༄༅། །ངེད་དྲ་བར་ཕེབས་པར་དགའ་བསུ་ཞུ།
དེ་རིང་ནི་སྤྱི་ལོ 2021 ལོའི་ཟླ 4 ཚེས 17
དྲ་གནས་ཉར་ཚགས།   གཙོ་ངོས་སུ་འགོད་པ།
中文   |   English   |   བོད་ཡིག
ཕྱོགས་སྟོན།:  གཙོ་ངོས། > མཚམས་སྦྱོར། > 3 སློབ་གླིང་དང་མཛད་སྒོ།
3 སློབ་གླིང་དང་མཛད་སྒོ།
ཁྱུང་པོ་སྟེང་ཆེན་དགོན་གྱི་ལོ་དུས་ལྟར་དུས་མཆོད་ཁག་གི་མཛད་སྒོའི་ཉིན་བཅུ་པ།
[རྩོམ་ཁུངས།:ཁྱུང་པོ་དྲྭ་བ།] [ཟླ་ཚེས།:2020-12-03] [རྩོམ་པ་པོ།:ཁྲི་རིག་མདའ།] [གཟིགས་ཐེངས:]

འཁྲུལ་རྟོག་བརྒྱད་ཁྲིའི་ཆུ་འཛིན་ཀུན་བྲལ་ཞིང་།།

རང་བཞིན་རྣམ་དག་མཁའ་ལས་མ་གཡོས་ཀྱང་།།

ཀུན་མཁྱེན་ཉི་ཟླའི་བཀོད་པ་ལྷུན་ལ་རྫོགས།།

སྟོན་མཆོག་བརྒྱ་པའི་མགོན་དེས་དགེ་ལེགས་སྩོལ།།


      ཅེས་ཡུལ་ཁྱད་པར་ཅན་ལ་མཆོད་པར་བརྗོད་དེ།  གང་ཞིག་བཤད་པར་བྱ་བ་ནི་བླ་རི་གངས་དཀར་བརྗིད་ཀྱིས་འགྱིང་ཞིང་ཁ་འབབ་ཆུ་བོ་ཤང་ཤང་དུ་འབབ་པའི་ཡུལ།   སྟོད་ན་མངའ་རིས་སྐོར་གསུམ་བར་ན་དབུས་གཙང་རུ་བཞི།   སྨད་དུ་མདོ་ཁམས་སྒང་དྲུག་གི་ནང་ཚན་རྔུལ་རྫ་ཟལ་མོའི་སྒང་སྟོད།   ཞང་ཞུང་སྒོ་ཕུག་བར་གསུམ་གྱི་ཡ་གྱལ། སུམ་གླང་གྱིམ་ཤོད་ཀྱི་མཐིལ། ཁྱུང་པོ་རིག་པ་འབྱུང་བའི་ལྟེ་གནས་ཏེ་ཤར་དུ་བོད་ཆེན་སྤེན་ནེ་རི་བཀྲ། བྱང་དུ་སྤུ་ཐོག་མཚོ་ཆེན་མཚོ་ཆུང་།  ནུབ་ཏུ་སྤུ་རྒྱལ་གཡུང་དྲུང་ལྷ་རྩེ། ལྷོ་རུ་རི་དམར་དབང་ལྷ་བཙན་རྒོད་ཀྱི་ཐད་སོ།  ཁྱུང་པོ་དཀར་ནག་སེར་གསུམ་གྱི་ནང་ཚན་རྒྱལ་ཁྱུང་དཀར་པོའི་གདན་ས།  ཉམས་དགའ་ལ་ཡིད་དུ་འོང་བ།  གནམ་ལ་འཁོར་ལོ་རྩིབས་བརྒྱད་ས་ལ་པད་མ་འདབ་བརྒྱད།  བར་ལ་རྒྱ་ཞིང་ཆུ་མ་ལ་གསེར་མདོག་སྙེ་མས་གང་བ་ལ།  རྫོགས་བྱང་གཉིས་ཀྱི་ཆུ་བོ་ལྷང་ལྷང་དུ་འབབ་པའི་དཀྱིལ།   ལུང་གིས་ཟིན་པའི་གནས་ཆེན་བྲག་དམར་རི་ཡི་འདུས་ཞོལ།    རྒྱལ་བསྟན་འཁོར་ལོ་གསུམ་གྱི་གདུགས་དཀར་བླ་ནས་བླ་རུ་འདེགས་ཤིང་།  ལྔ་ཟུང་རིག་པའི་མེ་ཏོག་ཕང་ཕུང་དུ་བཞད་པས་གཡུར་དུ་ཟ་བའི་འབྲས་བུ་བླ་ལྷག་ཏུ་སྨིན་པའི་སློབ་གླིང་། ཁྱུང་པོ་མི་རྗེ་བླ་དཔོན་གྱི་གདན་རབས་མུ་ཏིག་ཕྲེང་བས་ཞབས་ཀྱིས་བཅག་པའི་གདན་ས་ཁྱད་པར་ཅན།   ལྷག་པར་དུ་གདུལ་བྱའི་བསོད་ནམས་ཀྱི་ཞིང་ས་ལ་དུས་སུ་བབས་པའི་ཆར་པ།  ལུགས་གཉིས་ཀྱི་སྙིང་བཅུད་ལེགས་པར་བཤད་པའི་སྟོན་པ། ངོ་བོ་རྒྱལ་བ་དང་མཉམ་ཞིང་བཀའ་དྲིན་རྒྱལ་བ་ལས་ཀྱང་ལྷག་པ། སྐུ་མི་འགྱུར་གསེར་གྱི་ལྷུན་པོ། གསུང་མི་ཟད་བོན་གྱི་འཁོར་ལོ། ཐུགས་དགོངས་ཟབ་མཁྱེན་བརྩེའི་བདག་ཉིད་ཅན། དགོན་འདིའི་བླ་རབས་ཉེར་བདུན་པ༧སྐྱབས་རྗེ་འོད་ཟེར་སྦྱིན་པ་ཕུན་ཚོགས་སམ་ཚོགས་གཉིས་རྒྱ་མཚོ་ནོར་བུས་སེམས་དང་བསམ་པས་བསྐྱངས་པའི་གཤེན་གྱི་སྡེ་ཆེན་མོ་༧ཁྱུང་པོ་སྟེང་ཆེན་དགོན་ནམ་དཔལ་གཤེན་བསྟན་ཁྱུང་དཀར་གཡུང་དྲུང་བསྟན་རྒྱས་གླིང་འདི་རུ།


འཆར་ཅན་ལྟར་བཤད་སྒྲུབ་སྒོམ་གསུམ་དང་གྲྭ་ཚང་ཡོངས་ནས་ལོ་ལྟར་སྲོལ་རྒྱུན་དུས་མཆོད་ཁྲོ་ཕུར་དགུ་གཏོར་ཆེན་མོ་དང་བོན་སྐྱོང་སྒྲུབ་པ། ཤི་གསོན་གཉིས་ཀྱི་དགེ་བའི་མཆོད་སྡོང་ཆེན་ཀུན་རིག་ལས་བཞི་རྒྱུན་ལྔ་སོགས་མཆོད་བཤམས་ཀྱི་ཐད་ནས་གྲ་རྒྱས་སྤུ་གཙང་ཅི་ཐོན་གང་ཐོན་དང་། ཆོ་ག་གཞུང་བསྲང་གི་ཐད་ནས་རྒྱས་འཚོགས་དང་རྒྱས་འདོན་བྱས་ཏེ་དད་ལྡན་ལྷ་སྡེ་རྣམ་པས་ཕུལ་བའི་རྒྱུ་འབྱོར་ཆུད་ཟོས་སུ་མ་སོང་བར་“མར་མེ་སྡོང་རྩར་ཐིངས”ཞེས་པའི་དཔེ་ལྟར་འགོ་དབུ་འཛིན་༧སྐྱབས་རྗེ་ཁྲི་འཛིན་རིན་པོ་ཆེ་ནས་མཇུག་དགོན་ཞབས་ཀྱི་ལྷ་སྡེ་ཡན་ཆོད། བཤད་སྒྲུབ་སྒོམ་གསུམ་གྲྭ་ཚང་དང་བཅས་པས་ལྷག་བསམ་རྣམ་པར་དག་པས་ཀུན་ནས་བསླངས་ཏེ་ཚགས་ཚུད་སྤུས་གཙང་གི་སྒོ་ནས་དངོས་གཞི་གཞུང་དོན་ལ་འཇུག་ཡོད།

1606957303607388.jpg

1606957260370924.jpg

1606957260183748.jpg

1606957261806058.jpg

1606957261746576.jpg

1606957262354831.jpg


     དེ་རིང་སྤྱི་ལོ་༢༠༢༠ལོའི་སྤྱི་ཟླ་༡༢པའི་ཚེས་༢ཉིན་གྱི་ཞོགས་ཀའི་ཕྱག་ཚོད་༧•༣༠ཐོག་བསླབ་གསུམ་བསྟན་པའི་བདག་ཉིད་དགོན་འདིའི་བླ་རབས་ཉེར་བདུན་པ༧སྐྱབས་རྗེ་ཁྲི་འཛིན་བླ་མ་འོད་ཟེར་སྦྱིན་པ་ཕུན་ཚོགས་རིན་པོ་ཆེ་དང་༧དཔོན་སློབ་རིན་པོ་ཆེ་རྒྱལ་བ་བསྟན་འཛིན། ༧སྒྲུབ་མཁན་རིན་པོ་ཆེ་འཕགས་མཆོག་སེམས་དཔའ་དབུས་པའི་འདི་གའི་བླ་མ་དགེ་བཤེས་སྤྲུལ་སྐུ་མཁན་པོ་དང་ད་ལོའི་དགེ་བཤེས་དང་སྒྲུབ་ཐོན་སྒོམ་ཐོན་བཅས་བཤད་སྒྲུབ་སྒོམ་གསུམ་གྲྭ་ཚང་ཡོངས་རྫོགས་སེར་ཕྲེང་བསྒྲིགས་ཏེ།    ལ་ལས་དར་ཕྱར། ལ་ལས་སྤོས་བདུག ལ་ལས་དུང་འབུད།  ལ་ལས་རྒྱ་གླིང་གཏོང་། ལ་ལས་རྔ་རྡུང་།  ལ་ལས་སྦུབ་རྡེབ།  ལ་ལས་སྐུ་གསུམ་མེ་ལྷའི་ཤིང་བྱང་སྣོམ་ནས་སེར་ཕྲེང་ལ་ཕེབས།  དེ་ནས་དལ་ལྷོད་རན་པའི་སྒོ་ནས་མེ་ཐབ་དཀྱིལ་འཁོར་ལ་སྐོར་བ་གསུམ་རྒྱབ། མེ་ཐབ་ཀྱི་ཕྱོགས་རེར་སླེབ་དུས་རྔ་རྡུང་རེ་དང་རོ་བཀྱག་པའི་ཚིག་བཤད་རེར་གྲུབ་མཚམས།  བླ་སྤྲུལ་མཁན་གསུམ་དང་གྲྭ་བཙུན་ཡོངས་གདན་དུ་བཞུགས་ནས་ཁྲོ་བོའི་མཚམས་ཅད་དང་ཁྲོ་བོའི་ཕྱག་རྒྱ་ལག་ལེན་མ་ནོར་བསྒྱུར།  དེ་ནས་རིམ་བཞིན་དབང་གི་མངོན་རྟོགས་དང་མཆོད་རྫས་བྱིན་རླབས་སྤྱན་འདྲེན་སོགས་དབང་མཆོད་སྐོར་དང་པོའི་སྐུ་སྟོད་ཡན་མེ་ཐབ་རྩར་བཏང་།  ནང་དུ་ཡར་ཕེབས་ནས་དབང་མཆོད་སྐོར་བཞི་བླུགས། དབང་མཆོད་སྐོར་ལྔ་ཐོན་མཚམས་སེར་ཕྲེང་ཕེབས།  དེ་ནས་དྲག་པོ་སྤ་མདེལ་ལུགས་ལྟར་དྲག་པོའི་མཆོད་ཕྲེང་དང་ཚིག་བཤད་མ་ནོར་སྦྲག་སྟེ་བླུག   

1606957401460552.jpg

1606957401730791.jpg

1606957402477580.jpg

1606957402270450.jpg

1606957402491717.jpg

1606957403389371.jpg

1606957402852961.jpg

1606957404992999.jpg

1606957405353440.jpg

    ཕྱི་དྲོའི་དུས་ཚོད་༣•༣༠ཐོག་ཞི་རྒྱས་དབང་དྲག་དང་དཔལ་མགོན་དང་བཅས་རྒྱས་པར་ཐོན་མཚམས་༧སྐྱབས་རྗེ་ཁྲི་འཛིན་བླ་མ་འོད་ཟེར་སྦྱིན་པ་ཕུན་ཚོགས་རིན་པོ་ཆེ་དང་༧དཔོན་སློབ་རིན་པོ་ཆེ་རྒྱལ་བ་བསྟན་འཛིན། ༧སྒྲུབ་མཁན་རིན་པོ་ཆེ་འཕགས་མཆོག་སེམས་དཔའ་དབུས་པའི་འདི་གའི་བླ་མ་དགེ་བཤེས་སྤྲུལ་སྐུ་མཁན་པོ་དང་ད་ལོའི་དགེ་བཤེས་དང་སྒྲུབ་ཐོན་སྒོམ་ཐོན་བཅས་བཤད་སྒྲུབ་སྒོམ་གསུམ་གྲྭ་ཚང་ཡོངས་རྫོགས་སེར་ཕྲེང་སྒྲིག་ནས་སེར་ཕྲེང་རྒྱས་པར་ཕེབས།  མཆོད་རྔ་བརྒྱ་ཚར་རྡུང་མཚམས་ཚང་མ་གདན་ལ་བཞུགས་ཏེ་ཞི་རྒྱས་དབང་དྲག་རྒྱུན་གདུང་སྲེགས་དང་བཅས་པའི་སྨོན་ལམ་ཤིང་རིང་དང་ཀློང་རྒྱས་མེ་ཏོག་སྨོན་ལམ་གདུང་དྲག་དཔལ་གསུམ་གྱི་སྨོན་ལམ་གསུང་བ་དང་འབྲེལ་ཀུན་རིག་ལས་བཞི་རྒྱུན་ལྔའི་སྦྱིན་བདག་རྣམས་ལ་དྲི་མེད་ཀྱི་ལྷ་རེག་དཀར་པོ་རེ་དང་བོན་གྱི་ཞལ་ཐང་ཀུན་འདུས། སྤྱན་དབྱེ་སོགས་བཀའ་དྲིན་ལེགས་མཚོན་དུ་ཕུལ་བ་དང་སྦྲག་དད་པའི་ཕྱག་ཟུང་མ་འཁོབ་པའི་དད་སྦྱིན་ཕོ་མོ་རྣམས་ཚོགས་ཁང་ཆེན་མོ་ཕུན་ཚོགས་འབྱོར་བ་རྒྱས་པའི་ཁང་བཟང་གི་མདུན་དུ་མཉམ་པར་བསྒྲོན་པ་བཅས་ཉིན་བཅུ་པའི་མཛད་རིམ་མཇུག་ཡོངས་སུ་གྲུབ།




སྐད་འཇོག་རེའུ་མིག

འདྲེན་སྐོལ། དཔྱད་གཏམ(0)ཡོད།