ཨཿགཞི་ཀ་དག་གདོད་མའི་ཀློང་ཡངས་ནས། །
ལམ་གསལ་སྟོང་དབྱེར་མེད་ངོ་བོ་གཤིས། །
འབྲས་རེ་དོག་བཅོས་སླད་མེད་པ་ཡི། །
རང་སེམས་ཉིད་རིག་པའི་རྒྱལ་པོར་འདུད། །
ཕ་གདོད་མའི་མགོན་པོ་ཀུན་ཏུ་བཟང་། །
གྲོགས་རང་སེམས་དཀྱིལ་འཁོར་སུམ་ལྡན་པ། །
མ་ཡེ་ཤེས་དབལ་མོའི་བརྩེ་བས་སྐྱོང་། །
རྗེ་བླ་ཆེན་ཡབ་སྲས་རྣམ་གསུམ་དང། །
གཏེར་བདག་ཉིད་བྷེེ་རོ་གསང་རྩལ་སོགས། །
སྐྱབས་རིགས་བདག་བླ་མར་གསོལ་བར་འདེབས། །
དུས་ལྔ་སྙིགས་བསྐལ་པའི་ཁུག་སོ་ན། །
ལམ་གྲོལ་ལམ་ཉམས་ལེན་རྫོགས་པ་ཆེ། །
སྒོམ་ལྟ་སྤྱོད་རྟུལ་ཤུགས་བྱུང་རྒྱལ་ངང་། །
སེམས་རེ་མེད་དོག་མེད་འབྲས་བུའི་གཤིས། །
བུ་སྤྲང་ཕྲུག་གཏན་གྱི་ཚུགས་འདི་བཟུང་། །
དུས་ངན་གྱི་མི་རྣམས་སྙིང་རེ་རྗེ། །
བླ་སྤྲུལ་རྣམས་མཁས་གྲགས་རང་འདོད་ཆེ། །
ངོས་དགའ་དང་རྫུན་གཡོ་ཆགས་སྡང་ཅན། །
ཁ་བདེ་བའི་དྲན་འཕྲུལ་ངན་སོང་རྒྱུ། །
ལོ་ཟླ་གྲངས་བོན་ལ་ཐོས་བསམ་སྦྱངས་། །
སེམས་དུག་ལྔ་བསྒོམས་ནས་ཕྲག་དོག་སྐྱེ། །
ཐེག་ཆེན་དང་ཐེའུ་རང་ནོར་བ་དང་། །
གདམས་ངག་དང་གཏམ་དཔེ་ནོར་བ་འདྲ། །
འཁྲུལ་སྣང་གི་འཁོར་བ་རང་གིས་བཟོས། །
རྒྱུ་འབྲས་བུ་ཁ་བཤད་དོན་ལ་རྨོངས། །
དུས་སྙིགས་མའི་སེམས་ཅན་སྙིང་རེ་རྗེ། །
བུ་བརྟུལ་ཞུགས་སྤྲང་ཕྲུག་རྣལ་འབྱོར་ང་། །
རོ་སྙོམས་ཀྱི་སྤྱོད་པ་དལ་གྱིས་གློད། །
ཚེ་སྔོན་ནས་དམ་ཚིག་གཅིག་འབྲེལ་གྲོགས། །
གསང་དབང་བཞི་གཅིག་རྫོགས་གཡུང་དྲུང་སྤུན། །
དོན་དམ་ཚིག་གཅིག་འབྲེལ་སྙིང་གཏམ་འདི། །
བུ་ཐོས་ཆུང་ཁ་ནས་ཐོལ་ལེར་ཤོར། །
སྙན་གྲགས་འདི་དུག་ཤིང་ལོ་མ་འདྲ། །
གང་རེག་ཚད་ཉོན་མོངས་རང་མགོ་འཁོར། །
རྒྱུ་ནོར་འདི་དུག་ཆང་འཐུང་པ་འདྲ། །
གང་མྱོང་ཚད་འདོད་པའི་དུག་ཏུ་འགྱུར། །
མི་ཆོས་འདི་ནེ་ཙོའི་ལུས་ཅན་འདྲ། །
སེམས་དུག་ལྔ་བསྒོམས་པའི་ས་བོན་འགྱུར། །
རྗེ་བླ་མའི་ཐུགས་ཟིན་དམ་ཚིག་གསོ། །
འབངས་མཆེད་གྲོགས་ངོ་བཟུང་འཛུམ་ཁ་སྟོན། །
ནང་དུས་དྲུག་མཆོག་གསུམ་སྐྱབས་གནས་མཆོད། །
འདི་ལྷ་ཆོས་སྒྲུབ་པའི་མི་ཆོས་ཡིན། །
མིང་སྙན་གྲགས་བསམ་པའི་བཤད་སྒྲུབ་སྡེ། །
སེམས་ཆགས་སྡང་ཁེངས་བའི་བླ་སྤྲུལ་མཁན། །
རྒྱུ་ནོར་ལ་དད་པའི་བཙུན་གཟུགས་དང་། །
ཉོན་མོངས་ཀྱི་ཁ་ཁྲིད་སྔགས་འཆང་བ། །
བདག་འཛིན་གྱིས་བཅིངས་བའི་སྤྱོད་པ་སོགས། །
གྲོགས་དེ་རྣམས་མི་འདོད་མཉམ་པར་ཞོག །
ཕ་རིག་འཛིན་གྲུབ་བརྒྱའི་བྱིན་རླབས་དང་། །
མ་མཁའ་འགྲོའི་བརྡ་དངོས་ལུང་སྟོན་དང་། །
བུ་དགོངས་ཟབ་སྙིང་བཅུད་ཀློང་རྡོལ་གཏེར། །
འདི་ཚེ་རབས་བསགས་པའི་བསོད་ནམས་ཡིན། །
དུས་ཀུན་ཏུ་བསྟན་འགྲོའི་དོན་ནུས་ཤོག །
མིང་སྙན་གྲགས་བསམ་པའི་མི་ཆོས་དང་།
རང་བདེ་སྐྱིད་འདོད་པའི་འདོད་སེམས་ཅན། །
རྒྱུད་གྲུབ་མཐར་ཆགས་སྡང་སྤང་བླང་སོགས། །
མི་ང་ཡིས་མི་ཤེས་ངོ་མི་སྲུང་། །
དྲིན་སུམ་ལྡན་རྩ་བའི་བླ་མ་དང་། །
དབང་དམ་ཚིག་འདྲེས་པའི་སྤུན་གྲོགས་རྣམས། །
སེམས་ངེས་དོན་བསྟན་པའི་སློབ་མའི་ཚོགས། །
ཐུགས་དགོངས་འཚོམས་མེད་པ་འཕྲིན་འདི་གསོན། །
སྤྲང་ལོ་བརྒྱ་བསྒོམས་པའི་ཉམས་ལེན་དོན། །
མ་མཁའ་འགྲོའི་གསང་བའི་དམ་ཚིག་གནད། །
བོན་ཐེག་ཆེན་གདམས་ངག་སྙིང་པོའི་བཅུད། །
བུ་ཐོས་ཆུང་དམ་ཚིག་འཕྲིན་འདི་བཞག །
ནང་སེམས་ཉིད་བདེ་སྟོང་འོད་གསལ་ངང་། །
ཕྱི་སྣང་བ་སྣ་ཚོགས་རྩིས་གདབ་ཟད། །
དོན་འཁོར་འདས་མཉམ་པའི་ཉམས་ལེན་འདི། །
དུས་ཀུན་ཏུ་འབྲལ་མེད་སྐྱོང་ནུས་ཤོག །
ཚེ་གོང་ནས་སྒྲུབ་པའི་དབལ་མོའི་ཡུམ། །
དུས་ཀུན་ཏུ་སྐྱོང་མཛད་ཞལ་གྱིས་བཞེས། །
བུ་སྐལ་ལྡན་བདེན་པའི་དཔུང་གྲོགས་མཛོད། །
བསྟན་འགྲོ་དོན་གེགས་མེད་ལྷུན་གྲུབ་ནས། །
མཐར་འཇའ་ལུས་འགྲུབ་པའི་བཀྲ་ཤིས་ཤོག །
ཅེས་སྙིགས་མའི་སྔགས་འཆང་ཀུན་བཟང་བསྟན་འཛིན་རིན་པོ་ཆེའི་ཉམས་མྱོང་གྱི་རང་གཤིས་མ་བཅོས་ངང་གང་དྲན་གདམས་པའོ། །ཚ་རོང་ཤེས་རབ་འོད་ཟེར་ནས་སྤྱི་ལོ་༢༠༡༠ ལོའི་བོད་ཟླ་༥ པའི་ཚེས་༢༩ ཉིན་གློག་ཀླད་དུ་སྤེལ།
