ང་ཡི་སློབ་དཔོན།

     ཨ་ཁུ་དྲང་ཉི།

ལྟས་བཟང་རྐྱང་པས་བསུ་བ་མ་བྱས་ལ།།
མ་འོང་ལུང་གིས་བསྔགས་པ་མ་ཡིན་པར།།
ལ་ཆུང་ཚང་གི་གཡང་ཁྱིམ་གྲུ་བཞི་ནང་།།
མི་རྐྱང་དཀྱུས་མ་ཞིག་གི་ངོ་བོར་བལྟམས།།

མ་བསླབ་ཡི་གེ་ངང་གིས་བརྡོལ་བ་མིན།།
བསླབ་པའི་གསལ་བྱེད་མ་ཤེས་རྨོངས་པ་མིན།།
ཕ་ཁུ་གང་གིས་བརྩེ་བའི་ཕྱག་བར་ནས།།
འཕྲུལ་ཡིག་བཞི་བཅུའི་རྟ་ལ་ག་ལེར་བསྐྱོན།།

ངེས་འབྱུང་མཚོ་མོས་ཁྱིམ་ནས་རི་ལ་ཁྱེར།།
སྒང་དྲུག་རི་བོ་གོམ་པས་བཅད་ནས་དེངས་།།
དབུས་གཙང་རུ་བཞི་ལྟོགས་སྐོམ་ངང་ནས་གཤགས།།
ཐོབ་གསར་སྨན་གླིང་ཁྱིམ་གཞིས་གཉིས་པ་གདམས།།

རས་རྐྱང་དམར་པོ་ཉིན་མཚན་གཉིས་ལ་གྱོན།།
པགས་རྩག་བསམ་ནས་ཞག་དང་ཟ་མར་འདས།།
བག་གོར་ལེབ་གཅིག་ཚ་དྲོ་དུས་གསུམ་ཟོས།།
རྩམ་དཀར་དྲན་ནས་ལོ་དང་ཟླ་བར་འཚོས།།

མཁན་སློབ་ཉི་ཟླ་སྤྱི་བོ་གཡས་གཡོན་བཞག།
གནང་བའི་བཀའ་སློབ་སྙིང་གི་དཀྱིལ་དུ་སིབ།།
གཡུང་དྲུང་སྤུན་གྲོགས་སྲོག་གི་རྩ་ལ་བསྟར།།
ཁྱོད་ཁམས་ང་དབུས་རྩོད་ལ་སྙིང་རྩ་འདར།།

ཉི་མ་སེར་པོའི་ཟེར་གྱིས་ཤིནད་ཏུ་དྲོས།།
ཟླ་བ་དཀར་པོའི་འོད་ཀྱིས་རབ་ཏུ་གསལ།།
བཀུར་བའི་བླ་མ་གང་དེའི་ཐུགས་ལ་བབས།།
དཔོན་གསས་བླ་མ་མཉེས་པའི་ཚོགས་ཆེན་བསགས།།

བསྡུས་རྟགས་ཚད་གསུམ་གོམ་པ་དང་པོ་སྤོས།།
གབ་མཛོད་ས་གསུམ་བང་ཁ་རྒྱང་དུ་གཏད།།
སྔགས་རྫོགས་གཉིས་ཀྱི་མཐོ་བའི་ལ་ཁ་དེར།།
བཤེས་གཉེན་ཆེན་མོའི་ལ་བཙས་བསྭོ་སྒྲས་བཞེངས།།

དཔོན་གསས་བླ་མའི་ཞལ་བཀོད་ཇི་བཞིན་དུ།།
རང་ཡུལ་གངས་རིའི་ཞིང་དུ་ཕྱིར་འཁོར་ནས།།
བྲག་དམར་མེ་རིའི་འདབས་ཀྱི་གཏེར་སྒྲོམ་ཁར།།
འཆད་རྩོད་བཤད་སྡེ་བཞེངས་སའི་ས་སློང་བྱས།།

བཀྲ་ཤིས་ཉི་མ་བཟང་པོས་མདུན་བསུས་ནས།།
རིག་རྒོད་བཙུན་ཆུང་ཁྱུ་ཡི་རྣམ་ཤེས་སྲུབ།།
ཁ་དོག་དཀར་དམར་གཉིས་ཀྱི་འཕྲད་ཐིག་གདབ།།
སྒྲུབ་རྟགས་རྟོགས་ཚད་གཉིས་ཀྱི་རྨིང་གཞི་བཏིང་།།

སྤོང་ལམ་མདོ་ཡི་རྩིག་པ་དགུང་ལ་མཐོ།།
བསྒྱུར་ལམ་སྔགས་ཀྱི་ལྕམ་གདུང་ཧྲག་པོར་བཀོད།།
གྲོལ་ལམ་རྫོགས་པ་ཆེན་པོའི་གསེར་འཕྲུ་མཛེས།།
འཆད་རྩོད་བཤད་སྡེའི་གསས་ཁང་སྦྲ་ལྟར་དབུབ།།

ཕུན་ཚོགས་ཉམས་སྣང་དགའ་བའི་གསས་ཁང་དེར།།
འདུས་འཁོར་བརྒྱ་གྲངས་ཚོགས་ལ་བོན་སྟོན་ནས།།
གཤིས་ངན་དཔྱིད་ཀྱི་གནམ་ངོ་མ་ཡིན་པར།།
རང་ཚུགས་གསེར་གྱི་གཡུང་དྲུང་ཨེ་མ་ཧོ།།

2016/05/28•ཉིན་བྲིས།