༄༅། །ངེད་དྲ་བར་ཕེབས་པར་དགའ་བསུ་ཞུ།
དེ་རིང་ནི་སྤྱི་ལོ 2019 ལོའི་ཟླ 7 ཚེས 17
དྲ་གནས་ཉར་ཚགས།   གཙོ་ངོས་སུ་འགོད་པ།
中文   |   English   |   བོད་ཡིག
ཕྱོགས་སྟོན།:  གཙོ་ངོས། > བོན་སྒོ། > 2 དཔོན་གསས་ལུང་གི་བོན་སྒོ།
2 དཔོན་གསས་ལུང་གི་བོན་སྒོ།
རྗོགས་པ་ཆེན་པོ་ཞང་ཞུང་སྙན་རྒྱུད་ཀྱི་བོན་མི་ནུབ་པའི་གཏན་ཚིགས་བཞུགས་སོ།
[རྩོམ་ཁུངས།:ཁྱུང་པོའི་དྲྭ་བ།] [ཟླ་ཚེས།:2017-06-15] [གཟིགས་ཐེངས:]

          བསྟན་པ་དར་ནུབ་ཀྱི་ལོ་རྒྱུས་བསྟན་པ་ནི།  དང་པོ་བསྟན་པ་གཡུང་དྲུང་བོན་གྱིས་བཟུང་ནས་དར་ཞིང་རྒྱས་པར་བྱས།  མཁས་བཙུན་གྲུབ་པ་རྣམས་ཀྱིས་བསྟན་པ་བསྐྱངས།  སྒྲུབ་པ་པོ་རྒྱལ་ཐེབས་རྣམས་ཀྱིས་བསྟན་པ་འཛིན།  མཐུ་བོ་ཆེ་མན་ངག་དང་ལྡན་པ་རྣམས་ཀྱིས་བསྟན་པ་བསྲུང་།  བོད་དང་ཞང་ཞུང་གཉིས་ཀ་ན་བོན་མ་ཡིན་པ་ཆོས་ཀྱི་སྐད་ཙམ་མེད།  དུས་དེ་ཙམ་ན་ཞང་ཞུང་ན་གྲུབ་ཐོབ་ཙོ་མེན་གྱེར་ཆེན་དང་།  བོད་ན་སྤ་ཇི་ཕྲོམ་དཀར་པོ།  སྟོང་རྒྱུང་མཐུ་ཆེན།  མཁས་པ་མི་བཞི།  བླ་ཆེན་དྲན་པ་ནམ་མཁའི་སྐུ་ཚེའི་སྨད།  སྤྲུལ་པའི་སྐུ་བཞི་ནི།  བཀྲ་ཤིས་རྒྱལ་མཚན།  གུ་རུབ་སྟག་ཝེར་ཤིང་སླགས།  མ་ཧོར་སྟག་གཟིགས།  ཚེ་སྤུང་ཟླ་བ་རྒྱལ་མཚན་དང་བཞིའོ།  ཏ་པི་ཧྲི་ཙེའི་གདམས་པ་བཞག་པའི།  མཆོག་ཐུན་མོང་གཉིས་ལ་མངའ་བསྙེམས་པ་ཡི།  གྱེར་སྤུངས་ཆེན་པོ་སྣང་བཞེར་ལོད་པོ་བཞུགས་པའི་དུས།  དུས་ཀྱི་འཁོར་ལོའི་ཤུགས་ཀྱིས་གཡུང་དྲུང་གི་བོན་ནུབ་པ་ལགས་ཏེ།  རྒྱལ་པོ་ནི།  ཞང་ཞུང་གི་རྒྱལ་པོ་ལིག་མི་རྒྱ།  མོན་གྱི་རྒྱལ་པོ་པན་ར་ལིང་།  བོད་ཀྱི་རྒྱལ་པོ་ཁྲི་སྲོང་ལྡེ་བཙན་བཞུགས་པའི་དུས།  དེ་གོང་རྒྱལ་པོ་རེ་རེ་ལ་སྐུ་འཁྲུངས་པའི་དུས་སུ།  ཕྱི་བློན་གཅིག  ནང་བློན་གཅིག  ཕྲིན་བློན་གཅིག་དང་གསུམ་ལས་མེད།  ཁྲི་སྲོང་ལྡེ་བཙན་གྱི་རིང་ལ།  ཕྱི་བློན་བཅུ།  ནང་བློན་བཅུ།  ཕྲིན་བློན་བཅུ།  སུམ་བཅུ་ཡོད་པའི་དུས་དེར་རྒྱལ་པོའི་མངའ་ཐང་ཆེ་སྟེ།  སྟག་གཟིགས་ནོར་གྱི་རྒྱལ་པོ་བཏུལ་ནས།  ཚོང་ལམ་མཐའ་བར་དུ་ཆུ་བོ་ཆེན་པོས་ཆོད་པ་ལས།  ཤིང་རིང་གི་ཟམ་པ་འཛུགས་པ་དང་།  སྐུ་སྲུང་བྱེད་པར་ཁས་བླངས་སོ།  དེ་དུས་ཞང་ཞུང་གི་རྒྱལ་པོ་ལིག་མི་རྒྱ་བཞུགས་ན།  ཞང་ཞུང་ལ་དམག་སྟོང་སྡེ་དགུ་ཁྲི་དགུ་འབུམ་ཡོད་པའི་སྟེང་དུ།  སུམ་པ་སྟོང་བུ་ཆུང་ཡན་ཆད་མངའ་རིས་ཡིན་ལ།  བོད་ལ་སྟོང་སྡེ་བཞི་བཅུ་རྩ་གཉིས།  སྟོང་བུ་ཆུང་གཅིག་དང་རྩ་གསུམ་ལས་མེད་ན།  ཞང་ཞུང་གི་རྒྱལ་པོ།  བོད་ཀྱི་རྒྱལ་པོས་མངོན་སུམ་དུ་བཏུལ་དུ་མི་ཐུབ་སྟེ།  བོད་ཀྱིས་རྒྱལ་པོའི་ཐུགས་ལ་བརྣག་པ་དང་།  ངན་གྱིས་གཡོ་རྒྱུས་བཏུལ་ལོ་སྙམ་མོ།  དེའི་དུས་ན་ཞང་ཞུང་གི་རྒྱལ་པོ་ལ།  བཙུན་མོ་གསུམ་ཡོད་པའི་ཆུང་ཤོས།  གུ་རུབ་ཟ་སྣང་སྒྲོན་ལེགས་མོ་བྱ་བ་  ལོ་བཅོ་བརྒྱད་ལོན་པ་ཞིག་ཡོད་པ་དེ་ལ།  བོད་ཀྱིས་རྒྱལ་པོའི་ཕྲིན་བློན་པ།  ཞེ་ངན་ལ་ཁོང་གདུག་པ།  སྨྲ་མཁས་ལ་གཡོ་ཆེ་བ།  སྣང་ནམ་ལེགས་གྲུབ་བྱ་བ་ཞིག་གིས།  གསེར་ཕྱེ་འབྲོང་རུ་གང་ཁྱེར་ཏེ།  སྣང་སྒྲོན་ལེགས་མ་ལ་བྱིན་ནས་འདི་སྐད་སྨྲས་སོ།  སྣང་སྒྲོན་ལེགས་པ་ཁྱོད་ལྟར་བུ།  ཞང་ཞུང་རྒྱལ་པོའི་ཁབ་ཡང་ཆུན་བྱེད་པ།  ཁྱོད་རང་ཨ་ཅང་ཆེས་ཏེ།  བོད་ཀྱིས་རྒྱལ་པོས་ཡང་མི་བཟོད་པར་འདུག་པས་ན།  འདི་སྨད་པའི་ཐབས་ཡོད་དམ།  ཡོད་ན་བོད་ཀྱི་རྒྱལ་པོའི་ཁབ་ཀྱི་ཡང་ཆེན་མ་བྱ།  བོད་ཀྱི་མངས་རིས་ཀྱི་སུམ་གཉིས་སྟེར་བར་འདུག་གོ་སྨྲས་པས།  སྒྲོན་ལེགས་མས་ན་རེ།  ཞང་ཞུང་རྒྱལ་པོ་ལ་དམག་ས་ཁེབ་པར་ཡོད།  བོད་ཀྱི་རྒྱལ་པ་ལ་དམག་བ་གྲེ་མོའི་གཞུང་ཙམ་ལས་མེད་པས།  མངོན་དུ་བཏུལ་དུ་མི་ཐུབ་པས།  ངན་དང་ཐབས་ཀྱིས་འདུལ་ན།  ཞང་ཞུང་རྒྱལ་པོ་ནི་ཟླ་བ་ཕྱི་ཏ་ལ།  ཞང་ཞུང་ཡུལ་ནས།  སུམ་པ་གླང་གི་གྱིམ་ཤོད་དུ།  སྐྱ་རྐྱེན་དང་ཆས་ནས་འདུན་མ་ལ་བཞུད་ཀྱིས།  དེར་སྒུགས་ལ་ཀྲོངས་མཛོད་ཅིག  དེའི་བྱ་གཏོང་བདག་གིས་བྱ་ཟེར་ཏེ།  བུ་མེད་ཀྱི་བློ་ལ་ལྟོས་པ་ཅིར་ཡང་མ་འདོད་དེ།  དེ་སྐད་སྨྲས་སོ།  དེར་ཚེས་དུས་ལ་འོང་པའི་བརྡ།  ལ་བཙས་ཀྱི་ཁར་འཇོག་པར་ཆད་དོ།  དེར་བོད་ཀྱི་རྒྱལ་བློན་དམག་མི་སྟོང་སྡེ་མང་པོ་དང་ཆས་ནས་འོངས།  སྣང་ནམ་ལེགས་གྲུབ་དང་།  རྒྱལ་པོ་སྔུན་ལ།  ལ་བཙས་ཁར་བྱོན་ནས་ལྟས་པས།  ཆུ་སླ་ང་གང་གི་ནང་ན།  གསེར་ཆུང་གཅིག  དུང་ཆུང་གཅིག  དུག་མདེལ་གཅིག་དང་གསུམ་གདའོ།  བོད་ཀྱི་རྒྱལ་པོའི་ཞལ་ནས།  ཆུ་སླ་ང་གང་ནི་ཟླ་བ་ཕྱི་མའི་ཉ་ལ་འོང་བྱ་བ་ཡིན།  གསེར་ཆུང་དང་དུང་ཆུང་ནི།  དྭ་རའི་གསེར་ཕུག་དུང་ཕུག་གཉིས་སུ་དམག་ཆོས་ལ་སྒུགས་ཤིག་བྱ་བ་ཡིན།  དུག་མདེལ་ནི་བརྣག་པ་སྐྱེད་ལ་བསྒུག་ལ་སོད་ཅིག་བྱ་བ་ཡིན་ཟེར་ཏེ།  བསྒུགས་སོ།  དེར་རྒྱལ་པོ་གཉིས་མཇལ་ནས།  བོད་ཀྱིས་དམག་མིས་ཞང་ཞུང་གི་རྒྱལ་པོ་བཀྲོངས་སོ།  དེར་ཞང་ཞུང་གི་འབུམ་སྡེ་ཕམ།  བོད་ཀྱི་ཁྲི་སྡེ་ནི་རྒྱལ་ལོ།  དུས་དེ་ཙམ་ན།  དབུས་ཀྱི་ལྷ་ས་བྱ་བར་མི་སྡེ་ཞིག་ཅི་བྱ་བ་མ་བཏུབ་སྟེ།  སྤེ་ནེ་གུ་བྱ་བའི་མོ་མ་ཞིག་ལ་མོ་བཏབ་པས།   ཁྱེད་ཀྱི་མི་སྡེ་ཕུང་པ་ནི་སུས་ཀྱང་མ་ལེན་ཏེ།  ཕ་མེད་པའི་བུ་ཞིག་ཡོད་པ་དེའི་ནལ་སྣ་ཟུག་པ་ཡིན་ཟེར་རོ།   དེ་གང་ཡིན་བྱས་པས།  ཁྱེའུ་ལོ་བཅོ་ལྔ་ལོན་པ་ཞིག་ལ།  ལྕག་སྣ་བཙུག་ནས་འདི་ཡིན་ཟེར་རོ།  དེ་ལ་ཅིས་ཕན་དྲིས་པས།   བོན་མོ་རུས་སྣ་མི་འདྲ་བར་བཅོ་ལྔས་སེལ་ཆེན་ཞིག་གྱིས་ལ།  ནལ་བུ་གླང་ཁམ་པ་ཞིག་ལ་སྐྱོན་ལ།   ཁ་ནུབ་ཏུ་སྟོན་ལ་སྐད་རིགས་མི་གཅིག་པའི་ཡུལ་དུ་སྤྱུགས་ན་ཕན་ཟེར་ནས།  ཁ་ཆེ་བྱེད་བྲག་སྨྲ་བའི་ཡུལ་དུ་སྤྱུགས་སོ།  ཁྱེའུ་ཡང་ལས་འཕྲོ་ཅན་ཞིག་བྱུང་སྟེ།  རྒྱ་གར་ཡུལ་གྱི་ཆོས་བསླབ་ནས།  ལོ་ཚ་བ་བཟང་པོ་ཞིག་བྱུང་ནས།  མིང་ཡང་བྷོ་ཏེ་ས་ཏྭར་བཏགས་སོ།  ཁོ་སྤྱུགས་པའི་རྐྱེན་མོ་མ་བོན་པོས་བྱས་པས།  རྒྱལ་བློན་གྱིས་བར་དུ་ཕྲ་མ་གསོལ་བ།  བོན་སྣུབས་ལ་ཆོས་མཛོད།  བཀའ་ནི་དམ་པའི་ཆོས་བདེན།  བོན་འདི་མངའ་ཐང་མཐོ་ན།  རྒྱལ་སྲིད་དང་།  རྒྱལ་ཁམས་ཡོངས་ལ་གནོད་པར་མཆིས་པས།   བོན་བསྣུབ་དགོས་ཟེར་ཏེ་ཕྲིན་བརྫངས་སོ།  རྒྱལ་པོས་ཕྲ་མ་ལ་མ་གསན་པར།   འོ་ན་ཉི་ཟླ་ཡང་སྣུབ་བམ།  དུས་ལ་བབ་སྟེ་ནུབ་པ་སྲིད་པ་ལས།  ཆེད་དུ་སྣུབ་དུ་མི་རུང་གསུངས།  དུས་དེ་ཙམ་ན།  ཉི་ཟླའི་འོད་ཀྱང་ཤི་བ་ཞི་བྱུང་།  མོན་གྱི་རྒྱལ་མོ་པན་ར་ལིང་གིས་རྨི་ལྟས་སུ།  གསེར་གྱི་ཉི་མ་སྟོང་གསུམ་ཡོངས་ལ་དྲོ་བ་ཞིག་ཤར་བས།  སའི་གཏིང་དུ་ནུབ་པ་ཞིག་རྨིས་ནས།  རྨི་ལམ་དེ་རྒྱལ་པོ་ཧ་ལ་ཡ་ག་ལ་བཤད།  དེས་བློན་པོ་དེ་ཤི་དེ་རྩོ་ལ་བཤད།  དེ་གཅིག་ནས་གཅིག་དུ་ཐོས་ནས་རྒྱལ་པོའི་སྙན་དུ་གསན་ནས།  བོད་ཀྱི་རྒྱལ་པོའི་ཐུགས་དགོངས་ན་སྨྲས་པ།  ནལ་བུ་འདི་འདྲ་རྒྱལ་ཁམས་སུ་སྤྱུགས་པས།  ཟམ་འཕྲང་དང་ལྷོ་བལ་གྱི་ཚད་པས་མ་ཤི་བར།  རྒྱལ་གར་གྱི་ཡུལ་དུ་ཆོས་བསླབ་ནས།  མཁས་པར་གྱུར་ནས་བདག་ལ་ཕྲ་མ་གསོལ་ལུགས་སམ།  བོན་སྐྱོང་རྒྱལ་པོ་བཀྲོངས་ལུགས་སམ།  མོན་གྱི་རྒྱལ་པོའི་རྨི་ལྟས་འོང་ལུགས་སམ།  གཡུང་དྲུང་གི་བོན་རིན་པོ་འདི་ནུབ་ནུབ་འདྲ་གསུངས་ནས་བསྣུབས་སོ།  ཞང་ཞུང་གི་ཁྲི་སྡེ་ནི་ཡར་ཆད།  སུམ་པ་སྟོང་སྡེ་ནི་མར་བུད།  བོད་སིལ་བུར་སོང་བའི་དུས་དེར།  ཞང་ཞུང་རྒྱལ་པོའི་ཁམ་ཆེན་མ་ཁྱུང་ཟ་མཚོ་རྒྱལ་དེས།  བོད་ཀྱི་རྒྱལ་པོ་ལ་ཐུགས་ཀྱི་བརྣག་པ་སྐྱེས་ནས།  གྱེར་སྤུངས་སྣང་ཞེར་ལོད་པོ་སྤྱན་དྲངས།  ཟ་འོག་དགུ་རིམ་གྱི་གདན་བཏིངས།  དར་དཀར་ཤ་བ་རིས་ཀྱི་གུར་ཕུབ།  འབྲས་ཆང་དེང་པ་དྲངས།  བདའ་དགུ་དང་འདོད་དགུ་ནི་ཕུལ།  གདུང་བའི་མཆི་མ་ཁྲག་ཏུ་གཏིགས་ནས་ཞུས་པ།   བོན་སྐྱོང་རྒྱལ་པོ་ནི་བཀྲོངས།  བོན་ཁྲིམས་དར་གྱི་མདུད་པ་ནི་ཞིག  །རྒྱལ་ཁྲིམས་གསེར་གྱི་གཉའ་ཤིང་ནི་ཆག  བོན་ཁམས་སིལ་བུར་སོང་།  གཡུང་དྲུང་བོན་གྱི་བསྟན་པ་ནི་ནུབ།  འདི་ལྟར་བུའི་དུས་བྱུང་པས།  ཐུགས་ཀྱི་བརྣག་ཞུ་འཚལ་ཞུས་པས།  སྣང་ཞེར་ལོད་པོའི་ཞལ་ནས།  ང་ལ་སྤུ་བྱ་བ་གསེར་སྲང་གཅིག་ལ་ལོ་གསུམ་བསྒྲུབས་ནས་བཏང་ན།  བོད་ཁམས་རླུང་གིས་འཁྱེར་བ་ཡོད་པ་འདི་བྱ་འམ།  ཁྱུང་བྱ་བ་གསེར་སྲང་ཕྱེད་ལ་ཟླ་བ་གསུམ་བསྒྲུབས་ནས་བཏང་ན།  ཡར་ལུང་སོགས་ཀའི་ཁྲི་སྲོང་ལྡེ་བཙན་འཁོར་དང་བཅས་པ་ཕུང་པ་ཡོད་པ་དེ་བྱ་འམ།  རྔུབ་བྱ་བ་གསེར་ཞོ་གཅིག་ལ་ཞག་བདུན་གཅིག་ལ་བསྒྲུབས་ནས་བཏང་ན།  རྒྱལ་པོ་ཉིད་སོད་པ་ཡོད་པ་འདི་བྱ་འམ།  གསུངས་པས།  མཚོ་རྒྱལ་གྱི་ཞལ་ནས་རྔུབ་མཛད་པར་འཚལ་ལོ་ཞུས་པས།  གྱེར་སྤུངས་ཆེན་པོ་ད་རོག་མཚོ་གླིང་ལ།  དར་དཀར་ཤ་བ་རིས་ཀྱི་གུར་ཕུབ།  ཟ་འོག་དགུ་རིམ་གྱི་གདན་ལ་བཞུགས་ནས།  ཞག་བདུན་བསྒྲུབས་ནས།  གསེར་ཞོ་གཅིག་གསུམ་དུ་བཅད་ནས།  སུམ་ནམ་གཅིག་སྲོད་ལ་འཕང་པས།   སོག་ཁ་སྤུན་པོའི་རི་ལ་ཤ་བ་བདུན་ཉལ་བ་རྒྱབ་ནས།  གཉིས་ཤི་ལྔ་རེངས་པས།  ཤ་བ་རེངས་ཀྱི་རི་བྱ་བ་ཡོད་དོ།  སུམ་ནམ་གཅིག་ཐོ་རངས་འཕང་པས།  སྐུ་མཁར་བྱི་བ་སྟག་རྩེ་ལ་རྒྱབ་ནས།  རྒྱལ་པོ་སྙུང་གིས་ཟིན་ནོ།  རྒྱལ་པོ་རིག་པ་ཅན་དེས་ཞལ་ནས།  གཡུང་དྲུང་བོན་གྱི་བསྟན་པ་བསྣུབས།  བོན་སྐྱོང་པོ་བཀྲོངས།  ད་ནང་ཐོ་རངས་ཙྭོ་འོང་ལུགས་ཀྱིས།  གྱེར་སྤུངས་ཆེན་པོ་ཐུགས་ཁྲོས་པ་ཡིན་པས།  གསེར་ཕྱེ་འབྲོང་རུ་གང་ཁྱེར་ལ།  མི་རྟ་བརྒྱ་ཐམ་པ་ཆོས་ཤིག  གྱེར་སྤུངས་དེ་ལ་ང་གསོ་བའི་ཐབས་ཡོད་དོ།  དེ་གདན་མ་འགྲོངས་ན་ང་ནི་མྱུར་དུ་འཆི་བ་འདྲ་གསུངས་སོ།  དེར་རྟ་པ་བརྒྱ་དྲྭ་བྱེའི་ལུང་པར་ཕྱིན་ནས།  ཞང་ཞུང་གི་རྫི་བོ་ལ་བོད་ཀྱི་རྟ་པ་རྣམས་ཀྱིས་གཏམ་དྲིས་པ།  གྱེར་སྤྱངས་ཐུགས་ཀྱི་བརྣག་པ་ཕྱུངས་ནས་བོད་ཀྱི་རྒྱལ་པོ་བསྙུང་།  གྱེར་སྤུངས་ལ་སྐུ་རྒྱལ་འབུལ།  སྤྱན་འདྲེན་པས་གང་ན་བཞུགས་དྲིས་སོ།  རྫི་བོས་སྨྲས་པས།  མཚོ་གླིང་ཉེ་བྲག་དཀར་པོ་མ་གིའི་རྩ་ན་དར་དཀར་ཤ་བ་རིས་ཀྱི་གུར་ཕུབ་ན་ཡོད།  སྐུ་མ་ངེས་ཏེ་ཅིར་ཡང་སྤྲུལ་ཟེར་རོ།  དེར་མཚོ་ལ་གྲུ་གཏང་ནས་ཕྱིན་པས།  ཟ་འོག་གི་གདན་དགུ་རིམ་གྱི་སྟེང་ན།   ཤེལ་གྱི་རྣ་རུར་སྤྲུལ་ནས་འདུག་པ་ལ།  གསེར་ཕྱེ་འབྲོང་རུ་གང་ཕུལ་ནས་བསྐོར་བ་དང་ལྷ་ཕྱག་བྱས་པས།  ཤེལ་གྱི་རྣ་རུ་གྱེར་སྤུངས་སུ་སྐུ་བཞེངས་ནས་གསུངས་པ།  བོན་སྐྱོང་རྒྱལ་པོ་བཀྲོངས།  གཡུང་དྲུང་བོན་གྱི་བསྟན་པ་བསྣུབས།  ཐུགས་ལས་བརྣག་པ་སྐྱེས་ནས་ཀྱང་།  བོད་ཀྱི་རྒྱལ་པོ་བཀྲོངས་ནས་བོད་ཁམས་ཕུང་ནས་འགྲོ་བ་ལ། ད་ངས་སྨྲས་པ་ཁས་ལེན་ནམ་གསུངས་།  བློས་པོས་ཞུས་པ།  རྗེ་ཁྲི་སྲོང་ལྡེ་བཙན་གྱིས་ཞལ་ནས།  དང་པོ་གཡུང་དྲུང་བོན་བསྣུབས་པ་ཡང་ངས་མ་ཉེས་ཏེ།  བྷོ་ཏི་ས་ཏ་དང་རྒྱ་གར་གྱི་མཁན་པོ་རྣམས་དང་།  འཁོར་གྱི་བློན་པོ་རྣམས་ཀྱིས་ཕྲ་མ་ལགས།  ད་ཅི་ལྟར་གསུངས་པ་བཀའ་ཉན་ཞུས་པས།  འོ་ན་ངའི་ཚིག་བཞི་འདི་སྟེར་རམ།  ངས་སྤྱོད་པའི་ཞང་ཞུང་གི་བོན་སྡེ་སུམ་བརྒྱ་དྲུག་ཅུ་མི་བསྣུབ་པ་དང་གཅིག  གུ་རུབ་ཀྱི་མི་སྡེ་འདི་ལ་ཡུལ་ཡར་ལུང་སོགས་ཁ་བྱིན་ནས།  བླ་དང་དཔོན་གྱིས་ཁྲལ་མེད་པར་གཡས་གྲལ་ལ་འཇོག་པ་དང་གཉིས།    རྗེ་ལིག་མི་རྒྱའི་སྐུ་ཚད་དུ།  གསེར་གྱི་མཆོད་རྟེན་ལ་གཡུང་དྲུང་འདོམས་གང་དགར་བ་དང་།  ཁྱུང་ཟ་མཚོ་རྒྱལ་གྱི་སྤྱན་སྔར།  ལྷུ་བཅུ་གཉིས་མགོ་དང་བཅུ་གསུམ་གྱི་སྟོང་འཇལ་བ།  གཙིགས་སུ་སྦྱིན་ནམ་གསུངས་སོ།  དེར་དབང་བློན་མི་གསུམ་གྱི་ཁས་བླངས་སོ།  དེ་ནས་གྱེར་སྤུངས་རྗེའི་སྤྱན་སྔར་གདན་སྐྱོད་ནས།  ཕྱིར་ལྡོག་གི་ཆོ་ག་གསང་ཐིས་འཕར་མ་དགུ་བསྐོར་མཛད།  རྗེའི་བུ་ག་དགུ་ནས་གསེར་གྱི་སྐུད་པ་དར་སྐུད་སྒྲིལ་མ་ཙམ་རེ་ཡང་བཏོན་ནོ།  སྲང་ལ་བཅལ་བས་སུམ་ནམ་གཅིག་བཏོན་ནོ།  དེའི་རྗེ་ལ་ཁྲག་ངན་དང་རྣག་དང་ཆུ་སེར་ལས་སོགས་པ་མང་དུ་བཏོན་བསྙུངས་པ་གདངས་སོ།  རྒྱལ་པོ་ཡང་ཤིན་ཏུ་དྲིན་ནས་ཞང་ཞུང་བོན་སྡེ་རྣམས་མ་བསྣུབས་སོ།  གུ་རུབ་ཀྱི་མི་སྡེ་ལ་ཡུལ་སོག་ཁ་དང་།  གྲལ་གཡས་ལ་བཞག་གོ  ཞང་ཞུང་རྒྱལ་པོའི་སྐྱ་ཚད་དང་མི་སྟོང་བཅུ་གསུམ་བཙུན་མོའི་སྤྱན་སྔར་བརྫངས་སོ། དེར་གཡུང་དྲུང་གི་བོན་དར་ཞིང་རྒྱས་པར་བཞུགས་དུས།  བཀའ་བྱིན་རླབས་ཀྱི་བདག་པོ་གྱེར་སྤུངས་སྣང་བཞེར་ལོད་པོ་ལ།  མཁས་པ་གྲུབ་ཐོབ་སྟོང་རྒྱུང་མཐུ་ཆེན་གྱིས་ཞུས་ཏེ།  བོན་སྒོ་བསམ་གྱིས་མི་ཁྱབ་པ་ཞུས་སོ།  དེ་རྣམས་ཁ་བྱང་རྒྱས་པར་གསལ།  འདི་ནི་སྡུས་པའི་བོན་མི་ནུབ་པའི་གཏན་ཚིགས་ཟུར་ཙམ་བསྟན་པ་ལགས་སོ།  སརྦ་མངྒ་ལཾ།  དགེའོ། 




སྐད་འཇོག་རེའུ་མིག

འདྲེན་སྐོལ། དཔྱད་གཏམ(0)ཡོད།