྱད་པར་ཅན་ལ་སྐྱབས་སུ་མ་སོང་ན་འཁོར་བའི་འཇིགས་པ་ལས་སྐྱོབ་པར་མི་ནུས།ཐར་པའི་འབྲས་བུ་སྒྲུབ་པར་མི་ནུས། ཚུལ་ཁྲིམས་སྡོམ་པའི་རྟེན་དུ་མི་འགྱུར།ལམ་གྱི་བར་ཆོད་ཞི་བར་མི་ནུས་ཤིང༌། འཁོར་བའི་གནས་སུ་བརྒྱུད་པར་འགྱུར་བ་ཡིན་ཏེ། སེམས་ལུང་ལས། གཡུང་དྲུང་གནས་བཞིར་སྐྱབས་སུ་མ་སོང་ན། བདུད་དང་མུ་སྟེགས་འཁོར་བའི་བསླུ་ཁྲིད་འབྱུང་ཤེས་གསུངས་མོ། གཉིས་པ་བྱེ་བྲག་ལ།དཔོན་གསས་བླ་མ་ལ་སྐྱབས་སུ་མ་སོང་ན། འཁོར་བའི་རྒྱ་མཚོ་ལས་མི་སྒྲོལ། བདེར་གཤེགས་ལ་སྐྱབས་སུ་མ་སོང་ན། བྱིན་རླབས་དང་མཐུ་རྩལ་མི་འབྱུང༌། རྟེན་གསུམ་ལ་སྐྱབས་སུ་མ་སོང་ན། བག་ཆགས་དང་སྒྲིབ་པ་མི་བྱང༌། གཤེན་རབ་ལ་སྐྱབས་སུ་མ་སོང་ན་བར་ཆོད་བགེགས་ཀྱི་དབང་དུ་འགྱུར་བའོ། གཉིས་པ་སྐྱབས་སུ་སོང་བའི་ཡོན་ཏན་ལ་ཡང་གཉིས་ལས། དང་པོ་སྤྱིའི་ཡོན་ཏན་ནི། དེའི་ཕྱིར་ཡུལ་ཁྱད་པར་ཅན་ལ་སྐྱབས་སུ་སོང་ན་ཡོན་ཏན་དུ་མ་འབྱུང་སྟེ། འཁོར་བའི་འཇིགས་པ་ལས་སྐྱོབ་ཅིང་ངན་འགྲོར་མི་ལྟུང་བ་དང༌། རྐྱེན་ཕྱི་ནང་གི་བར་དུ་གཅོད་པ་ཞི་བར་ནུས་པ་དང༌། ཚུལ་ཁྲིམས་སྡོམ་པའི་རྟེན་དུ་འགྱུར་བ་དང༌། ལམ་གྱི་རྟེན་དུ་འགྱུར་ཞིང་གཞན་དོན་ཕུན་གསུམ་ཚོགས་པ་ནུས་པའི་ཡོན་ཏན་འབྱུང་བའོ། གཉིས་པ་བྱེ་བྲག་ལ། བླ་མར་སྐྱབས་སུ་སོང་ན། འཁོར་བའི་རྒྱ་མཚོ་ལས་ཐར་པར་སྒྲོལ་བའི་ཡོན་ཏན་འབྱུང༌། དུས་གསུམ་བདེར་གཤེགས་ལ་སྐྱབས་སུ་སོང་ན་བྱིན་རླབས་དང་མཐུ་རྩལ་འབྱུང༌། རྟེན་གསུམ་ལ་སྐྱབས་སུ་སོང་ན། བག་ཆགས་དང་སྒྲིབ་པ་བྱང༌། སེམས་དཔའ་ལ་སྐྱབས་སུ་སོང་ན། བར་ཆོད་བགེགས་ཀྱིས་མི་ཚུགས། གཡུང་དྲུང་གནས་བཞིར་སྐྱབས་སུ་སོང་བ་ན། བསྲུང་བ་དམ་པའི་མཆོག་དུ་དེ་འགྱུར་རོ། ཞེས་གསུངས་སོ།བཞི་པ་ཆོ་ག་ལ་དང་པོ་དམིགས་པའི་ཡུལ་གསལ་བཏབ་སྟེ། དེ་ཡང་རང་གི་མདུན་གྱི་བར་སྣང་ལ་རྩ་བའི་བླ་མ་རྫོགས་སྐུའི་ཆ་ལུགས་ལ།བླ་མ་རྒྱུད་པ་དང་བཅས་པས་སྐོར་བ། དེ་ལ་དུས་གསུམ་གྱི་བདེ་བར་གཤེགས་པ་དང་གཡུང་དྲུང་སེམས་དཔའི་ཚོགས་དཔག་ཏུ་མེད་པ་དང༌། བདེ་བར་གཤེགས་པ་རྟེན་གསུམ་དང༌། བོན་སྐྱོང་རྣམས་ཀྱིས་བསྐོར་ནས་བཞུགས་པར་བསམ། དེ་ལ་བདག་དང་སེམས་ཅན་ཐམས་ཅད་ཀྱིས་མོས་པ་དང་གུས་པས་སྐྱབས་སུ་འགྲོ་སྟེ། དེ་ཡང་བླ་མ་དང་བདེར་གཤེགས་མིན་པའི་རེ་ས་མེད་སྙམ་པའི་མོས་པས།བླ་མ་བདེར་གཤེགས་ཀྱི་ཐུགས་རྗེས་བདག་དང་སེམས་ཅན་ཐམས་ཅད། འཁོར་བ་སྡུག་བསྔལ་གྱི་རྒྱ་མཚོ་ལས་སྐྱོབ་ཏུ་གསོལ་སྙམ་པ་དང༌། རྐྱེན་ཕྱི་ནང་གི་བར་ཆོད་ལས་ཀྱང་སྐྱོབ་ཏུ་གསོལ་སྙམ་དུ་བསམ་ལ་ཆོ་ག་བརྗོད་དེ། བདག་དང་འགྲོ་བ་སེམས་ཅན་ཐམས་ཅད་དུས་གསུམ་གྱི་བླ་མ་དང་བདེ་བར་གཤེགས་པ་རྣམས་ལ་ཕྱག་འཚལ་ཞིང་སྐྱབས་སུ་མཆིའོ། ནོར་བུ་ལྟ་བུ་གཙུག་གི་རྒྱན་དུ་དཀོན། མ་རིག་མིག་འབྱེད་སྣང་གསལ་སྒྲོན་མེ་མཆོག། སྐུ་གསུམ་འབྱུང་གནས་དཔོན་གསས་བླ་མ་ལ། གུས་པས་ཕྱག་འཚལ་དྭངས་བས་སྐྱབས་སུ་མཆིའོ། ཨ་ཨཱོཾ་ཧཱུྃ། ཉིན་སྐར་ལྟ་བུ་ཐུགས་རྗེའི་འབྱུང་གནས་དཀོན། ཐར་ལམ་བདེ་འབྱེད་ས་མཁན་ལམ་པའི་མཆོག འགྲོ་བའི་གྷོན་༼མགོན༽སྐྱབས་དུས་གསུམ་བདེར་གཤེགས་ལ། གུས་པས་ཕྱག་འཚལ་དྭངས་བས་སྐྱབས་སུ་མཆིའོ། ཨ་ཨཱོཾ་ཧཱུྃ༌། གཞའ་ཚོན་ལྟ་བུ་སྣང་སྲིད་རྒྱན་དུ་དཀོན། ལྐུགས་པ་ཁ་འབྱེད་གྲོལ་བ་ལྗགས་ཀྱི་མཆོག། བསྟན་པའི་རྒྱལ་མཚན་སྐུ་གདུང་གསུང་རབ་ལ། གུས་པས་ཕྱག་འཚལ་དྭངས་བས་སྐྱབས་སུ་མཆིའོ། ཨ་ཨཱོཾ་ཧཱུྃ། ཨུད་འབར་ལྟ་བུ་དགེ་ལ་འདུན་སྤྱོད་དཀོན། བློ་སྒྲམ་སྒོ་འབྱེད་འཕྲུལ་གྱི་ལྡེ་མིག་མཆོག འགྲོ་བའི་འདྲེན་སྟོན་ཕྱོགས་བཅུའི་གཤེན་རབ་ལ། གུས་པས་ཕྱག་འཚལ་དྭངས་བས་སྐྱབས་སུ་མཆིའོ། ཨ་ཨཱོཾ་ཧཱུྃ།ཞེས་ལན་གསུམ་དུ་རྗེས་ཟློས་བྱ་སྟེ། བརྗོད་པ་རྣམ་གསུམ་སྡོམ་པ་ཐོབ་པའི་དུས་ཞེས་གསུངས་སོ། ལྔ་པ་བསླབ་བྱ་ལ་དེ་ལྟར་བླ་མ་ལ་སྐྱབས་སུ་སོང་ན། སྐྱེ་བོ་དྲེགས་པ་ཅན་ལ་སྨོན་པ་མི་འབུལ།ཞེས་གསུངས་པས་འཇིག་རྟེན་གྱི་སྐྱེ་བོ་བཙན་པ་དང༌། ཕྱུག་པ་དང་ལྡན་པ་ལ་བླ་མའི་སྨོན་པ་མི་བྱ། རང་ཡང་སྨོན་པ་མི་བཏིང༌། བདེ་བར་གཤེགས་པ་ལ་སྐྱབས་སུ་སོང་ན། འཇིག་རྟེན་པའི་ལྷ་ལ་ཕྱག་མི་འཚལ། ཞེས་གསུངས་པས། འཇིག་རྟེན་པའི་ལྷ་ཕྱྭ་དང་དབང་ཕྱུག་ཚངས་པ་དང༌། བདུད་དང༌། དམུ་དང༌། འཚམས་དང༌། བཙན་ལ་སོགས་པ་རྣམས་ལ་སྐྱབས་ཡུལ་དང་ཕྱག་མི་བྱའོ། བདེ་བར་གཤེགས་པའི་རྟེན་གསུམ་ལ་སྐྱབས་སུ་སོང་ན། ལྷ་སྲིན་རྡོལ་པའི་རྟེན་ལ་རྒྱལ་མཚན་མི་བཙུགས་ཅེས་གསུངས་པས༌། འཇིག་རྟེན་པའི་ལྷ་ཀླུ་དྲེགས་པ་ཅན་གྱི་རྟེན་དང༌། ཕྱི་རོལ་པའི་རྟེན་ལ་ཕྱག་སྐྱབས་ཀྱི་ཡུལ་མི་བྱའོ། ཕྱོགས་བཅུའི་གཤེན་རབ་ལ་སྐྱབས་སུ་སོང་ན་མུ་སྟེགས་ཅན་དང་མི་འགྲོགས་ཞེས་གསུངས་པས།ལྟ་བ་ལོག་པར་གོལ་བའི་མུ་སྟེགས་བྱེད་དང༌།སྡིག་པ་ཅན་དང་ལོག་ལྟ་ཅན་གྱི་གང་ཟག་ལ་ཕྱག་སྐྱབས་ཀྱི་ཡུལ་མི་བྱའོ། དེའི་ཕྱིར་དེ་དག་ལས་འདས་ན་སྐྱབས་འགྲོ་ཉམས་པར་འགྱུར་ལ། ཡུལ་གོང་མ་དག་ལ་དུས་དྲུག་གམ་བཞི་འམ་གཉིས་སུ་སྐྱབས་སུ་འགྲོ་ཞིང་མོས་པ་བྱ། དེ་ལྟ་བུའི་སྐྱབས་འགྲོ་བྱེད་པ་དང་བྱས་པ་དང་འདུན་པ་དག་ལ། རྗེས་སུ་ཡི་རངས་བའི་མོས་པ་ཡང་ཡང་བསྐྱེད་པར་བྱ་སྟེ། རྗེས་སུ་ཡི་རངས་དགེ་རྩ་བསམ་མི་ཁྱབ། ཅེས་གསུངས་པས་སོ། སྐབས་འདིར་སོ་སོ་ཐར་པའི་སྡོམ་པ་ཅི་རིགས་སུ་ཕོག  ཅེས་གོང་མ་ཀུན་གྱིས་གསུངས་ཏེ། ཐེག་པ་ཆེན་པོ་གསང་སྔགས་ཀྱི་རྟེན་དུ་སོ་སོ་ཐར་པའི་སྡོམ་པ་ལ་དགོས་རྒྱུ་མེད་དེ། བོན་ནང་རྒྱུད་ལས་ཐར་པ་ཐོབ་པ། བར་ལྷ་འོད་གསལ་གཡུང་དྲུང་སེམས་དཔའ་རྣམས། ལྷ་ལ་རབ་ཏུ་བྱུང་བ་མེད་ཅེས་གསུངས་སོ། འོན་ཀྱང་སོ་ཐར་རྒྱུད་ལ་ཡོད་ཀྱང༌། ཡོན་ཏན་དུ་འགྱུར་བ་ནི། སྡོམ་པ་གསུམ་ལྡན་དུ་འགྱུར་བ་སྟེ། དེ་ཡང་སྣ་ཚོགས་རྒྱན་ལྟར་འདོད་པ་དང༌། གནས་འགྱུར་དུ་འདོད་པ་གཉིས་ལས། འདི་ནི་གནས་འགྱུར་གྱི་ལུགས་ཡིན་ཏེ། འོག་མས་གོང་མའི་ཁྲིམས་རྣམས་ལེན་འདོད་ན། འོག་མ་མ་སྤངས་གོང་མ་རྒྱས་པར་ཚང༌། ཞེས་གསུངས་པས་ན། གནས་སྐབས་དང་སྦྱར་བར་བྱའོ། 

      གཉིས་པ་གསར་ན་བསྲེ་བ་ལ། གསང་སྔགས་ཐེག་པ་ཆེན་པོའི་སྒོར་འཇུག་པའི་ཚུལ་ལ་གསུམ་སྟེ། བསྲེ་བ་རྣམ་གསུམ་བྱ་བ་དང༌། དམ་ཚིག་བཤད་པ་དང༌། གསང་མཚན་བཏགས་པའོ། དང་པོ་བསྲེ་བ་རྣམ་པ་གསུམ་ལ། དཔོན་གསས་དང༌། མཆེད་གྲོགས་དང། ཡི་དམ་གྱི་ལྷ་ལ་བསྲེ་བའོ། དང་པོ་དཔོན་གསས་ལ་བསྲེ་བ་ལ། ལས་ཀྱི་སློབ་དཔོན་གྱིས་སྣ་དྲངས་ལ་ཕྱག་འཚལ་ཏེ། མི་འགྱུར་གཡུང་དྲུང་འཆི་མེད་སྐྱེས་ནས་བརྩན། གཟི་བརྗིད་ལྡན་པ་གསེར་གྱི་རི་རབ་སྐུ། གཤེན་རབ་བླ་མའི་སྐུ་ལ་ཕྱག་འཚལ་ལོ། གཏིང་དཔག་བརྟག་དཀའ་ཤིན་ཏུ་ཚོད་མི་ཟིན། ཟབ་ཅིང་ཆ་ཕྲ་རྒྱ་མཚོ་མཁའ་ཡངས་ཀློང༌། གཤེན་རབ་བླ་མའི་གསུང་ལ་ཕྱག་འཚལ་ལོ། ཡངས་ཤིང་རྒྱ་ཆེ་མཚན་མ་ཡོངས་དང་བྲལ། མི་སྐྱེ་མི་གྷག་༼འགག༽ནམ་མཁའི་རང་བཞིན་ཅན། གཤེན་རབ་བླ་མའི་ཐུགས་ལ་ཕྱག་འཚལ་ལོ། ཞེས་བརྗོད་ལ་ཕྱག་འཚལ་ལོ། དེ་ནས་ཞུ་དོན་གསོལ་ཏེ། ཕྱག་རྟེན་ཅི་འབྱོར་ཕུལ་ནས་འདི་སྐད་དོ། ཀྱཻ་དཔོན་གསས་བླ་མ་ལགས།བདག་མིང་འདི་ཞེས་བགྱི་བས། དུས་འདི་ནས་བཟུང་ནས། ནམ་གསས་མཁར་དོན་ལ་མཆིས་ཀྱི་བར་དུ།སྐུ་གསུང་ཐུགས་ཀྱི་དམ་ཚིག་མི་འཆལ་སྲུང༌། ཁྱེད་ཀྱི་སྐུ་གསུང་ཐུགས་ཉིད་ཅི་འདྲ་བར།བདག་ཀྱང་དེ་དང་འདྲ་བར་མཛད་དུ་གསོལ། ཞེས་ཞུ་བ་དབུལ་ལོ།བླ་མས་གཡུ་འབྲང་བདུད་རྩི་ཐིག་ལེ་དཀར་དམར་སྣུམ་གསུམ་དུ་བྱིན་གྱིས་རླབས་ནས་ཕྱག་དུ་བཞེས་ལ་འདི་སྐད་དོ།ཁྱེད་ནི་དམ་ཚིག་མི་འཆལ་སྲུང༌། གནས་གསུམ་གསལ་བའི་དཀྱིལ་འཁོར་དུ།ཐིག་ལེ་གསུམ་གྱི་ཆོ་འཕྲུལ་ལས། གནས་གསུམ་གསལ་བར་འབྲུ་གསུམ་སྒོམ།གཉིས་སུ་མེད་པར་བསྒོམ་པར་བྱའོ། ཞེས་བརྗོད་ལ་ཐིག་ལེ་དཀར་དམར་སྣུམ་གསུམ་བླངས་ཏེ།རང་གི་སྤྱི་བོ་ལྕེ་སྟེང་སྙིང་ཁ་གསུམ་དུ་བཞག་ལ།རང་གི་ཡིག་འབྲུ་གསུམ་ལ་འབྲུ་གསུམ་སྤྲོས་ནས་སློབ་མའི་གནས་གསུམ་དུ་ཐིམ།སྐུ་གསུང་ཐུགས་སུ་གྲུབ་ནས། བདག་དང་སློབ་མ་དབྱེར་མེད་པ་གཅིག་ཏུ་དམ་ཚིག་འདྲེས་པར་བསམ།སློབ་མས་ཀྱང་དེ་ལྟར་བསམ་སྒོམས་བྱེད་དུ་འཇུག་གོ།

      གཉིས་པ་མཆེད་གྲོགས་ལ་བསྲེ་བ་ལ།ལས་དཔོན་གྱིས་སྣ་དྲངས་ལ་འདི་སྐད་དོ། དཔོན་གསས་ཐུགས་རྗེའི་བྱིན་རླབས་ཀྱིས།ལྷ་དང་ལྷ་མོར་གནས་འགྱུར་བའི། གཤེན་གྲོགས་ལྷ་དང་ལྷ་མོ་ལ།བརྩེ་ཞིང་གུས་པས་ཕྱག་འཚལ་ལོ། ཞེས་བརྗོད་ལ་ཕྱག་འཚལ་ལོ། དེ་ནས་ཞུ་དོན་གསོལ་ཏེ།ལས་དཔོན་ལ་ཕྱག་རྟེན་ཅི་འབྱོར་ཕུལ་ཏེ། བདག་མིང་ཞེས་བགྱི་བ་འདིས། དུས་འདི་ནས་བཟུང་ནས།ནམ་གཡུང་དྲུང་སྙིང་པོ་ལ་མ་མཆིས་ཀྱི་བར་དུ། འདི་དང་ཕྱི་མ་གནས་གཅིག་ཕྱིར།ཁྱེད་ཀྱི་ལྟ་སྤྱོད་བཞིན་དུ་བདག་ཀྱང་བགྱིད། བརྩེ་གདུང་དོན་གྱིས་བསྲེ་བར་མཛད་དུ་གསོལ།ཞེས་ཞུ་བ་དབུལ་ལོ།ལས་དཔོན་གྱིས་གཡུ་འབྲང་བདུད་རྩི་སྔར་བཞིན་བྱིན་གྱིས་རླབས་ལ་འདི་སྐད་དོ།དེང་གི་སྤུན་གྲོགས་ལྷ་ཡི་བཞི༼གཞི༽།  བརྩེ་གདུང་ཐབས་ཀྱི་དམ་ཚིག་གིས།ལྷ་དང་ལྷ་མོར་བསྲེ་བར་བྱའོ།ཞེས་བརྗོད་ལ་ཐིག་ལེ་ཡིག་འབྲུའི་ཞུ་ལུགས་སྔར་བཞིན་བྱའོ།།

      གསུམ་པ་ཡི་དམ་ལ་བསྲེ་བ་ལ་དང་པོར་ཕྱག་འཚལ་ཏེ།ཐམས་ཅད་སྐྱེད་བྱེད་འབྱུང་བ་ལྔའི་ངང༌། འདོད་པ་ཀུན་འབྱུང་ཡིད་བཞིན་ནོར་བུའི་ཚུལ།ཡངས་ཤིང་རྒྱ་ཆེ་ནམ་མཁའི་ངང་ཚུལ་ཅན། ཡིད་འོང་ཉམས་དགའ་ལྷའི་གཞལ་ཡས་ཁང༌།དཀྱིལ་འཁོར་གཞལ་ཡས་ཆེ་ལ་ཕྱག་འཚལ་ལོ། ཞེས་ཕྱག་འཚལ། དེ་ནས་ཞུ་བ་དབུལ་ཏེ།ཀྱཻ་དཔོན་གསས་བླ་མ་དགོངས་སུ་གསོལ། བདག་ཅག་ལས་ཀྱི་དབང་གིས་སྒྲིབ།ཆུ་བུར་མིག་གིས་དཀྱིལ་འཁོར་དོན་མ་ཁུམས། ཡེ་ཤེས་སྤྱན་མེད་ཡི་དམ་ལྷ་དང་འཛོལ།དཔོན་གསས་བླ་མའི་བྱིན་རླབས་ཀྱིས། དཀྱིལ་འཁོར་ལྷ་དང་འཕྲད་པར་མཛད་དུ་གསོལ།ཞེས་ཞུ་བ་དབུལ། དཔོན་གསས་ཀྱིས་ལན་དུ། བདེར་གཤེགས་ཡེ་ཤེས་ལྷའི་ཐུགས་རྗེ་དང༌།དཔོན་གསས་བླ་མའི་བྱིན་རླབས་དང༌། མར་མེ་གསལ་བའི་སྒྲོན་མ་ཡིས།ལས་ཀྱི་སྒྲིབ་པ་བྱང་ནས་ཀྱང༌། དཀྱིལ་འཁོར་ལྷ་དང་འཕྲད་འགྱུར་ཅིགན་མ་ཨ་དཀར་ཤག་སལ་ལེ་ལྷན་ནེ་རྟེན་དུ་ཨཱོཾ། ཞེས་བྱའོ། དེ་ནས་ནང་གི་ཁྲུས་བྱ་སྟེ།འདི་སྐད་དོ། དབུས་ནས་རང་འབྱུང་གྲུབ་པའི་ལྷ། ཡེ་ཤེས་ཆེན་པོའི་ཁྲུས་གསོལ་བས།ཡིད་འོང་སྣོད་ལྡན་སློབ་མ་ཡི། ཞེ་སྡང་རྣམ་སྨིན་དག་འགྱུར་ཅིགདེ་བཞིན་དུ་ཤར་བྱང་ནུབ་ལྷོ་རྣམས་སུ།གཏི་མུག་ང་རྒྱལ་འདོད་ཆགས་ཕྲག་དོག་རྣམ་སྨིན་ལ་སོགས་ནན་གྲན་ནོ་༼འདྲེས་སོ༽།ཕྱི་ནང་གསང་གསུམ་གྱི་ཁྲུས་བཤད་དོ། དེ་ནས་མེ་ཏོག་སྐྱུར་ཏེ།སློབ་མ་དར་རས་གཙང་མས་སྤྱན་གཡོགས་ཏེ།ལག་དུ་མེ་ཏོག་ཐོགས་ལ་དཀྱིལ་འཁོར་ལྷོ་ནུབ་དུ་སྒྲིགས་ལ་མོས་གུས་བསྐྱེད་དེ་འདི་སྐད་དོ།བདག་གི་རིག་པའི་མེ་ཏོག་འདི། དཀྱིལ་འཁོར་ལྷ་ལ་འཕངས་པ་ཡིས།ཚེ་རབས་སྔོན་ནས་འབྲེལ་པ་ཡི། ཐུགས་རྗེས་སྐྱོབ་མཛད་ལྷ་དང་འཕྲད་པར་ཤོགསལ་ལེ་ལྷན་ནེ་འདུ་བརྟན་པར་ལྷན། ཞེས་བརྗོད་ལ་ཕོ་བྲང་དབུས་སུ་གཏོར་ལ་སྐྱུར་རོ།དེ་༼ནས༽སྒོ་དབྱེ་སྟེ་འདི་སྐད་དོ། ཨ་ཤར་གྱི་ཕྱོགས་ནས་སྒོ་འབྱེད་མ།ཐུགས་རྗེ་སེར་མོ་ཕྱག་རྒྱ་བཀྲོལ། ཕྱག་མཚན་ལྕགས་སྒྲོག་བརྒྱུད་མ་ཡིས།འཁོར་བར་སྐྱེ་བའི་སྒོ་ཆོད་ལ། ཨ་དཀར་འོད་ཀྱི་ལྡེ་མིག་གིས། མེ་ལོང་ཡེ་ཤེས་སྒོ་ཕྱེས་ལ།ཨ་དཀར་བསལ་བའི་དཀྱིལ་འཁོར་དུ། མངོན་རྟོགས་རིག་པ་ཤར་བར་ཤོགཨཱ་ཨ་དཀར་སལ་ལེ་འོད་ཨ་ཡྃ་ཨཱོཾ་འདུ། ཨ་བྱང་གི་ཕྱོགས་ནས་སྒོ་འབྱེད་མ།གླང་ར་སྔོན་མོ་ཚེ་འཕེལ་མ། ཕྱག་མཚན་གླང་རེའི་འཁོར་ལོ་ཡིས།རྒས་ཤིང་རྒུད་པའི་སྒོ་ཆོད་ལ། ཨ་དཀར་འོད་ཀྱི་ལྡེ་མིག་གིས།མཉམ་ཉིད་ཡེ་ཤེས་སྒོ་ཕྱེས་ལ། ཨ་དཀར་གསལ་བའི་དཀྱིལ་འཁོར་དུ།བག་ཆགས་སྒྲིབ་པ་བྱང་བར་ཤོག ཨཱ་ཨ་དཀར་སལ་ལེ་འོད་ཨ་ཡྃ་ཨཱོཾ་འདུ།ཨ་ནུབ་ཀྱི་ཕྱོགས་ནས་སྒོ་འབྱེད་མ། ལེ་བར་དམར་མོ་འབྲས་བུའི་བདགཕྱག་མཚན་འཆིང་སྡོམ་ཞགས་པ་ཡིས། ན་ཞིང་གཅོད་པའི་སྒོ་ཆོད་ལ།ཨ་དཀར་འོད་ཀྱི་ལྡེ་མིག་གིས། སོར་རྟོགས་ཡེ་ཤེས་སྒོ་ཕྱེས་ལ།ཨ་དཀར་གསལ་བའི་དཀྱིལ་འཁོར་དུ། རང་རིག་ཡེ་ཤེས་མཐོང་བར་ཤོགཨཱ་ཨ་དཀར་སལ་ལེ་འོད་ཨ་ཡྃ་ཨཱོཾ་འདུ། ཨ་ལྷོ་ཡི་ཕྱོགས་ནས་སྒོ་འབྱེད་མ།དབང་སྡུད་དཀར་མོ་ཕྱག་རྒྱའི་བདག ཕྱག་མཚན་ལྕགས་ཀྱུ་བརྟེན་མ་ཡིས།འཆི་འཕོས་འདོར་ལེན་སྒོ་ཆོད་ལ། ཨ་དཀར་འོད་ཀྱི་ལྡེ་མིག་གིས།བྱ་གྲུབ་ཡེ་ཤེས་སྒོ་ཕྱེས་ལ། ཨ་དཀར་གསལ་བའི་དཀྱིལ་འཁོར་དུ།ཐུགས་རྗེའི་དབང་རྣམས་རྫོགས་པར་ཤོག ཨ་དབུས་ཀྱི་ཕྱོགས་ནས་སྒོ་འབྱེད་མ།ནམ་མཁའ་གསལ་བྱེད་གདོས་བྲལ་མ། ཕྱག་མཚན་གསལ་བའི་སྒྲོན་མ་ཡིས།མ་རིག་མཚན་མའི་དངོས་པོ་འཇོམས། གསལ་བ་འཕྲུལ་གྱི་ལྡེ་མིག་གིས།ཡངས་ཤིང་གསལ་བའི་སྒོ་ཕྱེ་ནས། ཨ་དཀར་གསལ་བའི་དཀྱིལ་འཁོར་དུ།ཡངས་ཤིང་གསལ་བའི་དོན་རྟོགས་ཤོག མ་རིག་པ་ཡི་སྒོ་ཕྱེ་ནས།རིག་པ་ཡེ་ཤེས་ཀྱི་དོན་མཐོང་བར་བསམ། དེ་ནས་སྤྱན་དབྱེ་སྟེ་བླ་མ་ལ་འདི་སྐད་ཞུའོ།དཔོན་གསས་བླ་མའི་ཐུགས་རྗེ་ཡིས། བདག་གི་མ་རིག་ལིང་ཏོག་གསལ་དུ་གསོལ། ཅེས་ཞུའོ།དཔོན་གསས་ཀྱིས་ལན་དུ་འདི་སྐད་དུ་བརྗོད་དེ། ང་ནི་མཐོང་གསས་སྒྲོན་མ་སྟེ།ཕྱག་གཡས་ཡེ་ཤེས་རྩགས་ཁབ་ཀྱིས། མ་རིག་རྟོག་པའི་དྲྭ་བ་དབྲལ་ནས་ཀྱང།དཀྱིལ་འཁོར་ལྷ་ཞལ་བསྟན་པར་བྱ། གཡོན་པ་གསེར་གྱི་སྦུར་ལེན་གྱིས།ཆུ་བུར་ནང་གི་སྐྱོན་གསལ་ནས། ཡི་དམ་ལྷའི་ཞལ་མཐོང་ཤོག ང་ནི་ལི་ཤག་དམར་མོ་སྟེ།གཡས་པ་གསལ་བའི་སྒྲོན་མེ་སྣོམ། མངོན་རྟོགས་གསལ་བའི་སྒོ་ཡང་སོལ།གཡོན་པ་གསལ་བའི་མེ་ལོང་འཕྱར། ཡི་དམ་ལྷའི་ཞལ་ངོ་སྟོན།རྩེ་གཅིག་སངས་རྒྱས་སྒྲུབ་པའི་ཕྱིར། སྒྲོན་མ་མེ་ལོང་བལྟས་མཐོང་བས།བརྡ་དང་ཐབས་ཀྱིས་སྟོན་བྱེད་པ། མཐོང་གསས་སྒྲོན་མ་ཡབ་ཀྱི་མཁའ།ལི་ཤག་དམར་མོ་ཤེས་རབ་ཡུམ། ཐབས་ཤེས་གསལ་བ་ཡབ་ཡུམ་གྱི།དཀྱིལ་འཁོར་ལྷ་དང་འཕྲད་གྱུར་གཅིགདེ་ནས་སྤྱན་གཡོགས་གསལ་ལ་གདན་གང་ལ་བབ་པའི་ལྷ་དེ་ཡི་དམ་དུ་ཕོག སྙིང་པོ་སྦྱིན།གསང་མཚན་བཏགས་པ་ནི། འོག་ཏུ་བཤད་མོད་ཀྱང༌།འོན་ཀྱང་ལག་ལེན་སྟབས་བདེའི་ཕྱིར་གནས་སྐབས་འདིར་བཏགས་ཏེ། དེ་ཡང་གྲོགས་ཕོ་ཡིན་ན།ལྷ་ཡབ་ཀྱི་གསང་མཚན་ནམ་རིགས་མ་ཡོན་ཏན་གྱི་ཆ་དང་སྦྱར་ལ་བཏགས།གྲོགས་མོ་ཡིན་ན་ཡུམ་གྱི་གསང་མཚན་ནམ། རིགས་ཀྱི་ཆ་དང་སྦྱར་ལ་བཏགས།ཡང་ན་སྤྱིའི་གསང་མཚན་སྟེ་དྲུག་ནས་བོས་ཏེ། ལྷའི་གསང་མཚན་གཡུང་དྲུང་དག་པ་རྩལ།དཔོན་གསས་གསང་མཚན་གཡུང་དྲུང་སྐྱེས་ན་རྩལ། དཀྱིལ་འཁོར་གསང་མཚན་གཞལ་ཡས་དཔག་མེད་རྩལ།གྲོགས་པོའི་གསང་མཚན་གཡུང་དྲུང་འགྱུར་མེད་རྩལ།གྲོགས་མོའི་གསང་མཚན་གཡུང་དྲུང་ལྷོག་མེད་རྩལ༌།རྒྱུ་རྐྱེན་གསང་མཚན་གཡུང་དྲུང་ཡོན་ཏན་རྩལ། ནང་བྱེ་བྲག་གི་གསང་མཚན་དྲུག་ནི།གྲོགས་ཕོ་ལ་ཐབས་ཡེ་ཤེས་ཀྱི་ལྷ་གསུམ་དང་སྦྱར་ཏེ་འབོགས་པ་ནི་གཡུང་དྲུང་ཡེ་ཤེས་རྩལ།གྲོགས་མོ་ལ་དབྱིངས་ཀློང་ཤེས་རབ་ཀྱི་ལྷ་དང་སྦྱར་ཏེ། མ་ནི་ཤེས་རབ་དབྱིངས་ཉིད་རྩལ།ལས་མཁན་སྤྲུལ་པ་ཛ་དང་བྷོ་འབོད་པའི། དེ་ནས་དཔོན་གསས་ཀྱིས་མིང་གི་དབང་བསྐུར་ཏེ།འདི་སྐད་བརྗོད། དེ་རིང་ཕན་ཆད་རིགས་ཀྱི་བུ། གནས་གསུམ་གསལ་བའི་དཀྱིལ་འཁོར་དུ།འབྲུ་གསུམ་གསལ་བའི་སྙིང་པོ་ལ། ཐིག་ལེ་གསུམ་གྱི་ཆོ་འཕྲུལ་གྱིས།རིགས་དང་མཐུན་པའི་མཚན་བཏགས་པས། མི་བརྗེད་གཟུངས་དང་ལྡན་པ་ཡི།གཉིས་མེད་མཉམ་པ་མིང་གི་དབང་བསྐུར་བས། མ་འོངས་པའི་ཞིང་ཁམས་སུ།བདེ་བར་གཤེགས་པའི་མཚན་རྟགས་རྫོགས་པར་ཤོག ཅེས་སོ། དེ་ཡང་གསང་མཚན་ཞེས་བྱ་བ་ནི།ཤར་དྲི་ཟ། བྱང་གནོད་སྦྱིན། ནུབ་ཀླུ་དབང༌། ལྷོ་གཤིན་རྗེ། མི་དང་མི་མིན་ལ་སོགས།དབང་དང་དམ་ཚིག་མ་འདྲེས་པ་ལ་གསང་ཞིང་དམ་པར་བྱ་སྟེ། འདིར་རང་གི་མ་བརྗེད་པར་བྱས་པས།བར་དོར་མ་བརྗེད་ན། དེར་བར་དོའི་འཇིགས་པ་ཐམས་ཅད་ལས་སྐྱོབ་ཅིང༌།མཐར་ལྷ་དེའི་རིགས་སུ་སངས་རྒྱས་པའི་ཡོན་ཏན་དང་དགོས་དོན་ཡོད།

      གཉིས་པ་དམ་ཚིག་བཤད་པ་ལ་དྲུག་སྟེ།དམ་ཚིག་གི་ངོ་བོ་ངེས་ཚིག་དང༌། བསྲུང་བའི་ཡུལ་དང༌། རྟེན་དང༌། དབྱེ་བ་དང༌།སྐྱོན་ཡོན་དང༌། དམ་ཚིག་གི་རང་བཞིན་བསྟན་པའོ། དང་པོ་ལ་ངོ་བོ་ནི་དགེ་མི་དགེ་ཐམས་ཅད།བདེར་གཤེགས་ཞི་ཁྲོའི་བཀའ་ལ་འདུས་ཤིང་དེའི་དོན་ལས་མི་འདའ་བའོ།ངེས་ཚིག་ནི་མ་བསྲུང་ན་རང་རྒྱུད་ཀྱི་ཡོན་ཏན་ཐམས་ཅད་ཚིག་ཅིང༌།ངན་སོང་གསུམ་དུ་ལྷུང་གིན་ཚིག་པས་ཚིག་ཞེས་བྱ་བ་ལ།བསྲུང་ན་ཕྱི་ནང་གི་དགྲ་བགེགས་དང་རང་རྒྱུད་ཀྱི་ཉོན་མོངས་པ་ཚིག་ནས་ཐར་པ་ཐོབ་པའོ།གཉིས་པ་ཡུལ་ནི།སྤྱིར་ན་འགྲོ་དྲུག་ལམ་ལྔ་དང་བཅས་པ་ཡིན་མོད་ཀྱིས་འོན་ཀྱང་གསང་སྔགས་ཀྱི་ལུགས་ཀྱི།ཡི་དམ་ཀྱི་ལྷ་དང་ཞལ་སྐྱིན་གྱི་རྟེན་དང༌། ལུང་འབོགས་པའི་དཔོན་གསས་དང།མཆེད་དང་གྲོགས་པོ་དང། ཡང་གསང་གི་ལྷ་དང་ལྔ་པོ་དེ་དག་ཡིན་ཏེ།ཡི་དམ་ལྷ་ནི་མི་སྤོང་རྟག་དུ་བསྒོམ། ཞེས་གསུངས་སོ། གསུམ་པ་བསྲུང་བའི་རྟེན་ནི།ཀུན་བཟང་ཐུགས་ཀྱི་ཐིག་ལེ་ལས། བག་ཆགས་གཡོས་ནས་སད་པ་ཡི།དགའ་དད་མོས་ནས་མདུན་སྤྱོད་པའི། གང་ཟག་རྐྱེན་གྱི་སད་པའོ། ཞེས་གསུངས་པས།གསང་སྔགས་ཀྱི་ལས་འཕྲོ་སད་ཅིང་དོན་ལ་མོས་པའི་གང་ཟག་ཡིན་ཏེ།འགྲོ་བ་གང་གི་རྒྱུད་ལ་སྐྱེ་རུང་པའོ། བཞི་པ་དབྱེ་བ་ལ་བཞི་སྟེ། རྩ་བ་དང༌། ཡན་ལག་དང༌།ཉིང་ལག་དང༌། ཁྱད་པར་གྱི་དམ་ཚིག་གོ དང་པོ་ལ་ལྔ་སྟེ།ཡིད་བཞིན་གྱི་ནོར་བུ་སྤྱི་གཙུག་ནས་མི་དབོག་ཅེས་བྱ་སྟེ།དཔོན་གསས་བླ་མ་མན་ངག་གི་རྩ་བ་ཡིན་པས་སྤྱི་བོའི་གཙུག་ཏུ་ཁུར་བ་དང༌།ཕོ་བྲང་གཞལ་ཡས་ཀྱི་མདངས་མི་འཕྲོག་ཅེས་བྱ་སྟེ། ཡི་དམ་བྱིན་རླབས་ཀྱི་རྩ་བ་ཡིན་པས།ལས་དམ་ཡེ་ཤེས་ཀྱི་དཀྱིལ་འཁོར་གསལ་བཏབ། ས་ཆུ་རྒྱུན་གྱི་འབྲེལ་མི་བཅད་ཅེས་བྱ་སྟེ།སྔགས་དང་ཕྱག་རྒྱ་ནུས་པའི་རྩ་བ་ཡིན་པས། བཅའ་བསྒྱུར་བཟླས་པ་རྒྱུན་མི་བཅད།དྲི་མེད་ལས་ལ་དྭོགས་མི་རྒོ་༼བགོ༽ཞེས་བྱ་སྟེ།གཡུང་དྲུང་ཁྱད་པར་གྱི་ཐེག་པ་ལ་འཇུག་པའི་ཐབས་ཁྱད་པར་ཅན་སྤྱི་དམ་གྱི་རྩ་བ་ཡིན་པས་བཀའ་ལུང་ལ་སྨད་པ་མི་བྱ་བ་དང༌།གསང་སྒོ་གཉེན་པོ་ཡན་པར་མི་བཏང་ཞེས་བྱ་བ་སྟེ།ཨུ་ཡ་བ་དངོས་གྲུབ་ཀྱི་རྩ་བ་ཡིན་པས་ཤིན་ཏུ་ཨག་ཐམ་པ་དང་ལྔ་ནི་ལུས་དང་སྲོག་ལ་བབ་ཀྱང་གཅེས་སྤྲས་སུ་བྱའོ།གཉིས་པ་ཡན་ལག་གི་དམ་ཚིག་ལ་བཅུ་སྟེ། གཏི་མུག་དཔོན་གསས་ཀྱི་ཡན་ལག་ཡིན་ཏེ།རིག་པ་ལྷག་མཐོང་གི་སྙིང་པོར་གྱུར་པས་མི་སྤང་བ་དང༌།འདོད་ཆགས་གསས་མཁར་གྱི་ཡན་ལག་ཡིན་ཏེ།འདོད་དགུ་ལོངས་སྤྱོད་ཀྱི་གཞི་མར་གྱུར་པས་མི་སྤང་བ་དང༌།ང་རྒྱལ་སྔགས་ཀྱི་ཡན་ལག་ཡིན་ཏེ། འདུ་བྱེད་ལས་ཀྱི་སྙིང་པོ་ཡིན་པས་མི་སྤང་བ་དང༌།ཕྲག་དོག་སྤྱི་དམ་གྱི་རྩ་བ་ཡིན་ཏེ། གཉིས་མེད་ལས་ཀྱི་སྙིང་པོ་ཡིན་པས་མི་སྤང་བ་དང༌།ཞེ་སྡང་གསང་བའི་ཡན་ལག་ཡིན་ཏེ།ཨུ་ཡ་བ་དངོས་གྲུབ་ཀྱི་ཡན་ལག་ཏུ་གྱུར་པས་མི་སྤང་བ་དང་ལྔ་ནི།དུག་ལྔ་རང་ཁར་སྤྱད་པ་མ་ཡིན་ཏེ།དུག་ལྔ་ལྷ་ལྔ་སྐུ་ལྔ་ཡེ་ཤེས་ལྔར་བསྒྱུར་ལ་ཉམས་སུ་བླང་ངོ༌།བདུད་ཀྱི་བྱང་སེམས་དཀར་པོ་རྣམ་ཤེས་ཀྱི་བདུད་བཅོམ་ནས།སྟོང་པ་ཉིད་ཀྱི་ཡེ་ཤེས་སུ་གྱུར་པའི་བདུད་ཀྱི་ཆེན་པོ་ཡིན་པས་མི་སྤང་བ་དང༌།གསང་ཤ་གལ་ཆེན་གཟུགས་ཀྱི་བདུད་བཅོམ་ནས།མེ་ལོང་ལྟ་བུའི་ཡེ་ཤེས་སུ་གྱུར་པས་མི་སྤང་བ་དང༌།བདུད་ཀྱི་དྲི་ཆེན་འདུ་བྱེད་ཀྱི་བདུད་བཅོམ་ནས་མཉམ་ཉིད་ཡེ་ཤེས་སུ་གྱུར་བའི་བདུད་རྩི་ཆེན་པོ་ཡིན་པས་མི་སྤང་བ་དང༌།བདུད་ཀྱི་དྲི་ཆུ་འདུ་ཤེས་ཀྱི་བདུད་བཅོམ་ནས།བྱ་བ་གྲུབ་པའི་ཡེ་ཤེས་སུ་གྱུར་བའི་བདུད་ཀྱི་ཆེན་པོ་ཡིན་པས་མི་སྤང་བ་དང༌།བྱང་སེམས་དམར་པོ་ཚོར་བའི་བདུད་བཅོམ་ནས།སོ་སོར་རྟོགས་པའི་ཡེ་ཤེས་སུ་གྱུར་བའི་བདུད་ཀྱི་ཆེན་པོ་ཡིན་པས་མི་སྤང་བ་དང༌།དེ་ལྟར་ལྔ་ནི་ཐབས་ཀྱི་རོལ་པར་སྤྱོད། ཞལ་ཟས་ཐམས་ཅད་བདུད་རྩི་ལྔའི་རང་བཞིན་དང༌།དམུ་ཡད་ཀྱི་ལོངས་སྤྱོད་དུ་རོལ་པར་བྱའོ། གསུམ་པ་ཉིང་ལག་གི་དམ་ཚིག་ནི།མི་དགེ་བ་བཅུ་སྤང་ཞིང་དགེ་བ་བཅུ་བླང་བ་སྟེ། དེ་ཡང་ལུས་ཀྱི་སྲོག་གཅོད་པ་སྤངས་ཏེ།བྱམས་པས་གསོ་ལ་དག་བའི་དགེ་བ་དང་དུ་བླང་བ་དང༌། ངག་འཁྱལ་བ་སྤངས་ལ།ངག་ཞི་ལ་གསུང་སྙན་པར་སྨྲ་བ་དང༌། ཚིག་རྩུབ་མོ་སྤངས་ལ་ཚིག་ཞི་དལ་དུ་སྨྲ་བ་དང༌།ཕྲ་མ་སྤངས་ལ་ཀུན་དང་མཐུན་པར་སྨྲ་བ་དང༌།རྫུན་སྤངས་ལ་དྲང་པོ་སྒྲོས་སྐུར་མེད་པར་སྨྲ་བ་དང༌། ཡིད་ཀྱི་མངན་སེམས་སྤངས་ལ།བརྩེ་སེམས་གདུང་བར་སེམས་པ་དང༌། གཞན་ལ་གནོད་པའི་སེམས་སྤང་་ཞིང༌།ཀུན་ལ་ཕན་པའི་ཐུགས་རྗེས་སེམས་ཅན་ཀུན་བཟུང་བ་དང༌། ལོག་པར་ལྟ་བའི་སེམས་སྤངས་ལ།བདེན་པས་དོན་ལ་སྤྱོད་པའི་དགེ་བ་དྭངས་དུ་བླང་ངོ༌། བཞི་པ་ཁྱད་པར་གྱི་དམ་ཚིག་ལ་ལྔ་སྟེ།སྤང་བར་བྱ་བ་དང༌། གསང་བར་བྱ་བ་དང༌། བསྒྱུར་བར་བྱ་བ་དང༌། སྤྱད་པར་བྱ་བ་དང༌།མི་འདའ་བར་བྱ་བའི་དམ་ཚིག་གོ དང་པོ་སྤང་བ་ལ་ཉི་ཤུ་རྩ་གསུམ་ཡིན་ཏེ།དེ་ཡང་ཐུགས་རྗེ་ཉི་མའི་སྒྲོན་མེ་མི་བསྣུབ། ཅེས་བྱ་སྟེ།གཡུང་དྲུང་བོན་གྱི་བསྟན་པ་ལ་གནས་པར་བྱ། སེང་གེ་དཀར་མོའི་ལྟག་པ་མི་བཅག ཅེས་བྱ་སྟེ།དཔོན་གསས་བླ་མའི་སྐུ་མི་སྨད། ནོར་བུ་རིན་པོ་ཆེ་གཙུག་ནས་མི་འབོགས། ཅེས་བྱ་སྟེ།བླ་མའི་ཐུགས་མི་བཀོལ་༼དཀྲུགས༽། གཡུང་དྲུང་གཏམས་པའི་རྫོང་མི་བཤིག་ཅེས་བྱ་སྟེ།གཤེན་གྱི་དཀོར་ལ་མི་རླམ། མེ་རི་འབར་བའི་འོབས་མི་དབྲལ་ཞེས་བྱ་སྟེ།གསང་བའི་མཚམས་མི་དབྲལ། མེ་མ་མུར་སྟན་དུ་མི་བཏིང་ཞེས་བྱ་སྟེ།དཔོན་གསས་དང་སློབ་མའི་ཡུམ་མི་བསླད། ཤེལ་འཕྲེང་དཀར་པོའི་ཐག་པ་མི་བཅད་ཞེས་བྱ་སྟེ།ལྷ་མཆོད་ཀྱི་ནང་དུ་མཁོན་མི་སྒུག༼བྱ༽།གཡུང་དྲུང་སྣོལ་པའི་དབལ་ཟུར་མི་བཅག་ཅེས་བྱ་སྟེ། ཕྱག་རྒྱའི་དགྲ་ཟུར་མ་ཉམས་པར་བྱ།གཡུ་འབྲུག་སྔོན་མོའི་སྒྲ་མི་བཅག་ཅེས་བྱ་སྟེ། སྙིང་པོའི་སྒྲ་མི་བཅག།མུན་པའི་སྒྲོན་མེ་མི་བསད་ཞེས་བྱ་སྟེ། ཏིང་ངེ་འཛིན་ཕྱལ་བར་མི་བཏང༌།ཁྲོ་ཆུ་ཁོལ་མ་སྐོམ་དུ་མི་བཏུང་ཞེས་བྱ་སྟེ། ཚོགས་འདྲེས་པའི་ནོར་མི་རྐུ།དུག་དང་འདྲེས་པའི་ཟས་མི་བཟའ་ཅེས་བྱ་སྟེ། དགེ་སྡིག་འཆོལ་པར་མི་སྤྱད།འདོད་པ་དགུ་འགྱུར་གྱི་ནོར་མི་རྐུ་ཅེས་བྱ་སྟེ། ཟབ་མོའི་བཀའ་ལ་དཔེ་རྐུན་མི་བྱ།བདུད་རྩིའི་ཆུ་བོ་རྒྱུན་མི་བཅད་ཅེས་བྱ་སྟེ། ཚོགས་དང་མཆོད་པའི་རྒྱུན་མི་བཅད།ཤེལ་གྱི་སྐྲས་པ་འོབས་སུ་མི་སྐུར༼སྐྱུར༽་ཞེས་བྱ་སྟེ། དད་པ་ཅན་གྱི་ཚོགས་མི་བཅགརག་ཤ་སྲིན་པོའི་བུ་མི་གསོ་ཞེས་བྱ་སྟེ། སྡིག་པ་ཅན་གྱི་གྲོགས་མི་བསྟེན།ཟ་མ་ཏོག་དུ་དུག་མི་སྤྱོད་ཅེས་བྱ་སྟེ། མཆེད་ལྕམ་ནང་དུ་མི་སླད།ཐབས་དང་ཤེས་རབ་ཡ་མི་འབྲལ་ཞེས་བྱ་སྟེ། ཐུགས་ཀྱི་ཐིག་ལེ་དཀར་དམར་དུ་སྤྲོ།རི་རབ་ཀྱི་རྩེ་མི་བཤིག་ཅེས་བྱ་སྟེ། ཕའི་ལུས་ལ་ཐོ་མི་འཚམ།རྒྱ་མཚོའི་གཏིང་དུ་དུག་མི་སྤྱོད་ཅེས་བྱ་སྟེ། མའི་ལུས་ལ་མངལ་མི་སྤྱད།ཡི་དམ་གྱི་ལྷ་ལ་འཁོན་མི་བྱ། དམ་ཚིག་གི་ལྷ་ལ་དབྱེ་མི་བསྣོལ།ལས་ཀྱི་ལྷ་ལ་ར་ཆོད་མི་བྱའོ། གཉིས་པ་གསང་བར་བྱ་བ་ནི་དགུ་སྟེ།གནས་ནི་གསར་རྙིང་ཕྱོགས་མཚམས་མ་ལོག་པ།མཚན་དང་ལྡན་པ་ཨ་དཀར་ལོངས་སྤྱོད་རྒྱན་གྱི་གནས་ལྟ་བུ་དེ་གསང་ངོ༌། དུས་གསང་བ་ནི།ལོ་དུས་སྟག་སྤྲེལ་ཕག་སྦྲུལ་བཞི་ལ་འཇུག་ཅིང་ཐོན་པ་དེ་གསང༌། ཟླ་བའི་དུས་ར་བ་བཞི་ལ།ཞག་དུས་རབ་ལོ། འབྲིང་ཟླ་བ། ཐ་མ་ཞག་དུ་སྒྲུབ་པ་དང༌། ཟ་མའི་དུས། སྔ་གྲོ། དགོང་མོ།ཉིན་གུང་མཚན་གུང་བཞི་ལ་འཇུག་ཅིང་ཐོན་པ་དང༌།གཟའ་སྐར་གྱི་དུས་བཟང་ཞིང་དར་བ་ལ་འཇུག་ཅིང་ཐོན་པ་རྣམས་གསང་བའོ།ལྷ་གསང་བ་ནི་ཡི་དམ་གྱི་ལྷ་དང༌། ལས་ཀྱི་ལྷ་ལས་སོགས་འདི་ལྟ་བུ་ཡིན་ཞེས་གསང་ངོ༌།རྫས་གསང་བ་ནི་མཆོད་རྫས་དང་རྟེན་རྫས་བསྐང་རྫས་ལས་སོགས་པ་དོན་ཆེད་འདི་ལྟ་བུ་དགོས་ཞེས་གསང་བ་དང༌།རྟེན་གསང་བ་ནི་ཕྱི་རྟེན་གྱི་སྐོས་ལྔ་དང༌། ནང་རྟེན་གྱི་བཅུད་དགུ་དང༌།གསང་བའི་རྟེན་དྲུག་ལ་སོགས་འདི་ལྟ་བུའི་རྟེན་ཡིན་ཞེས་པ་གསང་བའོ། ལས་གསང་བ་ནི།ཞི་རྒྱས་དབང་དྲག་བཞིའི་ལས་གསང་བ་དང༌།རྒྱུ་རྐྱེན་གསང་བ་ནི་གདུང་བ་སྟོང་གི་སྙིང་ཁྲག་དང༌། རྔམ་པ་དགུའི་ལྟག་ཤ་དང༌།འབྲུ་སྣ་དགུའི་ངར་ཕྱེ་ལ་སོགས་གསང་ངོ༌། རྐྱེན་ནི་འཚོ་བ་ཟས་ཀྱི་རྐྱེན་དང༌།དུག་འཇོམས་སྨན་དང༌། དགྲ་ཟློག་མཚོན་དང༌།རྐྱེན་ཟློག་ཟང་ཟིང་ཡས་སྟེགས་ཀྱི་རྐྱེན་ལས་སོགས་པ་གསང་བའོ། འབྲས་བུ་གསང་བ་ནི།དུས་འདིེར་ཐོབ་པའི་འབྲས་བུ་ཚེ་རིང་ནད་མེད།བཙན་ཕྱུག་བཀྲ་ཤིས་ཡིད་འོང་མཐུ་བྱིན་ལྡན་པ་རྣམས་ཐོབ་པས་དབང་མ་ཐོབ་པ་ལ་གསང་བ་དང༌།ཕྱི་མར་ཐོབ་པ་མཐར་མཐུག་གི་འབྲས་བུ་ཕྱག་རྒྱ་ཆེན་པོ་རིག་འཛིན་གྱི་ས་ཐོབ་པ་དང༌།སར་ཆུད་པ་དང༌། སར་གྲོལ་བ་དང༌། སྨིན་པ་ཕྱིར་མི་ལྡོག་པའི་ས་ནོན་པ་ལ་སོགས་པ་གསང་བའོ།རྟགས་གསང་བ་ནི། དངོས་དང་ཉམས་དང༌།རྨི་ལམ་ལ་སོགས་པ་མཆོག་དང་ཐུན་མོང་ལ་སོགས་ཀྱི་རྟགས་རབ་འབྲིང་གང་ཡང་གསང་བ་དང་དགུའོ།།

      གསུམ་པ་བསྒྱུར་བར་བྱ་བ་ལ་ལྔ་སྟེ།སྟོང་གསུམ་ལྷའི་གཞལ་ཡས་ཁང་དུ་བསྒྱུར་བ་དང༌། ཁམས་གསུམ་ལྷ་དང་ལྷ་མོར་བསྒྱུར་བ་དང༌།དུག་ལྔ་ཡེ་ཤེས་ལྔ་རུ་བསྒྱུར་བ་དང༌།དུག་གསུམ་སྐུ་གསུང་ཐུགས་དང་མཁའ་ཀློང་དབྱིངས་གསུམ་དུ་བསྒྱུར་བ་དང༌།ཕུང་པོ་བཅིང་གྲོལ་ལྷའི་ཕྱག་རྒྱར་བསྒྱུར་བའོ། བཞི་པ་སྤྱད་པར་བྱ་བ་ལ་ལྔ་སྟེ།མཚན་ལྡན་གྱི་རྒོད་ལྕམ་ལ་ཐབས་ཤེས་རབ་ཀྱི་རོལ་པར་སྤྱད་པ་དང༌།བདུད་རྩི་རྣམ་པ་ལྔ་ལ་ལྟ་བ་ཡེ་ཤེས་ཀྱི་རོལ་པར་སྤྱད་པ་དང༌།མཆོད་པ་དང་གཏོར་མ་ལ་སོགས་དབྱིངས་སུ་མཆོད་ཅིང་དངོས་གྲུབ་ཀྱི་ཞལ་ཟས་ཟད་མེད་གཡུང་དྲུང་གི་ལང་ཚོར་སྤྱད་པ་དང་ལྔའོ།ལྔ་པ་མི་འདའ་བའི་དམ་ཚིག་ནི། ཐུགས་རྗེ་དྲང་རྒན༼མཁན༽་གྱི་བཀའ་མི་འདའ་ཞེས་བྱ་སྟེ།བསྙེན་སྒྲུབ་ཡི་དམ་གྱི་ལྷ་ཡིས་མ་ཁྲེལ་བ་དང༌།ཁྱུང་མཆོག་རླབས་པོ་ཆེའི་དཔུང་ལས་མི་འདའ་ཞེས་བྱ་སྟེ།སྤྱོད་པ་ལྷ་སྲིན་དྲེགས་པས་མ་ཁྲེལ་བ་དང༌། སྤུ་གྲི་ནགས་ཚལ་གྱི་སོ་མི་འདའ་ཞེས་བྱ་སྟེ།སེམས་བསྐྱེད༼ཅན༽་སོ་སོ་སྐྱེ་བོས་མ་ཁྲེལ་བ་དང༌།ཐུགས་རྗེ་ཉག་ཐག་གི་རྒྱང་ལས་མི་འདའ་ཞེས་བྱ་སྟེ།བརྩེ་གདུང་ལྷ་དང་མཆེད་ལྕམ་གྱིས་མ་ཁྲེལ་བ་དང༌།ཡེ་སྲིད་རྒྱལ་པོའི་བཀའ་མི་འདའ་ཞེས་བྱ་སྟེ།རྩ་བ་རང་སེམས་ཀྱིས་མ་ཁྲེལ་བར་བསྲུང་བ་དང་ལྔའོ། དམ་ཚིག་དེ་དག་ཐམས་ཅད་ཀྱང་བསྡུས་ན།སྐུ་གསུང་ཐུགས་ཀྱི་དམ་ཚིག་གསུམ་ལ་འདུས་ཏེ། སྐུའི་དམ་ཚིག་མི་སྤང་ཞིང༌།གསུང་གི་དམ་ཚིག་རྒྱུན་མི་བཅད། ཐུགས་ཀྱི་དམ་ཚིག་མ་ཡེངས་པའི། ཞེས་གསུངས་པ་དང༌།རྩ་རྒྱུད་ཉིད་ལས་ཀྱང༌།རྩ་བ་ཡན་ལག་དུ་མར་གསུངས་ཀྱངརྩ་བའི་ནང་འདི་ལྟར་གསལ༌།རྩ་བ་ཡན་ལག་ཅི་སྨྲོས་ཀྱང༌།ལུས་ངག་ཡིད་དང་གསུམ་པོ་ནི། ཉེས་པ་ཀུན་གྱི་རྩ་བ་ཡིན་ཞེས་གསུངས་པའོ།ལྔ་པ་བསྲུང་ཐུབ་ཀྱི་སྐྱོན་ཡོན་ལ་གཉིས་ལས། དང་པོ་ཉམས་པའི་སྐྱོན་ནི།ལུས་ཀྱི་དམ་ཚིག་མ་ཐུབ་སྟེ་ཉམས་ན།འདིར་ཡང་ཚེ་ཐུང་ནད་མང་དབུལ་ཞིང་འཕོངས་པར་འགྱུར་ལས༼ལ༽།དེས་བྱས་ནས་ཕྱི་མར་མི་ཁོམ་པའི་གནས་བརྒྱད་ལྟ་བུར་ལྷུང་ཞིང༌།མཐར་ངན་སོང་གསུམ་པོ་ཉམས་སུ་མྱོང་བར་འགྱུར་རོ། ངག་གི་དམ་ཚིག་མ་ཐུབ་སྟེ་ཉམས་ན།འདིར་ཡང་ངག་གི་ནུས་པ་ཟད་ཅིང༌། སྨྲས་ཚད་ལོག་པར་འགྱུར་པ་དང༌།དེས་བྱས་ནས་ཕྱི་མར་ཡང་ངག་གིས་མི་དགེ་བ་སྤྱོད་པ་དང།ལྐུགས་དང་མི་བདེན་པ་སྨྲ་བའི་རྟེན་དུ་གྱུར་ཏེ།མཐར་དམྱལ་བ་ནས་ལྕེ་ལ་ཞིང་རྨོ་བའི་གནས་སུ་སྐྱེས་ནས་སྦྱོང་བར་འགྱུར་རོ།ཡིད་ཀྱི་དམ་ཚིག་མ་ཐུབ་སྟེ་ཉམས་ན། འདིར་ཡང་བསམ་པ་མི་འགྲུབ་ཅིང་དབང་པོ་མི་གསལ་བ་དང༌།སྙིང་རླུང་ཅན་ལ་སོགས་སུ་འགྱུར་ལ། དེས་བྱས་ནས་ཕྱི་མར་ཡང་བསམ་པ་མི་འགྲུབ་ཅིང༌།སྟབས་བསྣོལ་ལ་སོགས་པ་ཁོ་ནར་འགྱུར་ལ། མཐར་བྱོལ་སོང་དང༌།དམྱལ་བ་ལ་སོགས་ཀྱི་སྡུག་བསྔལ་ཉམས་སུ་མྱོང་བར་འགྱུར་བ་སྟེ།དམ་ཚིག་ཉམས་པའི་སྔ་ལྟས་ནི། འདི་རུ་མི་བདེ་སྣ་ཚོགས་འབྱུང།ཕྱི་མར་མནར་མེད་དམྱལ་བར་སྐྱེ། ཞེས་གསུངས་པས་སོ། གཉིས་པ་བསྲུང་པའི་ཡོན་ཏན་ལ།ལུས་ཀྱིས་མ་ཉམས་པ་ཐུབ་ན། འདིར་ཡང་ཚེ་རིང་ནད་མེད་དཔལ་དང་འབྱོར་པ་ཕུན་གསུམ་ཚོགས།དེས་བྱས་ནས་ཕྱི་མར་དལ་འབྱོར་ཁྱད་པར་ཅན་གྱི་རྟེན་ཐོབ་ནས།མཐར་ཡང་འགྱུར་བ་མེད་པ་གཡུང་དྲུང་གི་སྐུ་ཐོབ་པར་འགྱུར་རོ།ངག་གི་མ་ཉམས་ཏེ་ཐུབ་ན་འདིར་ཡང་ཅི་སྨྲས་བདེན་པ་དང༌།གཞན་ལ་བཀའ་གཉན་པ་ལ་སོགས་ངག་གི་ནུས་པ་དང་ལྡན་ཅིང༌།དེས་བྱས་ནས་ཕྱི་མར་ཡང་ངག་གི་ཡོན་ཏན་དུ་མ་དང་ལྡན་ནས།མཐར་རང་བཞིན་མེད་པའི་གསུང་ཐོབ་པར་འགྱུར་རོ། ཡིད་ཀྱི་མ་ཉམས་ཏེ་ཐུབ་ན།འདིར་ཡང་ཅི་བསམ་འགྲུབ་ཅིང་རྟོགས་པའི་མཆོག་ཏུ་འགྱུར་ལ། དེ་བྱས་ནས་ཕྱི་མ་ལ་ཡང༌།ཡིད་ཀྱི་ཡོན་ཏན་དུ་མ་དང་ལྡན་ཅིང༌། མཐར་འཁྲུལ་པ་མེད་པའི་ཐུགས་ཐོབ་པར་འགྱུར་རོ།དྲུག་པ་དམ་ཚིག་གི་རང་བཞིན་ནི། སེམས་ཡེ་ནས་ཀུན་ཏུ་བཟང་པོའི་དོན་རྟོགས་ན།ཡེ་བསྲུང་ཆེན་པོར་འགྱུར་བས། བསྲུང་མཚམས་ཀྱི་སྐྱོན་ཡོན་དང་བྲལ་བ་སྟེ།སེམས་གཡུང་དྲུང་འཆི་མེད་སྐྱེས་ན་བརྩན་ལ། སྲོག་ཅེས་བྱ་བ་ཡང་མེད་ལ།དེ་མེད་པས་སྲོག་བཅད་དུ་ཡང་མེད་པས། བསད་གསོ་གཉིས་མེད་ཀྱི་དམ་ཚིག་ཅེས་བྱའོ།འདོད་དགུ་རང་ལ་བྱུང་ཙམ་ན། དེ་ཡིས་གཞན་ལ་བྱིན་པ་ཡང་མེད་ལ།ཐམས་ཅད་རང་ལ་བྱུང་བས་བླངས་པ་མེད་པས་སྦྱིན་བླང་གཉིས་མེད་ཀྱི་དམ་ཚིག་ཅེས་བྱའོ།བོན་ཐམས་ཅད་སྒྱུ་མའི་དཔེ་བརྒྱད་ལྟ་བུ་མིང་དང་ཚིག་དུ་བཏགས་པ་ཐམས་ཅད་མ་ངེས་ཏེ་ཀུན་རྫོབ།དོན་དམ་པར་ཀུན་རྫོབ་ལ་རང་བཞིན་མེད་པ་བདེན་རྫུན་གཉིས་མེད་ཀྱི་དམ་ཚིག་ཅེས་བྱའོ།ཀུན་ཏུ་བཟང་པོ་ཐུགས་ཆགས༼པ༽་མེད་པའི་དོན་ལ་གནས་ཏེ།ཐབས་ཆེན་རོལ་པས་ཆགས་སྡང་གཉིས་མེད་ཀྱི་དམ་ཚིག་ཅེས་བྱའོ། དམ་ཚིག་གི་ངེས་ཚིག་ནི།དམ་ནི་གསས་མཁར་གྱི་སྤྱི་དམ་ལས་མི་འདའ་བས་དམ། ཚིག་ནི་བསྲུང་ན་ལས་དང་སྒྲིབ་པ་ཚིག་ལ།མ་བསྲུང་ན་རང་གི་རྒྱུད་ཚིག་པའོ།དེ་ལྟར་རྩ་བཞི་རང་སར་གྲོལ་ནས་ཁྱད་པར་ཆེན་པོ་ངོ་མཚར་ཆེ་བས་ན་མཆོག་ཅེས་བྱའོ།གསུམ་པ་གསང་མཚན་ནི་རྒྱས་པར་གོང་དུ་བསྟན་པ་ལྟར་རོ། གསུམ་པ་རྙིང་པ་བསྣན་པ་ནི།དམ་ཚིག་རྙིང་པ་ལ་ཡི་དམ་བསྲེ་བ་དང༌།གསང་མཚན་བཏགས་པས༼པ༽་གཉིས་མི་དགོས་ཀྱིས་གཞན་རྣམས་སྔར་དང་འདྲ་བས་གསེར་ལ་བརྩི་བསྣན་པ་དང་འདྲ་བས་ཡོན་ཏན་གོང་ནས་གོང་འཕེལ་དུ་འགྱུར་རོ།གལ་ཏེ་ཉམས་པ་ཅན་ཡོད་ན་ཚོགས་དང་བཤགས་པ་བྱས་ལ་བསྐྱར་རོ།དེ་ལྟར་གསང་སྔགས་དབང་ཆེན་ངོ་མཚར་རྒྱས་པའི་འཇུག་ཆོག་བསྲེ་བསྣན་རྒྱས་མིན་བསྡུས་པ་ཡི་གེར་བཀོད།དགེ་དེས་འགྲོ་བ་གསང་སྔགས་མཆོག ལམ་བགྲོད་རྫོགས་སངས་རྒྱས་པར་ཤོགགསང་སྔགས་ལམ་གྱི་འཇུག་ཆོག་མུ་ཏིག་འཕྲེང་བ་ཞེས་བྱ་བ། འ་ཞྭ་བློ་གྲོས་རྒྱལ་མཚན་ལ་མེ་ཉག་བསོད་རྒྱལ་གྱིས་བསྐུལ་ཏེ་སྦྱར་ལ་འདུས་པར་བཀོད་པ་རྫོགས་སོ།། འདི་ལ་བློ་གྲོས་ཀྱིས་བཀོད་པ་ལས། སེམས་བསྐྱེད་རྗེས་སུ་འདུག་པ། གོ་རྗེས་ཤིང་སྐྱབས་འགྲོ་རྗེས་སུ་བྱས་ཤིང༌། ཕྱི་ནང་གི་ཁྲུས་གཉིས་དང་གསང་མཚན་དང་མིང་གི་དབང་བསྐུར་སྒོ་དབྱེ་སོགས་ལོགས་སུ་བླང་མི་དགོས་པར། ཡང་སྟོན་དཔལ་བཟང་བདག་གིས་རྒྱུད་ལུང་དང་མི་འགལ་བར་བཅུག་ནས་ཁྲིགས་ཅན་བྱས་ཡོད། དགེའོ། བཀྲ་ཤིས།།




སྐད་འཇོག་རེའུ་མིག

འདྲེན་སྐོལ། དཔྱད་གཏམ(0)ཡོད།